កម្ពុជាទទួលយករបាយការណ៍ UPR ១៧៣ តែច្រានចោល២៥
- ភ្នំពេញ
រាជធានីភ្នំពេញ ៖ កម្ពុជាបានទទួលយកសំណើររបស់ (UPR) ការត្រួតពិនិត្យជាសកលតាមកាលកំណត់ចំនួន១៧៣ចំណុច តែច្រានចោល២៥ចំណុចក្នុងចំណោមរបាយការណ៍១៩៨ចំណុច ។ លោក ជិន ម៉ាលីន…
រាជធានីភ្នំពេញ ៖ កម្ពុជាបានទទួលយកសំណើររបស់ (UPR) ការត្រួតពិនិត្យជាសកលតាមកាលកំណត់ចំនួន១៧៣ចំណុច តែច្រានចោល២៥ចំណុចក្នុងចំណោមរបាយការណ៍១៩៨ចំណុច ។ លោក ជិន ម៉ាលីន…
រាជធានីភ្នំពេញ ៖ កម្ពុជាបានទទួលយកសំណើររបស់ (UPR) ការត្រួតពិនិត្យជាសកលតាមកាលកំណត់ចំនួន១៧៣ចំណុច តែច្រានចោល២៥ចំណុចក្នុងចំណោមរបាយការណ៍១៩៨ចំណុច ។
លោក ជិន ម៉ាលីន អនុប្រធានគណៈកម្មាធិការសិទ្ធិមនុស្សកម្ពុជានឹងជាភាគីតំណាងកម្ពុជាបានឲ្យដឹងពីលទ្ធផលនៃកិច្ចប្រជុំទៀងទាត់លើកទី៤១ នៃក្រុមប្រឹក្សាសិទ្ធិមនុស្សអង្គការសហប្រជាជាតិ ស្តីពីការអនុម័តរបាយការណ៍ UPR ជុំទី៣ សម្រាប់កម្ពុជា នៅទីក្រុងហ្សឺណែវ ប្រទេសស្វីស កាលថ្ងៃទី៥ ខែកក្កដា ឆ្នាំ២០១៩ថា ក្នុងកិច្ចប្រជុំលើកទី៤១ នៃក្រុមប្រឹក្សាសិទ្ធិមនុស្សរបស់អង្គការសហប្រជាជាតិ តំណាងកម្ពុជា រូបលោកបានធ្វើសេចក្តីថ្លែងការពីវឌ្ឍនភាពនៃស្ថានភាពសិទ្ធិមនុស្សនៅកម្ពុជា និងប្រកាសជាផ្លូវការក្នុងការទទួលយកមកអនុវត្តអនុសាសន៍ UPR (ការត្រួតពិនិត្យជាសកលតាមកាលកំណត់) ចំនួន១៧៣ និងកត់សម្គាល់ចំនួន២៥ ក្នុងចំណោមអនុសាសន៍សរុបចំនួន១៩៨ ដែលផ្តល់ដោយរដ្ឋសមាជិកចំនួន៧៣ ។
តំណាងកម្ពុជាក៏បានថ្លែងបញ្ជាក់ «នៅក្នុងកិច្ចប្រជុំនោះផងដែរ អំពីមូលហេតុនៃការទទួលយកអនុសាសន៍ទាំង១៧៣ និងមូលហេតុនៃការកត់សម្គាល់អនុសាសន៍ទាំង២៥ ព្រមទាំងយន្តការនៃការដាក់ឱ្យអនុវត្ត និងតាមដានត្រួតពិនិត្យការអនុវត្តអនុសាសន៍ដែលទទួលយកទាំងអស់នោះក្នុងការការពារ និងលើកស្ទួយសិទ្ធិសេរីភាពរបស់ប្រជាពលរដ្ឋឱ្យកាន់តែប្រសើរឡើង ។
លោកបន្ថែមថា ការទទួលយកអនុសាសន៍ដែលមានចំនួនច្រើនរហូតដល់១៧៣នេះ គឺដោយហេតុថា អនុសាសន៍ទាំងនោះស្របទៅនឹងឆន្ទៈក៏ដូចជា គោលនយោបាយ និងកម្មវិធីកំណែទម្រង់របស់រាជរដ្ឋាភិបាលលើគ្រប់វិស័យក្នុងការការពារ និងលើកស្ទួយសិទ្ធិសេរីភាពរបស់ពលរដ្ឋ ។ ចំណែកឯអនុសាសន៍ទាំង២៥ ដែលត្រូវធ្វើការកត់សម្គាល់វិញ គឺដោយហេតុថា អនុសាសន៍ទាំងនោះមិនបានឆ្លុះបញ្ចាំងពីកិច្ចខិតខំប្រឹងប្រែងរបស់រាជរដ្ឋាភិបាល និងឆ្លើយតបទៅនឹងស្ថានភាពពិតជាក់ស្តែងនៃការអនុវត្តសិទ្ធិសេរីភាពនៅកម្ពុជាឡើយ ហើយជាពិសេសអនុសាសន៍ទាំងនោះមិនអាចអនុវត្តបានដោយផ្ទុយទៅនឹងក្របខ័ណ្ឌច្បាប់ រួមមានរដ្ឋធម្មនុញ្ញ និងបទដ្ឋានគតិយុត្តផ្សេងៗទៀត ដែលមានជាធរមាននៅកម្ពុជា ហើយត្រូវបានលើកឡើងក្រោមរូបភាព និងរបៀបវារៈនយោបាយ ជាជាងទិដ្ឋភាពបច្ចេកទេស និងគោលការណ៍គ្រឹះនៃការអនុវត្តសិទ្ធិនិងសេរីភាពក្នុងសង្គមប្រជាធិបតេយ្យ ។
បន្ទាប់ពីការអនុម័តជាផ្លូវការនូវរបាយការណ៍ UPR ជុំទី៣ សម្រាប់កម្ពុជាក្នុងកិច្ចប្រជុំនេះរួច គណៈកម្មាធិការសិទ្ធិមនុស្សកម្ពុជា នឹងធ្វើការបែងចែកអនុសាសន៍ដែលទទួលយកទាំងអស់នេះ ជូនទៅគ្រប់ស្ថាប័នរដ្ឋដែលពាក់ព័ន្ធដើម្បីអនុវត្ត និងតាមដានត្រួតពិនិត្យការអនុវត្តរបស់ស្ថាប័នទាំងនោះ ដើម្បីរាយការណ៍ជូនទៅក្រុមប្រឹក្សាសិទ្ធិមនុស្សអង្គការសហប្រជាជាតិវិញ អំពីវឌ្ឍនភាពនៃការអនុវត្ត នាសម័យប្រជុំត្រួតពិនិត្យលើកទី៤ នៅ៤ឆ្នាំក្រោយ ។
លោកថា គណៈកម្មាធិការសិទ្ធិមនុស្សកម្ពុជាក៏នឹងរៀបចំសិក្ខាសាលាថ្នាក់ជាតិមួយផងដែរ ក្នុងពេលឆាប់ៗខាងមុខនេះ ដើម្បីធ្វើការផ្សព្វផ្សាយ ពិភាក្សា និងពិគ្រោះយោបល់ អំពីយន្តការនៃការអនុវត្តអនុសាសន៍ដែលទទួលយកជាមួយគ្រប់ភាគីពាក់ព័ន្ធទាំងអស់រួមមានតំណាងរដ្ឋាភិបាលដៃគូអភិវឌ្ឍន៍ និងអង្គការសង្គមស៊ីវីលជាតិ និងអន្តរជាតិ ។
ពាក់ព័ន្ធនឹងរបាយការណ៍នេះដែរ អង្គការសិទ្ធិមនុស្ស Human Rights Watch ដែលមានមូលដ្ឋានក្នុងប្រទេសអាមេរិកបាននិយាយថា រដ្ឋាភិបាលកម្ពុជាបដិសេធមិនទទួលយកចំណុចសំខាន់ៗដែលក្រុមប្រឹក្សាសិទ្ធិមនុស្សរបស់អង្គការសហប្រជាជាតិបានស្នើឡើងទាក់ទងនឹងសិទ្ធិជនស៊ីវិល និងសិទ្ធិនយោបាយនោះទេ តែបានទទួលយកអនុសាសន៍ចំនួន១៧៣ ពីយន្តការពិនិត្យជាសកលតាមកាលកំណត់ (UPR) ។
អង្គការនេះបានបញ្ជាក់ថា៖«រាជរដ្ឋាភិបាលកម្ពុជាត្រូវតែផ្លាស់ប្តូរគំនិត ហើយទទួលយកអនុសាសន៍ពីយន្តការពិនិត្យជាសកលតាមកាលកំណត់ (UPR) ទាក់ទងនឹងសិទ្ធិពលរដ្ឋ និងសិទ្ធិនយោបាយ រួមទាំងទម្លាក់ចោលបទចោទព្រហ្មទណ្ឌដែលមានចរិកនយោបាយទាំងអស់ ដោះលែងអ្នកទោសនយោបាយ និងកែប្រែច្បាប់កៀបសង្កត់ ដែលរិតត្បិតសិទ្ធិជាមូលដ្ឋាន ។ ក្រុមប្រឹក្សាសិទ្ធិមនុស្សត្រូវតែចាត់វិធានការ បើរដ្ឋាភិបាលខកខានមិនធ្វើការកែប្រែ» ។
បើតាមការអះអាងរបស់អង្គការ Human Rights Watch បានឲ្យដឹងថា ខ្លួនគ្មានការភ្ញាក់ផ្អើលទេ ចំពោះរដ្ឋាភិបាលកម្ពុជា ដែលអង្គការនេះបានចោទប្រកាន់ថា វាយប្រហារលើប្រព័ន្ធផ្សព្វផ្សាយ អង្គការសង្គមស៊ីវិល ក្រុមអ្នកនយោបាយជំទាស់ និងសំឡេងជំទាស់នានា តាមអ្វីដែលអង្គការសិទ្ធិមនុស្សនេះបានបញ្ជាក់ថា «ដើម្បីប្រើជាលេសក្នុងការរំលោភសិទ្ធិសេរីភាពនានា រដ្ឋាភិបាលបានអះអាងថា អង្គការនីតិប្រតិបត្តិ មិនអាចជ្រៀតជ្រែកក្នុងកិច្ចការចៅក្រម និងព្រះរាជអាជ្ញាបានទេ» ៕ កែសម្រួលដោយ ៖សុឃាក់
ចែករំលែកព័តមាននេះ