រាជធានីភ្នំពេញ ៖ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិបានបញ្ជាទៅកាន់កងយោធពលខេមរភូមិន្ទទាំងអស់ត្រូវតែហ្វឹកហាត់ជាប្រចាំ ទោះបីជាប្រទេសជាតិមានសុខសន្តិភាពពេញលេញក៏ដោយ ។
សម្តេច ទៀ បាញ់ បានសរសេរលើបណ្តាញសង្គម នៅថ្ងៃទី៨ ខែកក្កដានេះ យ៉ាងដូច្នេះថា«កងយោធពលខេមរភូមិន្ទទាំងអស់ត្រូវបន្តហ្វឹកហាត់ឱ្យបានល្អជាប្រចាំ ដើម្បីត្រៀមខ្លួនឱ្យបានស្រេចក្នុងការការពារជាតិមាតុភូមិ បើទោះបីជាកម្ពុជាយើងទទួលបាននូវសុខសន្តិភាពពេញលេញរួចហើយក្តី» ។
នៅលើបណ្តាញសង្គមដដែលសម្តេច ទៀ បាញ់ ក៏បានស្រង់ខ្លឹមសារសង្ខេបដកស្រង់ពីសៀវភៅ «ការបញ្ចប់សង្គ្រាមស៊ីវិល ៖ ប្រភពសន្តិភាពពេញលេញនៅកម្ពុជា» វគ្គទី៨១ យ៉ាងដូច្នេះថា ការបង្ការអំពើភេរវកម្ម អំពើភេរវកម្មកំពុងជាបញ្ហាប្រឈមមុខ និងជាកង្វល់មួយ ដែលរដ្ឋាភិបាលទាំងឡាយ តែងតែយកចិត្តទុកដាក់ជានិច្ចនាពេលបច្ចុប្បន្ន ។ ចំពោះកម្ពុជា ថ្វីត្បិតតែលទ្ធភាពនៃការវាយប្រហារមកលើប្រទេសកម្ពុជាអាចមានតិចតួចក៏ដោយក៏ «ការខិតខំធើ្វយ៉ាងណា ដើម្បីបញ្ចៀសមិនឲ្យសកម្មភាពភេរវកម្មកើតមានឡើងបាននៅក្នុងប្រទេសកម្ពុជា គឺជាជោគជ័យធំធេងណាស់ ជាជាងទុកឲ្យសភាពការណ៍កើតឡើង ហើយទើបយើងប្រឹងប្រែងទប់ទល់» ។
សម្តេចលើកឡើងទៀតថា ដូចបានឃើញស្រាប់ហើយនូវសភាពការណ៍ដែលកើតមាននៅមជ្ឈឹមបូព៌ា នៅអឺរ៉ុប នៅអាមេរិក ហើយជាពិសេសនៅអាស៊ីអាគ្នេយ៍ដែលនៅជិតបង្កើយនេះ (ថៃ) គ្មានអ្នកណាម្នាក់អាចមានជោគជ័យទាំងស្រុងលើអំពើភេរវកម្មអន្តរជាតិ ដែលបានកើតមាននៅឡើយទេ ។ កន្លែងខ្លះបានត្រឹមតែការពារទាំងលំបាក កន្លែងខ្លះការពារមិនបានទៀតផង ទោះជាប្រើប្រាស់ធនធានដ៏មហិមាយ៉ាងណាក៏ដោយ ។ ដូច្នេះការប្រឹងប្រែងប្រើគ្រប់វិធីទាំងអស់នៅក្នុងការទប់ស្កាត់មិនឲ្យសភាពការណ៍អាក្រក់ណាមួយកើតមាននៅលើទឹកដីរបស់យើង គឺជាប្រការចាំបាច់បំផុត ។ ប្រមុខដឹកនាំក្រសួងការជាតិក៏បានលើកឡើងទៀតថា ក្នុងការសិក្សាខាងដើមថា កងយោធពលខេមរភូមិន្ទ (ខ.ភ.ម )បានបំពេញភារកិច្ច ដោយមានការប្រែប្រួលជាច្រើនដំណាក់ក្នុងសង្គ្រាមនៅកម្ពុជា ដើម្បីសម្រេចបាននូវសន្តិភាពមួយឈានទៅរកការទប់ស្កាត់បង្ក្រាបភេរវកម្ម ប៉ុន្តែការបន្តការពារ និងថែរក្សាសន្តិភាពឲ្យបានស្ថិតស្ថេរគង់វង្ស និងដើម្បីការអភិវឌ្ឍនៅតែជាបញ្ហាបត់បែនស្មុគស្មាញ ដែលទាមទារការរៀបចំកែសម្រួលទាំងរចនាសម្ព័ន្ធថែមទៀត ព្រោះរូបភាពនៃការគំរាមកំហែងលើស្ថិរភាពជាតិមួយ តំបន់មួយ បច្ចុប្បន្នបានវិវត្តន៍លឿនទាំងកត្តាផ្ទៃក្នុង កត្តាខាងក្រៅព្រមទាំងកត្តារូបី និងអរូបី ។
សម្តេចក៏បានគូសបញ្ជាក់ថា រាជរដ្ឋាភិបាល និងស្ថាប័នក្រោមឱវាទ ពិសេស ខ.ភ.ម បានយកចិត្តទុកដាក់យ៉ាងខ្លាំងក្លាក្នុងការបង្ការទប់ស្កាត់ និងឈានទៅរកការបង្ក្រាបអំពើភេរវកម្ម ក្នុងវិធានការជាច្រើនដែលបានចាត់តាំងឡើងដូចជា ការប្រមែប្រមូលដកហូតអាវុធ និងកម្ទេចអាវុធដែលនៅរាយប៉ាយអណាធិបតេយ្យ តាមរយៈនយោបាយអណ្តាតភ្លើងសន្តិភាព គឺជាផ្នែកមួយយ៉ាងមានប្រសិទ្ធិភាពក្នុងផែនការទប់ស្កាត់ភេរវកម្ម ដែលក្នុងនេះមានរហូតដល់ការប្រមូលកម្ទេចកាំជ្រួចផ្ទៃដី និងកាំជ្រួចអាកាស «ប៉េឆូរ៉ា» បញ្ជាក់ពីការយកចិត្តទុកដាក់ក្នុងការអនុវត្តជាក់ស្តែង ។
ដូច្នេះគួរចាប់អារម្មណ៍ពីអី្វដែលធើ្វឲ្យមានការវិវត្តន៍ ពីការប្រឈមមកកិច្ចសហប្រតិបតិ្តការទាំងយោធាទាំងនយោបាយ ។ ទិដ្ឋភាពនេះក៏យើងអាចមើលឃើញនូវកិច្ចប្រតិបតិ្តការមួយទៀតក្នុងការគ្រប់គ្រងអាវុធដែលកម្ពុជាបានធើ្វប្រកបដោយជោគជ័យក្នុងនយោបាយ «អណ្តាតភ្លើងសន្តិភាព» របស់រាជរដ្ឋាភិបាលផ្ទាល់ផង និងជាកិច្ចសហប្រតិបតិ្តការជាមួយអ៊ីយូអាសាក់ផង ។ សម្តេច ទៀ បាញ់ បន្ថែមថា គេអាចវាយតម្លៃបានដែរថា ការគ្រប់គ្រងអាវុធដ៏មានប្រសិទ្ធភាពនេះ គឺជាការរួមវិភាគទានមួយដ៏មានប្រសិទ្ធភាពក្នុងការបង្ការ និងទប់ស្កាត់អំពើភេរវកម្ម ។
ក្រៅពីនេះ ដើម្បីឆ្លើយតបឲ្យកាន់តែខ្លាំងក្នុងប្រតិបតិ្តការជាក់ស្តែង រាជរដ្ឋាភិបាលបានយកចិត្តទុកដាក់រៀបចំច្បាប់នានា ដើម្បីឲ្យមានសមត្ថកិច្ចគ្រប់គ្រាន់ក្នុងការបំពេញការងារបង្ក្រាប ការពារទប់ស្កាត់ភេរវកម្ម និងបានណែនាំគ្រប់ពេលវេលា គ្រប់បណ្តាអង្គភាព ឲ្យការពារចាត់តាំងក្បាលម៉ាស៊ីនដឹកនាំឲ្យមានភាពទូលំទូលាយ ដោយមានការដឹកនាំផ្ទាល់ពីសម្តេចនាយករដ្ឋមន្ត្រី ដូចជា គណៈកម្មាធិការប្រឆាំងភេរវកម្ម… ។
ជាមួយគ្នានោះដែរសម្តេចក៏បានឲ្យដឹងថា ពីកងទ័ពមួយដែលគេធ្លាប់ចោទថា ជាកម្លាំងជនផ្តាច់ការអំណាចនិយម ជាទ័ពអសមត្ថភាព ក្លាយជាកម្លាំងដែលដោះស្រាយកង្វល់ ការបារម្ភរបស់ពិភពលោក ។ ចំពោះអាមេរិកដែលធ្លាប់លួចផ្តល់ជួយដល់ឧទ្ទាម កាលធើ្វសង្គ្រាមស៊ីវិល ក៏បានក្លាយជាដៃគូកិច្ចសហប្រតិបតិ្តការ ដើម្បីស្ថិរភាព សន្តិភាព ឬការអភិវឌ្ឍ ។ នេះជាក្រឹត្យក្រមនៃការប្រែប្រួលក្នុងថេរវេលាជិត៣០ឆ្នាំចុងក្រោយដោយសារការផ្លាស់ប្តូរបរិបទ និងសភាពការណ៍អំពីនយោបាយ សន្តិសុខ និងសេដ្ឋកិច្ច ៕ កែសម្រួលដោយ ៖ សុឃាក់
ចែករំលែកព័តមាននេះ