រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា បុរសម្នាក់ខឹងប្រពន្ធ រួចចោទថាមានសហាយ ស្រាប់តែក៏ប្រវាយប្រតប់គ្នាបណ្តាលឲ្យបែកក្បាល រួចប្រពន្ធរត់ទៅប្តឹងសមត្ថកិច្ចបង្កឱ្យមានការភ្ញាក់ផ្អើលកាលពីម៉ោង៨និង៥០នាទីយប់ ថ្ងៃទី៨ ខែកក្កដា ឆ្នាំ២០១៩ ដែលស្ថិតក្នុងបុរីកំពុងសាងសង់ នៅភូមិអង្គកែវ សង្កាត់ចោមចៅទី៣ ខណ្ឌពោធិ៍សែនជ័យ ។
ជនរងគ្រោះខាងលើឈ្មោះ ស ស្រីណែត ភេទស្រី អាយុ៣០ឆ្នាំ មុខរបរកម្មករសំណង់ ស្នាក់នៅភូមិអង្គកែវ សង្កាត់ចោមចៅទី៣ ខណ្ឌពោធិ៍សែនជ័យ ចំណែកប្តីឈ្មោះហៃ សាវី អាយុ៣៦ឆ្នាំ មុខរបរកម្មករសំណង់ ស្នាក់នៅជាមួយគ្នា មានស្រុកកំណើតនៅស្រុកមេសាង ខេត្តព្រៃវែង ។
បើតាមប្រភពពីជនរងគ្រោះជាប្រពន្ធប្រាប់ថា មុនកើតហេតុ ដោយសារឃើញប្តីរបស់គាត់និងមិត្តម្នាក់ទៀតផឹកស្រាស្រវឹង ខណៈនោះគាត់មិនសូវស្រួលខ្លួនផង គាត់ក៏កោសខ្យល់ខ្លួនឯង ។ ក្រោយមកមិត្តរបស់ប្តីគាត់ត្រឡប់ទៅវិញបាត់ ស្រាប់តែបុរសជាប្តីសុំលុយប្រពន្ធ តែប្រពន្ធប្រាប់ថា អត់មានលុយ ធ្វើឲ្យប្តីខឹងនិយាយថា ខំរកលុយឱ្យរាល់ថ្ងៃហើយនៅតែលុយមិនសល់ទៀត មានតែប្រពន្ធលួចមានសហាយជាមួយអ្នកផ្សេង ។
ប្រភពដដែលបន្តថា ចំណែកប្រពន្ធវិញ ខឹងប្តីរបស់ខ្លូនចោទប្រកាន់ថា មានសហាយបានស្ទុះយកកាំបិតបម្រុងកាប់ប្តី ក៏ត្រូវប្តីស្រវឹងស្រាប្រវាយប្រតប់វិញ បណ្តាលឲ្យជ្រុលដៃវាយប្រពន្ធរបស់ខ្លួនបែកក្បាលហូរឈាមស្រោចខ្លួនតែម្តង ។ ភ្លាមៗនោះ ស្ត្រីជាប្រពន្ធរត់ទៅប្តឹងសមត្ថកិច្ចឱ្យជួយអន្តរាគមន៍ផងដែរ ហើយកម្លាំងនគរបាលប៉ុស្តិ៍ចោមចៅទី៣ បានទៅដល់កន្លែងកើតហេតុ ចំណែកបុរសជាប្តីបដិសេធថា ខ្លួនមិនបានវាយប្រពន្ធរបស់ខ្លួនឡើយ ដោយអចេតនា ។
ក្រោយមកកម្លាំងនគរបាលប៉ុស្តិ៍ចោមចៅទី៣ បាននាំភាគីទាំងសងខាងមកសួរនាំនៅប៉ុស្តិ៍នគរបាលរដ្ឋបាលចោមចៅទី៣ម្តងទៀត ដើម្បីធ្វើការអប់រំ ។ បន្ទាប់ពីសមត្ថកិច្ចសាកសួរនឹងធ្វើការអប់រំ ដោយភាគីជាប្រពន្ធដោយមិនប្តឹងផ្តល់ សមត្ថកិច្ចបានឱ្យភាគីទាំងសងខាងត្រឡប់ទៅវិញភ្លាមៗផងដែរ ៕ (កែសម្រួលដោយ ៖ បុប្ផា)
ចែករំលែកព័តមាននេះ