ខេត្តបន្ទាយមានជ័យ ៖ តាមសេចក្តីរាយការណ៍បឋមបានឲ្យដឹងថា ខ្យល់កន្ត្រាក់ បណ្តាលឲ្យប៉ះពាល់៨ស្រុក -ក្រុង បណ្តាលខូចខាតផ្ទះសំបែងប្រជាពលរដ្ឋ៩៩ខ្នង និងបណ្តាលស្លាប់ម្នាក់ និងរបួសធ្ងន់ម្នាក់ ដែលកើតឡើងនៅវេលាម៉ោង១និង៣០នាទី ថ្ងៃទី០៥ ខែកក្កដានេះ ។
សេចក្តីរាយការណ៍បានបន្តថា ដោយយោងតាមរបាយការណ៍គណៈកម្មាធិការគ្រប់គ្រងគ្រោះមហន្តរាយខេត្តបន្ទាយមានជ័យ គិតត្រឹមម៉ោង៥ល្ងាច ថ្ងៃទី០៥ ខែកក្កដានេះ ខ្យល់កន្ត្រាក់បានប៉ះពាល់៨ស្រុក-ក្រុងហើយខូចខាតផ្ទះសំបែងប្រជាពលរដ្ឋចំនួន៩៩ខ្នង ក្នុងនោះខូចខាតធ្ងន់១៦ខ្នង មានសាលារៀន១ខ្នង ជម្រុកស្រូវ២ខ្នង ប៉ើងស័ង្កសី១,០៧២សន្លឹក ក្បឿង១៥០សន្លឹក ខូចខាតឈើផ្លាន១៨ដើម និងបណ្តាលមនុស្សស្លាប់ម្នាក់ និងរបួសធ្ងន់ម្នាក់ ដោយបាកជើងឆ្វេង ។
ក្នុងចំណោមស្រុក-ក្រុងទាំង៨ ដែលរងគ្រោះដោយខ្យល់កន្ត្រាក់បណ្តាលប៉ះពាល់ និងខូចខាតផ្ទះសំបែងមាន ១-ស្រុកថ្មពួក ប៉ះពាល់២ឃុំ ខូចខាតផ្ទះចំនួន២១ខ្នង ខូចខាតធ្ងន់មាន៧ខ្នង ប៉ើងស័ង្កសីខូច២៤០សន្លឹក មានឃុំគោកកឋិន ប៉ះពាល់ខូចខាត២០ខ្នង ខូចធ្ងន់៦ខ្នង ឃុំគោករមៀតប៉ះពាល់១ខ្នង ខូចខាតធ្ងន់ ។ ២- ស្រុកស្វាយចេកប៉ះពាល់២១ខ្នង មានជម្រុកស្រូវ២ខ្នង ខូចខាតស័ង្កសី៣៥៨សន្លឹក មានឃុំស្លរក្រាមប៉ះពាល់៩ខ្នង ឃុំផ្គាំប៉ះពាល៥ខ្នង ឃុំទ្រាសប៉ះពាល់២ខ្នង ឃុំរលួសប៉ះពាល់០១ខ្នង ឃុំស្វាយចេកប៉ះពាល់១ខ្នង ឃុំតាផូប៉ះពាល់៣ខ្នង ។
៣- ក្រុងប៉ោយប៉ែតប៉ះពាល់៦ខ្នង ខូចខាតស័ង្កសីចំនួន៩០សន្លឹក ប៉ះពាល់សង្កាត់និមិត្តខូចខាត៣ខ្នង សង្កាត់ផ្សារកណ្តាលប៉ះពាល់០៣ខ្នង និងបណ្តាលស្លាប់ម្នាក់ ដោយខ្យល់កន្ត្រាក់បណ្តាលអោយជណ្តើរដែកដែលបញ្ឈរចោល និងសសរផ្ទាំងប៉ាណូស្លាក់យីហោផារ៉ាមិក នៅមុខបរិវេណកាស៊ីណូផ្កាយប្រាំដួលសង្កត់ចំក្បាល បណ្តាលរបួសធ្ងន់បញ្ជូនដល់មន្ទីរពេទ្យដាច់ខ្យល់ស្លាប់ ។ ៤- ស្រុកព្រះនេត្រព្រះប៉ះពាល់ខូចខាត១៣ខ្នង ខូចខាតធ្ងន់៩ខ្នង ខូចខាតស័ង្កសី១៥២សន្លឹក ដែលប៉ះពាល់ឃុំជប់វ៉ារី និងបណ្តាលរបួសស្ត្រីធ្ងន់ ដោយខ្យល់កន្ត្រាក់បានបក់បោក បណ្តាលឲ្យតូបធ្វើអំពីដែកប៉ើងសង្កត់ បណ្តាលឲ្យបាក់ជើងខាងឆ្វេងត្រូវបានសង្គ្រោះបន្ទាន់មន្ទីរពេទ្យមិត្តភាពកម្ពុជា-ជប៉ុនមង្គលបូរី ។
៥- ស្រុកមង្គលបូរីប៉ះពាល់១ខ្នង ប៉ើងស័ង្កសីខូចខាត២៤សន្លឹក នៅឃុំបត់ត្រង់ ។ ៦-ក្រុងសិរីសោភ័ណប៉ះពាល់៩ខ្នង ប៉ើងស័ង្កសី១២៧សន្លឹក បាក់ផ្លាន១៤ដើម មានសង្កាត់កោះពងសត្វ៣ខ្នង សង្កាត់អូរអំបិល២ខ្នង សង្កាត់ទឹកថ្លា១ខ្នង សង្កាត់ព្រះពន្លា១ខ្នង សង្កាត់ម្កាក់១ខ្នង ។ ៧- ស្រុកភ្នំស្រុកប៉ះពាល់ចំនួន២៨ខ្នង ផ្ទះ២៧ខ្នង និងសាលារៀន១ខ្នង ប៉ើងដំបូលខូចខាតស័ង្កសី៦១សន្លឹក បាក់ថ្លាន៤ដើម ។ ៨- ស្រុកអូរជ្រៅប៉ះពាល់១ខ្នង ប៉ើងស័ង្កសី២០សន្លឹក នៅឃុំអូរបីជាន់ ។
លោក អ៊ុ រាត្រី អភិបាលខេត្តបន្ទាយមានជ័យបានបញ្ជាក់ថា ក្រោយពេលដែលខ្យល់កន្ត្រាក់បណ្តាលប៉ះពាល់ផ្ទះសំបែងប្រជាពលរដ្ឋ និងសាលារៀន បណ្តាលខូចខាតអស់៩៩ខ្នង ធ្ងន់១៦ខ្នង បណ្តាលស្លាប់បុរសកម្មករសំណង់ម្នាក់ ក្រុងប៉ោយប៉ែតដែលជណ្តើរដែកដួលសង្កត់បណ្តាល របួសធ្ងន់រហូតដល់ស្លាប់ម្នាក់ និងរបួសធ្ងន់ស្ត្រីម្នាក់ផ្ទះបាក់សង្កត់ បណ្តាលឲ្យបាក់ជើងឆ្វេង ហើយត្រូវបានចុះសួរសុខទុក និងនាំយកថវិការចូលរួមរំលែកទុកដល់គ្រួសារសពនិងជួយដល់ជនរងគ្រោះបណ្តាលរបួសធ្ងន់ ។
លោកបានបញ្ជាក់ថា៖ នេះជាការណែនាំខ្ពស់ចំពោះឯកឧត្តមនាយឧត្តមសេនីយ៍ កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងជាប្រធានក្រុមថ្នាក់ជាតិចុះជួយមូលដ្ឋានខេត្តបន្ទាយមានជ័យ ដែលកងកម្លាំងប្រដាប់អាវុធទាំងបីស្ថាប័នកំពុងចុះជួយអន្តរាគមន៍ជួយដល់ប្រជាពលរដ្ឋដែលកំពុងរងគ្រោះដោយខ្យល់កន្ត្រាក់ទាំង៨ស្រុក-ក្រុងក្នុងខេត្តបន្ទាយមានជ័យ ៕ កែសម្រួលដោយ ៖សុឃាក់
ចែករំលែកព័តមាននេះ