ខេត្តកំពង់ស្ពឺ ៖ មិនមែនជាលើកទី១នោះទេ ដែលអ្នកកាសែតបានព្យាយាមផ្ដល់ព័ត៌មានដល់សមត្ថកិច្ច និងមន្ត្រីជំនាញឲ្យបង្ក្រាបបទល្មើសព្រៃឈើ ខណៈដែលមន្ត្រីជំនាញនិងសមត្ថកិច្ចពាក់ព័ន្ធ ហាក់បីដូចជាងាប់ត្រគាក មិនដែលឃើញមានសកម្មភាពបង្ក្រាបបទល្មើសព្រៃឈើម្តងណាឡើយ ។ ជាក់ស្តែង…
ខេត្តកំពង់ស្ពឺ ៖ មិនមែនជាលើកទី១នោះទេ ដែលអ្នកកាសែតបានព្យាយាមផ្ដល់ព័ត៌មានដល់សមត្ថកិច្ច និងមន្ត្រីជំនាញឲ្យបង្ក្រាបបទល្មើសព្រៃឈើ ខណៈដែលមន្ត្រីជំនាញនិងសមត្ថកិច្ចពាក់ព័ន្ធ ហាក់បីដូចជាងាប់ត្រគាក មិនដែលឃើញមានសកម្មភាពបង្ក្រាបបទល្មើសព្រៃឈើម្តងណាឡើយ ។ ជាក់ស្តែង ឈើដុលចំនួន១៩៦កំណាត់ ត្រូវបានអ្នកកាសែតរាយការណ៍ទៅថ្នាក់ដឹកនាំ ទើបមានការបញ្ជាកម្លាំងចម្រុះបង្ក្រាប និងរឹបអូសយកមករក្សាទុកនៅដែនជម្រកសត្វព្រៃភ្នំឱរ៉ាល់ដែលជាម្ចាស់ដែនដី ដើម្បីចាត់ការបន្តតាមនីតិវិធីដកហូតទុកជាសម្បត្តិរដ្ឋ ។
ការចុះរឹបអូសឈើនេះ ធ្វើឡើងកាលពីរសៀលថ្ងៃទី៥ ខែកក្កដាកន្លងទៅ នៅក្នុងព្រៃខាងក្រោយផ្ទះមួយគ្មានម្ចាស់ស្នាក់នៅ ស្ថិតក្នុងភូមិតេះ ឃុំតាសាល ស្រុកឱរ៉ាល់ ។ ប្រភពព័ត៌មានឲ្យដឹងថា មុនពេលសមត្ថកិច្ចចុះទៅប្រមូលនិងរឹបអូសឈើទាំងនោះ មានក្រុមអ្នកសារព័ត៌មួយក្រុមបានចុះទៅយកព័ត៌មាននៅជិតកន្លែងឈ្មួញស្តុកនិងលាក់ឈើទាំងនេះ ។
ប្រភពព័ត៌មានបន្តថា ក្រោយពេលប្រទះឃើញគំនរឈើទាំងនេះ ក្រុមអ្នកសារព័ត៌មាន ក៏បានរាយការណ៍ទៅមន្ត្រីជំនាញពាក់ព័ន្ធឲ្យមកបង្ក្រាប តែអស់លោកទាំងនោះប្រាប់ថារវល់អស់ហើយ ។ ក្រោយមកដោយគ្មានជម្រើសក៏រាយការណ៍ទៅថ្នាក់ដឹកនាំខេត្តតែម្ដង ដើម្បីស្នើសុំកម្លាំងចុះមកប្រមូលនិងរឹបអូសឈើទាំងនេះជាសម្បត្តិរដ្ឋ ។
ប្រភពព័ត៌មានបន្តទៀតថា មួយសន្ទុះក្រោយមក លោក មួង ធី អភិបាលស្រុកឱរ៉ាល់ និងជាប្រធានគណៈបញ្ជាការឯកភាពស្រុក បានដឹកនាំកម្លាំងកងរាជអាវុធហត្ថស្រុក និងមន្ត្រីបរិស្ថានដែនជម្រកសត្វព្រៃភ្នំឱរ៉ាល់ ចុះទៅបង្ក្រាបនិងប្រមូលឈើដែលឈ្មួញលាក់ទុកខុសច្បាប់នៅក្នុងព្រៃខាងក្រោយផ្ទះខាងលើ ។ ឈើដែលឈ្មួញលាក់ទុកបម្រុងដឹកចេញទាំងនេះមានឈើជ្រុង និងកូនក្រឡឹងប្រភេទផ្ចឹក សុក្រំ ត្រសេក
ពពេល សរុបចំនួន១៩៦កំណាត់ស្មើនឹងជាង៤ម៉ែត្រគូប ។
ក្រោយពីរឹបអូសនិងប្រមូលយក នៅថ្ងៃទី៦ ខែកក្កដា ឆ្នាំ២០១៩ ឈើទាំងអស់ត្រូវបានដឹកយកទៅរក្សាទុកនៅស្នាក់ការដែនជម្រកសត្វព្រៃភ្នំឱរ៉ាល់ ដើម្បីចាត់ការតាមនីតិវិធី ។ដោយឡែក តាមប្រភពក្រៅផ្លូវការបានឲ្យដឹងថា ឈើទាំងអស់ជារបស់ឈ្មួញម្នាក់ឈ្មោះ ចិន កូនយាយប៉ុស ច្បារមន ដែលឈ្មួញម្នាក់នេះហាក់បីដូចជាមានសំណាងដូចឈ្មោះ ឌីណា នៅផ្សារកន្ទួតដែរ ព្រោះគ្រប់ពេលដែលគេដឹកឈើម្តងៗ មិនដែលរងការបង្ក្រាបពីសំណាក់មេព្រៃ និងមន្ត្រីជំនាញពាក់ព័ន្ធម្តងណាឡើយ ។
មានការិះគន់ផងដែរ ចំពោះម្ចាស់ដែនដីែដលគ្រប់គ្រងនៅចំណុចខាងលើថា ហាក់បីដូចជាងាប់ត្រគាកស្ដូក មិនដែលបង្ក្រាបបទល្មើសព្រៃឈើក្នុងដែនសមត្ថកិច្ចខ្លួនគ្រប់គ្រងម្តងណាឡើយ ៕ (សម្រួលដោយ៖ ស្រីណា)
ចែករំលែកព័តមាននេះ