រាជធានីភ្នំពេញ ៖ សេចក្តីរាយការណ៍បឋមរថយន្តកាមរីឆ្លាមមួយគ្រឿងតៃកុងបើកលឿនបុកឃឿនពុះចែកទ្រូងផ្លូវបណ្តាលឲ្យខ្ទាតប៉ះបង្គោលភ្លើងផ្ទុះឆេះសល់តែគ្រោងឆ្អឹង បង្កអោយមានការភ្ញាក់ផ្អើល កាលពីវេលាម៉ោង១១និង៥០នាទីយប់ថ្ងៃទី០៧ ខែកក្កដានេះ នៅតាមបណ្ដោយផ្លូវមហាវិថីឈ្នះឈ្នះ ហៅផ្លូវទំនុបកប់ស្រូវ កែងច្រកចូលវត្តតិក្ខបញ្ញោ ដែលស្ថិតនៅភូមិសំរោង សង្កាត់សំរោងក្រោមខណ្ឌពោធិ៍សែនជ័យ ។
រថយន្តកាមរីឆ្លាមខាងលើមានពណ៌ទឹកប្រាក់ ពាក់ស្លាកលេខភ្នំពេញ 2C -3545 បើកបរក្នុងទិសដៅពីជើងទៅត្បូង ។
តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញរថយន្តបង្កខាងលើបើកបរក្នុងល្បឿនយ៉ាងលឿនក្នុងទិសដៅពីជើងទៅត្បូងក្នុងល្បឿនយ៉ាងលឿនលុះមកដល់ចំណុចកើតហេតុដោយផ្លូវខាងលើមានសណ្ឋានភាពកោង ហើយដោយតៃកុងបួងចង្កូតមិនទាន់ ហើយបានជ្រុលទៅបុកឃឿនពុះចែកទ្រូងផ្លូវ និងស្លាកសញ្ញាចរាចរណ៍ហើយបោកទៅលើបង្គោលភ្លើងបំភ្លឺផ្លូវ បណ្តាលឲ្យវៀចបង្គោលភ្លើងអស់ចំនួនមួយដើម ហើយរថយន្តខ្ទាតទៅលើឃឿននឹងបណ្តាលឲ្យរងរបួសស្រាល តៃកុង និងអ្នករួមដំណើរម្នាក់ទៀតរងរបួសស្រាល ហើយបានចុះពីលើរថយន្តភ្លាមៗផងដែរ។
ប្រភពព័ត៌មានបានបន្តទៀតថា ខណៈពេលតៃកុងនឹងអ្នករួមដំណើរចុះពីលើរថយន្តភ្លាមៗនោះក៏ស្រាប់តែរថយន្តមានការឆាបឆេះយ៉ាងសន្ធោសន្ធៅភ្លាមៗនោះផងដែរ ។ ចំណែកតៃកុង និងអ្នករួមដំណើរខាងលើដោយមានការភិតភ័យពេកបានរត់គេចខ្លួនបាត់ស្រមោល ដោយមិនបានបញ្ជាក់ប្រាប់ថា រថយន្ដខាងលើប្រើប្រាស់ហ្គាស ឬប្រើសាំងនោះឡើយ ។
ក្រោយពេលកើតហេតុ ខណៈពេលរថយន្តឆេះជិតអស់ក៏ឃើញមានរថយន្តពន្លត់អគ្គិភ័យនៃស្នងការរាជធានីភ្នំពេញបានជួយពន្លត់ភ្លាមៗផងដែរ ព្រោះខ្លាចមានមនុស្សនៅក្នុងរថយន្តឆេះខាងលើបន្ទាប់មកដោយមានកម្លាំងនគរបាលចូលទៅពិនិត្យមើលរថយន្តខាងលើ តែមិនមានមនុស្សនោះឡើយ ហើយកម្លាំងនគរបាលចរាចរណ៍ខណ្ឌពោធិ៍សែនជ័យបានប្រគល់អោយជំនាញចរាចរណ៍នៃការិយាល័យចរាចរណ៍ផ្លូវគោករាជធានីភ្នំពេញស្ទួចយកទៅរក្សាទុកភ្លាមៗផងដែរ ៕ កែសម្រួលដោយ ៖សុឃាក់
ចែករំលែកព័តមាននេះ