រាជធានីភ្នំពេញ ៖ ក្រសួងអប់រំយុវជន និងកីឡាបានបញ្ជាក់ថា ការកាត់បន្ថយមុខវិជ្ជាប្រឡងសញ្ញាបាត់បាក់ឌុប គឺដើម្បីកាត់បន្ថយបន្ទុក និងការខ្វល់ខ្វាយរបស់បេក្ខជនក្នុងការប្រឡងម្តងៗ ។ នេះបើតាមអ្នកនាំពាក្យក្រសួងអប់រំ ។…
រាជធានីភ្នំពេញ ៖ ក្រសួងអប់រំយុវជន និងកីឡាបានបញ្ជាក់ថា ការកាត់បន្ថយមុខវិជ្ជាប្រឡងសញ្ញាបាត់បាក់ឌុប គឺដើម្បីកាត់បន្ថយបន្ទុក និងការខ្វល់ខ្វាយរបស់បេក្ខជនក្នុងការប្រឡងម្តងៗ ។ នេះបើតាមអ្នកនាំពាក្យក្រសួងអប់រំ ។
លោកបណ្ឌិត រស់ សុវាចាអ្នកនាំពាក្យក្រសួងអប់រំយុវជន និងកីឡាបានឲ្យកោះសន្តិភាពដឹង នៅថ្ងៃទី៩ ខែកក្កដា ឆ្នាំ២០១៩ថា ការកាត់មុខវិជ្ជាប្រឡងសញ្ញាប័ត្រ មធ្យមសិក្សាទុតិយភូមិ(បាក់ឌុប) ពីចំនួន១០មុខវិជ្ជា មកចំនួន៧ ក្រសួងបានអនុវត្តចាប់តាំងពីឆ្នាំ២០១៤ នៅពេលក្រសួងចាប់ផ្តើមធ្វើកំណែទម្រង់ប្រឡងមកម្ល៉េះ ។ លោកបានបញ្ជាក់ថា «ការកាត់បន្ថយចំនួនមុខវិជ្ជាប្រឡងក្នុងគោលបំណងបន្ថយបន្ទុក និងការខ្វល់ខ្វាយរបស់បេក្ខជនពីការប្រឡងរយៈពេល២ថ្ងៃកន្លះមកនៅត្រឹមរយៈពេល២ថ្ងៃ និងពី១០មុខវិជ្ជា មកនៅត្រឹម៧មុខវិជ្ជា ។ ចំណុចនេះមិនបានធ្វើឲ្យប៉ះពាល់ដល់គុណភាពនៃការសិក្សាទេ ដោយសិស្សទាំងអស់បានពង្រឹងសមត្ថភាព តាមរយៈការប្រឡងឆមាសនូវគ្រប់មុខវិជ្ជារួចហើយ» ។ លោកបន្តថា ការប្រឡងនេះ គឺជាការវិនិច្ឆ័យលើកម្រិតសមត្ថភាព ចំណេះដឹងរបស់បេក្ខជនដោយឈរលើគោលការណ៍ច្បាប់យុត្តិធម៌តម្លាភាព និងលទ្ធផលទទួលយកបាន ។
ចំពោះការកាត់មុខវិទ្យាប្រឡងបាក់ឌុបនេះត្រូវបានលោកនៅចាន់ មុន្នី ជាគ្រូបង្រៀន មុខវិជ្ជា គីមីវិទ្យា នៅវិទ្យាល័យ ហ៊ុន សែន បរិបូណ៌ ខេត្តកំពង់ឆ្នាំងបានសរសេរលើបណ្តាញសង្គមយ៉ាងដូច្នេះថា លោកចង់ឱ្យមានការប្រឡង១០មុខវិជ្ជាដូចមុន ។ បើមិនដូច្នោះទេសិស្សត្រូវបោះបង់ការរៀនមុខវិជ្ជាខ្លះ ។ លោក មុន្នី ថា ៖ «អ៊ីចឹងឧទាហរណ៍ថ្នាក់វិទ្យាសាស្ត្រ អ៊ីចឹងមុខវិជ្ជា ភូមិ មុខវិជ្ជា ផែនដី មុខ វិជ្ជាសីលធម៌គេអត់ប្រឡង ។ អ៊ីចឹងសិស្សវាអត់រៀនហ្មងម៉ោងហ្នឹង ។ វាគិតអ៊ីចឹង ។ ទី២ ដូចជា មុខវិជ្ជាសង្គមអ៊ីចឹង វាអត់ប្រឡងគីមីអត់ប្រឡងរូបវិទ្យាអត់ប្រឡងជីវៈ អ៊ីចឹង ។ អ៊ីចឹងវា គិតថា មិនដឹងវារៀនធ្វើអីផងមុខវិជ្ជាហ្នឹង ។ អ៊ីចឹងដល់ម៉ោងវាអត់សូវចង់រៀន ។ ទៅផ្ទះវិញវាអត់សូវមើលអត់សូវអី អ៊ីចឹងហើយការរៀនរបស់សិស្សខ្សោយ» ។
សូមជម្រាបថា សម័យប្រឡងសញ្ញាប័ត្រមធ្យមសិក្សាទុតិយភូមិ ឬបាក់ឌុប និងប្រព្រឹត្តិទៅនៅថ្ងៃទី១៩ ខែសីហាខាងមុខនេះ ត្រូវបានក្រសួងបែងចែកជាពីរផ្នែក គឺផ្នែកវិទ្យាសាស្ត្រ និងវិទ្យា សាស្ត្រសង្គម ។ ថ្នាក់វិទ្យាសាស្ត្រសង្គមមានមុខវិជ្ជា ៖ ផែនដី និងបរិស្ថានវិទ្យា , ប្រវត្តិវិទ្យា , ភូមិវិទ្យា , ភាសាបរទេស , គណិតវិទ្យា, សីលធម៌ ពលរដ្ឋវិជ្ជា និងអក្សរសាស្ត្រខ្មែរ ។ ផ្នែកវិទ្យាសាស្ត្រ មានមុខវិជ្ជា ៖ ប្រវត្តិវិទ្យា ,ជីវវិទ្យា ,គីមីវិទ្យា , ភាសាបរទេស ,អក្សរសាស្ត្រខ្មែរ ,រូបវិទ្យា និងគណិតវិទ្យា ៕ កែសម្រួលដោយ ៖ សុឃាក់
ចែករំលែកព័តមាននេះ