ខេត្តកំពង់ធំ ៖ តាមសេចក្តីរាយការណ៍បឋមបានឱ្យដឹងថា សពបុរសម្នាក់ត្រូវបានគេប្រទះឃើញដេកស្លាប់នៅវាលស្រែ ក្រោយជនរងគ្រោះបានបាត់ពីផ្ទះអស់រយៈពេល៥ថ្ងៃ ដែលហេតុការណ៍នេះបង្កឱ្យមានការភ្ញាក់ផ្អើលកើតឡើងកាលពីព្រឹកថ្ងៃទី៩ កក្កដា ឆ្នាំ២០១៩ នៅតំបន់ទួលម្រិញ ភូមិប៉ប្រក ឃុំស្វាយភ្លើង ស្រុកតាំងគោក ខេត្តកំពង់ធំ ។
ជនរងគ្រោះដែលស្លាប់ឈ្មោះ រៀម រួន ហៅ វល្លិ៍ ភេទប្រុស អាយុ៥២ឆ្នាំ រស់នៅភូមិកើតហេតុខាងលើ ។
តាមប្រភពពីសាច់ញាតិរបស់ជនរងគ្រោះបានឱ្យដឹងថា មុនកើតហេតុ កាលពីថ្ងៃទី៤ កក្កដា ឆ្នាំ២០១៩ ជនរងគ្រោះបានហូបស្រាថ្នាំជាមួយឈ្មោះ ភី សុដា ហៅ ញ៉េប ភេទប្រុស អាយុ៣៦ឆ្នាំ តាំងពីព្រឹករហូតដល់វេលាម៉ោងប្រហែល៨យប់ទើបឈប់ បន្ទាប់មកឈ្មោះ ញ៉េប បានយកភួយអោយជនរងគ្រោះទៅដេកនៅផ្ទះប្អូនរបស់ជនរងគ្រោះនៅក្បែរនោះដែរ (ផ្ទះគ្មានមនុស្សនៅទេ) ។
តាមប្រភពដដែលបានបន្តថា បន្ទាប់មកឈ្មោះ ញ៉េប ក៏ឡើងទៅលើផ្ទះដេករហូតដល់ម៉ោង៣ទៀបភ្លឺថ្ងៃទី៥ កក្កដា ទើបគាត់ភ្ញាក់ចុះមកក្រោមផ្ទះ ឃើញតែភួយ មិនឃើញជនរងគ្រោះឡើយ ហើយឈ្មោះញ៉េប ក៏ដើរទៅមើលនៅផ្ទះប្អូនរបស់ជនរងគ្រោះ តែមិនឃើញ គាត់ក៏ត្រឡប់មកសួរម្ដាយរបស់ជនរងគ្រោះវិញ ដោយម្តាយរបស់ជនរងគ្រោះប្រាប់ថា «មិនបានឃើញដែរ» ហើយក៏នាំគ្នាដើរក តែរកមិនឃើញ ដោយនាំគ្នានឹកស្មានថា ជនរងគ្រោះទៅផ្ទះប្រពន្ធបាត់ទៅហើយ ។
តាមប្រភពដដែលបានបន្តថា លុះដល់ព្រឹកថ្ងៃទី៩ កក្កដា ២០១៩ ម្ដាយរបស់ឈ្មោះ ញ៉េប បានទូរស័ព្ទមកប្រាប់ថា ឃើញជនរងគ្រោះដេកស្លាប់នៅវាលស្រែ តំបន់ទួលម្រិញ ទើបឈ្មោះ ញ៉េប ទៅមើលស្គាល់ថា ជាសពឈ្មោះវល្លិ៍ ពិតប្រាកដមែន។
តាមប្រភពពីសមត្ថកិច្ចបានសន្និដ្ឋានថា ការស្លាប់របស់ជនរងគ្រោះនេះគឺដោយសារស្រវឹងជោកជាំ ហើយវង្វេងស្មារតី អត់បាយអត់ទឹក បណ្តាលឱ្យកើតខ្យល់គ គាំងបេះដូងស្លាប់តែម្តង ។ ក្រោយពីពិនិត្យរួច សពត្រូវបានសមត្ថកិច្ចប្រគល់ជូនក្រុមគ្រួសារដើម្បីយកទៅធ្វើបុណ្យតាមប្រពៃណី៕ (កែសម្រួលដោយ ៖ ធីតា)
ចែករំលែកព័តមាននេះ