សន្ទុក ៖ ប្រជាពលរដ្ឋរស់នៅក្នុងស្រុកសន្ទុកប្រមាណជាង១២០០នាក់ក្នុងស្រុកសន្ទុកបានមកទទួលសេវាពិនិត្យ និង ព្យាបាលជំងឺភ្នែក ត្រចៀក ច្រមុះ និង បំពង់ក មិនគិតថ្លៃពីក្រុមគ្រូពេទ្យស្ម័គ្រចិត្តមូលនិធិចក្ខុកម្ពុជា…
សន្ទុក ៖ ប្រជាពលរដ្ឋរស់នៅក្នុងស្រុកសន្ទុកប្រមាណជាង១២០០នាក់ក្នុងស្រុកសន្ទុកបានមកទទួលសេវាពិនិត្យ និង ព្យាបាលជំងឺភ្នែក ត្រចៀក ច្រមុះ និង បំពង់ក មិនគិតថ្លៃពីក្រុមគ្រូពេទ្យស្ម័គ្រចិត្តមូលនិធិចក្ខុកម្ពុជា (H.O.P.E Cambodia) ក្រោមកិច្ចសហការជាមួយក្រុមការងារយុវជនស្ម័គ្រចិត្តធនាគារជាតិនៃកម្ពុជា ដឹកនាំដោយលោកជំទាវ លោក ជា សិរី អគ្គ នាយកបច្ចេកទេសធនាគារជាតិនៃកម្ពុជា និងឧបត្ថម្ភគាំទ្រដោយមូលនិធិរក្សាកុមារ និងអង្គការក្ដីសង្ឃឹមកម្ពុជា។
សកម្មភាពមនុស្សធម៌នេះបានរៀបចំផ្ដល់ការពិនិត្យ និងព្យាបាលជំងឺជូននៅក្នុងបវិវេណវត្ត ជីនិតារាម ស្ថិតនៅឃុំកំពង់ថ្ម ស្រុកសន្ទុក ខេត្តកំពង់ធំ។ ចំពោះអ្នកជំងឺដែលត្រូវមកទទួលសេវានាពេលនេះ អ្នកជំងឺផ្នែកភ្នែកមានជិត៩០០នាក់ ,ជំងឺត្រចៀក, ច្រមុះមានជាង២០០នាក់ និងអ្នកជំងឺធ្មេញមានជិត៣០០
នាក់។
នៅក្នុងសកម្មភាពការពិនិត្យ និងព្យាបាលជំងឺជូនប្រជាពលរដ្ឋនាឱកាសនោះលោកជំទាវ ជា សិរី បានមានប្រសាសន៍ថា ៖ គឺជាសកម្មភាពមនុស្សធម៌ពិតៗដែលជាកិច្ចខិតខំមួយរបស់ក្រុមការងារយុវជនស្ម័គ្រចិត្តធនាគារជាតិនៃកម្ពុជា និងអង្គការដៃគូរដើម្បីលើកកម្ពស់សុខុមាលភាព ជូនប្រជាពលរដ្ឋ។ហើយសកម្មភាពនេះវាក៏ជាផ្នែកមួយសម្រាប់ជួយសម្រួលដល់ការលំបាករបស់ប្រជាពលរដ្ឋក្នុងការស្វែងរកសេវាសុខភាពនោះផងដែរ។
លោកជំទាវនូវបានឲ្យដឹងដែរថា៖ ទឹកចិត្តសប្បុរសធម៌ និងកាយវិការដ៏ល្អប្រពៃរបស់ក្រុមគ្រូពេទ្យស្ម័គ្រចិត្តនាពេលនេះក៏បានបង្ហាញឲ្យឃើញពីការចូលរួមចំណែកអនុវត្តគោលនយោបាយរបស់រាជរដ្ឋាភិបាលកម្ដុជាផងដែរ លើការគិតគូ និងថែទាំចំពោះសុខភាពរបស់ប្រជាពលរដ្ឋដើម្បីឲ្យប្រជាពលរដ្ឋយើងទទួលបានសុខភាពល្អទាំងផ្នែកផ្លូវកាយផង និងផ្នែកផ្លូវចិត្តបានគ្រប់ៗគ្នា។
លោកជំទាវ ជា សិរី បានបញ្ជាក់ដែរថា÷សកម្មភាពមនុស្សធម៌នេះមិនមែនជាលើកទី១ទេ សម្រាប់ទឹកដីស្រុកសន្ទុក។ ជាក់ស្ដែងដូចពេលកន្លងមកនេះ ឯកឧត្ដម ជា ចាន់តូ ប្រធានក្រុមការងារថ្នាក់ជាតិចុះជួយស្រុកសន្ទុក និងលោកជំទាវ ខៀវ ស៊ីណា អនុប្រធានកិត្តិយសសាខាកាកបាទក្រហមកម្ពុជាខេត្តកំពង់ធំបានដឹកនាំគ្រូពេទ្យស្ម័គ្រចុះមកពិនិត្យ និងព្យាបាលជំងឺជូនប្រជាពលរដ្ឋមិនគិតថ្លៃជាបន្តបន្ទាប់ស្រុកសន្ទុកនេះ។
តាមការបញ្ជាក់ពីក្រុមគ្រូពេទ្យស្ម័គ្រចិត្តបានឲ្យដឹងថា៖ ការងារមនុស្សធម៌នៅពេលនេះក្រៅពីផ្ដល់ការពិនិត្យ និង ព្យាបាលនោះក៏មានការបង្ហាត់បង្ហាញពីរបៀបនៃការថែរក្សាការពារទៀតផង។ បើតាមការបញ្ជាក់ពីវេជ្ជបណ្ឌិតជំនាញខាងព្យាលបាលជំងឺ ត្រចៀក ច្រមុះ និង បំពង់ក បានអះអាងថា÷ក្រុមគ្រូពេទ្យទាំងអស់ ពិតជាមានការរីករាយនិងពេញចិត្តណាស់ពេលឃើញមានប្រជាពលរដ្ឋបានមកទទួលយកសេវាពិនិត្យ និងព្យាបាល បើទោះបីជាមានការនឿយហត់ និងត្រូវប្រើពេលប្រើម៉ោងយ៉ាងណាក៏ដោយ គឺត្រូវតែពិនិត្យ និងព្យាលបាលជូនឲ្យបានគ្រប់ៗគ្នាទាំងអស់។
សូមបញ្ជាក់ថា ៖ ប្រជាពលរដ្ឋជាង១២០០នាក់ដែលមកពិនិត្យ និងព្យាលបាលជំងឺនាពេលនឹះក៏ទទួលបានការសម្របសម្រួល និងទទួលបានអាហារសម្រន់ពីក្រុមការងារយុវជនស្ម័គ្រចិត្តរបស់ធនាគារជាតិនៃកម្ពុជាផងដែរ។ ដោយឡែកចំពោះអ្នកជំងឺភ្នែកដែលមានស្ថានភាពធ្ងន់ធ្ងរត្រូវធ្វើការវះនោះក្រុមការងារយុវជនស្ម័គ្រចិត្តសហការជាមួយគ្រូពេទ្យនឹងរៀបចំបញ្ជូននាំទៅធ្វើការវះកាត់នៅរាជធានីភ្នំពេញនៅខែសីហាឆ្នាំ២០១៩ខាងមុខនេះផងដែរ៕ ដោយសហការ (កែសម្រួលដោយ ៖ បុប្ផា)
ចែករំលែកព័តមាននេះ