ខេត្តប៉ៃលិន ៖ សេចក្តីរាយការណ៍បឋមបានឲ្យដឹងថា កន្លងមកគេសង្កេតឃើញល្បែងស៊ីសងដែលរដ្ឋាភិបាលហាមឃាត់ គឺល្បែងជល់មាន់ ត្រូវអ្នកញៀនល្បែងនេះលួចលេងគ្រប់ទីកន្លែងនៅក្នុងខេត្តប៉ៃលិន ជាហេតុធ្វើឲ្យប៉ះពាល់ដល់ការសន្តិសុខសណ្តាប់ធ្នាប់ និងការអនុវត្តភូមិឃុំមានសុវត្ថិភាព ដោយយូរៗម្ដងទើបគេឃើញសមត្ថកិច្ចចុះបង្ក្រាប ។ ជាក់ស្ដែងកាលពីវេលាម៉ោង៣និង០០នាទីរសៀល ថ្ងៃទី០៧ ខែកក្កដានេះ សមត្ថកិច្ចនគរបាលនៃអធិការស្រុកសាលាក្រៅបាននាំគ្នាចុះបង្ក្រាបបានមួយករណី ។
បើតាមប្រភពពីសមត្ថកិច្ចបានឲ្យដឹងថា ការបង្ក្រាបករណីល្បែងស៊ីសង (ជល់មាន់) មួយករណីនៅចំណុចអូរកប់អង្ករ ស្ថិតក្នុងភូមិអូរឈើក្រំ ឃុំស្ទឹងកាច់ ស្រុកសាលាក្រៅ ខេត្ដប៉ៃលិន ដោយឃាត់ខ្លួនមនុស្សចំនួន០២នាក់មាន ទី១ – ឈ្មោះ ហេង ឆើត ភេទប្រុស អាយុ២៦ឆ្នាំ រស់ភូមិផ្សារព្រំជើង ឃុំស្ទឹងកាច់ស្រុកសាលាក្រៅ ។ ទី២- ឈ្មោះ ថន ភារិទ្ធ ភេទប្រុស អាយុ២៩ឆ្នាំ រស់ភូមិផ្សារព្រំ ឃុំស្ទឹងកាច់ស្រុកសាលាក្រៅ ។
ចំណែកវត្ថុតាងរួមមាន ៖ មាន់ជល់ចំនួន១០ក្បាល ស៊ុមក្រុងមាន់ចំនួន០៣ ខ្សែសង្វៀន សម្រាប់ជល់មាន់ចំនួន០១ ម៉ូតូចំនួន០៩គ្រឿង ។ ចំណែកប្រជាពលរដ្ឋបានបង្ហើបឱ្យដឹងថា បើនិយាយពីល្បែងស៊ីសងវិញ ជាពិសេសមាន់ជល់ត្រូវបានគេបើកលេងលួចលាក់ស្ទើរទូទាំងខេត្ត ខណៈអ្នកញៀនល្បែងខ្លះអះអាងទាំងទឹកមុខមាំថា គេបានបង់លុយអស់ហើយមិនខ្លាចអ្នកណាឡើយ ។
លើសពីនេះពួកគាត់មានការព្រួយបារម្ភពីការរស់នៅប្រចាំថ្ងៃ ព្រោះមានចោរកម្មកើតឡើង ដើរគាស់តូបតាមផ្សារនាពេលយប់លួចរបស់របរអាជីវករ លួចកាច់ក.ម៉ូតូគ្រប់ទីកន្លែង និងលួចមាន់ទាតាមភូមិផងដែរ ។
ពាក់ព័ន្ធបញ្ហាបង្ក្រាបនេះ បច្ចុប្បន្នជនសង្ស័យ និងវត្ថុតាងត្រូវបានឃាត់ខ្លួននៅអធិការដ្ឋាននគរបាលស្រុកសាលាក្រៅ ដើម្បីកសាងសំណុំរឿងចាត់ការតាមនីតិវិធី ៕ កែសម្រួលដោយ ៖ សុឃាក់
ចែករំលែកព័តមាននេះ