ខេត្តសៀមរាប ៖ រថយន្តឡិចស៊ីស៤៧០ពណ៌ខ្មៅមួយគ្រឿងដែលម្ចាស់ទើបបើកចេញពីពិធីជប់លៀងមង្គលការហើយទំនងជាស្រវឹងធ្លាក់ភ្នែកបានបោះពួយបុកខឿនរង្វង់មូលផ្លូវបំបែកទៅព្រលានយន្តហោះ បង្កការភ្ញាក់ផ្អើលដល់កម្លាំងនគរបាលចរាចរខេត្តចេញជួយធ្វើអន្តរាគមន៍បន្ទាន់កាលពីវេលាម៉ោងប្រមាណ៨យប់ថ្ងៃទី១៩ មីនា កន្លងទៅនេះ។
តាមប្រភពពីកន្លែងកើតហេតុមន្ត្រីប៉ូលិសចរាចរបានឱ្យដឹងថា បុរសជាអ្នកបើកបរបង្កការខូចខាតដល់ខឿនរង្វង់មូលផ្អើលទាំងយប់នោះ ឈ្មោះណាវ ខូវ អាយុ៤៣ឆ្នាំ មានទីលំនៅស្រុក ពួកខេត្តសៀមរាប ។ ប្រភពច្បាស់ការណ៍បានឱ្យដឹងផងដែរថា ហេតុការណ៍បុកខឿនរង្វង់មូលនេះ គឺកើតឡើងខណៈពេលដែលម្ចាស់រថយន្តនោះបើកបររថយន្តតែម្នាក់ឯងចេញមកពីជប់លៀងមង្គលការក្នុងក្រុងសៀមរាបក្នុងល្បឿនលឿន ដោយបើកក្នុងទិសដៅពីកើតទៅលិច លុះមកដល់ចំណុចកើតហេតុ ស្រាប់តែរេចង្កូតទៅបុកខឿនរង្វង់មូលលាន់ស្នូរដូចរន្ទះបណ្តាលឱ្យបែកកង់មុខក្រោយផ្នែកខាងឆ្វេង រួចរេចង្កូតទៅបុកខឿនចិញ្ចើមសួនដែលស្ថិតនៅខាងជើងនៃរង្វង់មូលជាប់នៅទីនោះទៅមុខលែងរួច ។ ក្រោយពេលកើតហេតុមន្ត្រីនគគរបាលចរាចរបានទៅជួយធ្វើអន្តរាគមន៍ភ្លាមៗ ទើបឃើញបុរសជាអ្នកបើកបរលូនចេញពីក្នុងរថយន្តទាំងស្ថានភាពស្រវឹងនិងប្រទូស្តពាក្យសម្តីជាមួយនឹងមន្ត្រីនគរបាលចរាចរផងដែរ ។
ទោះបីជាយ៉ាងណាឧប្បត្តិហេតុខាងលើពុំបណ្តាលឱ្យមានគ្រោះថ្នាក់ដល់នរណាម្នាក់ឡើយ គ្រាន់តែខូចខាតរថយន្តប៉ុណ្ណោះ។ ប្រជាពលរដ្ឋដែលបានទៅចោមរោមមើលនិយាយថា សំណាងហើយហេតុការណ៍នេះកើតឡើងក្នុងចន្លោះពេលដែលគ្មានមនុស្សធ្វើចរាចរណ៍ឆ្លងកាត់ទៅមក ប្រសិនជាមានវិញមិនដឹងជាស្លាប់ឬរបួសប៉ុន្មាននាក់នោះទេ ។ កន្លងមកគេសង្កេតឃើញថា ការបើកបរក្នុងស្ថានភាពមានជាតិស្រវឹងនៅក្នុងខ្លួន កុំថាឡើយទ្រព្យសម្បត្តិសាធារណៈត្រឹមខឿនរង្វង់មូលដែលធ្វើពីបេតុង សូម្បីតែបង្គោលភ្លើងបំភ្លឺផ្លូវដែលធ្វើពីដែកនៅតាមចិញ្ចើមថ្នល់ក៏មិនលើកលែងឱ្យដែរគឺបុកទាំងអស់។ ទោះបីជាបែបណា រថយន្តឡិចស៊ីស ៤៧០ ខាងលើ ត្រូវបាននគរបាលចរាចរនាំយកទៅរក្សាទុកបណ្តោះអាសន្ន នៅស្នងការដ្ឋាននគរបាលខេត្តទាំងយប់ ៕
ចែករំលែកព័តមាននេះ