ខេត្តបន្ទាយមានជ័យ ៖ តាមសេចក្តីរាយការណ៍បឋមបានឱ្យដឹងថា គ្រាប់យុទ្ធភ័ណ្ឌមិនទាន់ផ្ទុះចំនួនជាង៤០០គ្រាប់ ត្រូវបាននគរបាលស្រុកភ្នំស្រុក ប្រគល់ជូនអង្គភាពហេឡូត្រាសដ៍ ដើម្បីធ្វើការកំទេចចោលកាលពីថ្ងៃទី៨ ខែកក្កដា ឆ្នាំ២០១៩ ម្សិលមិញ។
តាមការឲ្យដឹងពីមន្ត្រីនគរបាលស្រុកភ្នំស្រុកបានឲ្យដឹងថា កាលពីថ្ងៃទី១២ ខែមិថុនា ឆ្នាំ២០១៩ មានប្រជាពលរដ្ឋឈ្មោះ ហាំ អាន ភេទប្រុស អាយុ៤៥ឆ្នាំ នៅភូមិត្រពាំថ្មខាងជើង ឃុំប៉ោយចារ ស្រុកភ្នំស្រុក ខេត្តបន្ទាយមានជ័យ បានមករាយការណ៍ប្រាប់នគរបាលប៉ុស្តិ៍រដ្ឋបាលឃុំប៉ោយចារ គាត់បានប្រទះឃើញគ្រាប់យុទ្ធភ័ណ្ឌមិនទាន់ផ្ទុះនៅដីចំការដំឡូងរបស់គាត់ ស្ថិតនៅភូមិតាអុង ឃុំប៉ោយចារ ។ នៅពេលកម្លាំងប៉ុស្តិ៍បានចុះទៅត្រួតពិនិត្យឃើញមានគ្រាប់កាំភ្លើងចំនួន៣៨៥គ្រាប់ និង DCA (គ្រាប់បាញ់យន្តហោះ) ចំនួន២៩គ្រាប់ សរុបទាំងអស់មានចំនួន៤១៤គ្រាប់។
តាមការឲ្យដឹងពីមន្ត្រីនគរបាលស្រុកភ្នំស្រុកបានឲ្យដឹងថា តាមការឲ្យដឹងពីប្រជាពលរដ្ឋនៅក្នុងភូមិកន្លែងដីចំការរបស់ប្រជាពលរដ្ឋឈ្មោះហាំ អាន អតីតគឺជាកន្លែងបន្ទាយរបស់កងទ័ព និងជាកន្លែងឃ្លាំងគ្រាប់ផងដែរ ។ ចំពោះគ្រាប់ទាំងនោះ ត្រូវបានកម្លាំងនគរបាលប៉ុស្តិ៍រដ្ឋបាលឃុំប៉ោយចារ បានប្រគល់ជូនអង្គភាពហេឡូត្រាសដ៍ ធ្វើការកំទេចចោលកាលពីថ្ងៃទី៨ ខែកក្កដា ឆ្នាំ២០១៩៕ (កែសម្រួលដោយ ៖ ធីតា)
ចែករំលែកព័តមាននេះ