ខេត្តឧត្តរមានជ័យ ៖ បុរសម្នាក់មានកាំភ្លើងខ្លីម៉ាករ៉ូឡូកញ្ចាស់មួយដើម បានដើរអំពាវនាវលក់ ហើយក៏ត្រូវបានសមត្ថកិច្ចឃាត់ខ្លួន កាលពីរសៀលថ្ងៃទី៩ កក្កដា ២០១៩ ហេតុការណ៍នេះ កើតឡើងក្នុងភូមិអូរស្មាច់ សង្កាត់អូរស្មាច់ ក្រុងសំរោង ខេត្តឧត្តរមានជ័យ ។
ជនសង្ស័យខាងលើ ឈ្មោះហួន សុខា អាយុ៤១ឆ្នាំ មានប្រពន្ធឈ្មោះហាន មុំ អាយុ៣៥ឆ្នាំ និងមានកូនប្រុសស្រី២នាក់ រស់នៅភូមិបឹងព្រីង ឃុំបឹងព្រីង ស្រុកថ្មគោល ខេត្តបាត់ដំបង ទាំងពីនាក់ប្តីប្រពន្ធធ្វើចំណាកស្រុកជាកម្មករសំណង់នៅប្រទេសថៃ ។
បើតាមប៉ូលិសបានឱ្យដឹងថា មុនពេលឃាត់ខ្លួនសង្ស័យរូបនេះ គឺទទួលបណ្តាញសម្ងាត់របស់សមត្ថកិច្ចរាយការណ៍មកថា បុរសម្នាក់មិនស្គាល់អត្តសញ្ញាណ ដើរលក់កាំភ្លើងខ្លី ។ ក្រោយទទួលបាន កំលាំងអធិការក្រុងធ្វើការសហការជាមួយកំលាំងប៉ុស្តិ៍រដ្ឋបាលសង្កាត់អូរស្មាច់ ចុះឃាត់ខ្លួននិងធ្វើការឆែកឆេនឹងដងខ្លួនរកឃើញមានអាវុធខ្លីមួយដើមម៉ាករ៉ូឡូកញ្ចាស់គ្មានគ្រាប់ នាំខ្លួនមកអធិការក្រុងធ្វើការសាកសួបន្ត។
យោងទៅលើធ្វើការសាកសួជនសង្ស័យឆ្លើយថា កាលពី៣ឆ្នាំកន្លងទៅ ខ្លួនបានរើសបានកាំភ្លើងខ្លីមួយដើមនេះ ហើយបានយកទៅលាក់ទុក្ខនៅក្នុងចេតីយក្នុងវត្តគីរីមង្គល ក្នុងភូមិអូរស្មាច់ សង្កាត់អូរស្មាច់ ក្រុងសំរោង ។ ខណៈនោះខ្លួននិងប្រពន្ធទៅធ្វើចំណាកស្រុកចេញទៅប្រទេសថៃ រកការងារសំណង់ធ្វើអស់រយៈពេល៣ឆ្នាំ ។
លុះនៅថ្ងៃទី៥ កក្កដា ខ្លួនបានវិលត្រឡប់ចូលមកកម្ពុជា តាមមាត់ច្រកទ្វារអន្តរជាតិអូរស្មាច់ ក៏បានដើរទៅមើលកន្លែង ដែលលាក់ទុក្ខអាវុធខ្លីឃើញនៅដដែល ហើយខ្លួនបានដើរលក់ ត្រូវសមត្តកិច្ចឃាត់ខ្លួនតែម្តង។
(សម្រួលដោយ៖ ស្រីណា)
ចែករំលែកព័តមាននេះ