ខេត្តព្រៃវែង ៖ តាមសេចក្តីរាយការណ៍បឋមបានឱ្យដឹងថា ក្រោយមានជម្លោះក្នុងគ្រួសារ បុរសម្នាក់បានប្រមូលសំលៀកបំពាក់ក្នុងផ្ទះដុត បណ្តាលឱ្យភ្លើងឆេះផ្ទះខ្ទេចអស់មួយខ្នង ហើយបុរសម្នាក់នោះបានចងកសម្លាប់ខ្លួននៅក្នុងបន្ទប់ទឹក បង្កការភ្ញាក់ផ្អើលកាលពីវេលាម៉ោង៦និង៣០នាទីព្រឹកថ្ងៃទី៧ កក្កដា ឆ្នាំ២០១៩ នៅចំណុចភូមិឆ្ពឹស ឃុំថ្មពូន ស្រុកកញ្ជ្រៀច ។
តាមសេចក្តីរាយការណ៍បានឱ្យដឹងថា ផ្ទះមួយខ្នងដែលត្រូវអគ្គីភ័យឆាបឆេះខ្ទេចអស់ខាងលើមានទំហំ៦ម៉ែត្រគុណនឹង១២ម៉ែត្រ សង់អំពីឈើប្រក់ក្បឿង និងបណ្តាលឱ្យរងការខូចខាតដូចជា ទូដាក់សម្លៀកបំពាក់ចំនួន១ ម៉ាស៊ីនត្រជាក់១គ្រឿង ទូរទស្សន៍១គ្រឿង សរុបជាទឹកប្រាក់អស់ចំនួន៣ម៉ឺនដុល្លារ ។
ចំណែកជនរងគ្រោះដែលស្លាប់ឈ្មោះប៉ឹង ភេទប្រុស អាយុ៤៨ឆ្នាំ មានប្រពន្ធឈ្មោះសឿន ឡូត ។ អ្នកទាំង២រស់នៅភូមិឃុំកើតហេតុខាងលើ ។
តាមសេចក្តីរាយការណ៍បានបន្តថា នៅមុនពេលកើតហេតុ កាលពីថ្ងៃទី៤ កក្កដា ប្តីប្រពន្ធទាំង២នាក់នេះបានឈ្លោះគ្នា លុះមកដល់ថ្ងៃកើតហេតុ ស្របពេលប្រពន្ធមិននៅផ្ទះ ស្រាប់តែបុរសជាប្តីបានប្រមូលសំលៀកបំពាក់ក្នុងផ្ទះដុតបណ្តាលឱ្យឆេះផ្ទះខ្ទេចតែម្តង បន្ទាប់មកបុរសជាប្តីបានចងកសម្លាប់ខ្លួនក្នុងបន្ទប់ទឹកផងដែរ ។
ក្នុងហេតុការណ៍អគ្គិភ័យឆាបឆេះផ្ទះមួយខ្នងខាងលើ ត្រូវបានសមត្ថកិច្ចជួយពន្លត់ទាន់ពេលវេលា ដោយប្រើប្រាស់ទឹកអស់ចំនួន៤រថយន្ត ហើយអគ្គីភ័យមិនបានឆ្លងរាលដាលឆេះផ្ទះអ្នកដទៃឡើយ ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕ (កែសម្រួលដោយ ៖ ធីតា)
ចែករំលែកព័តមាននេះ