ខេត្តបាត់ដំបង ៖ មហាជនស្ទើរគ្រប់មជ្ឈដ្ឋាននៅក្នុងក្រុងបាត់ដំបង កំពុងមានការសង្ស័យទៅលើមន្ទ្រីមូលដ្ឋាន និងកម្លាំងសមត្ថកិច្ចខិលខូចមួយចំនួនថា បាននិងកំពុងព្យាយាមជួយបិទបាំងនូវទីតាំងភ្នាល់ល្បែងស៊ីសងខុសច្បាប់ចំនួន២កន្លែង ដែលបើកដំណើរការយ៉ាងលូនច្រើនឆ្នាំកន្លងមកហើយ មិនធ្លាប់ត្រូវបានសមត្ថកិច្ចចុះទៅបង្អើលម្ដងណាសោះ ។ មិនតែប៉ុណ្ណោះទីតាំង១ ក្នុងចំណោមទីតាំងទាំង២នាក់នេះ អ្នកប្រព្រឹត្តល្បែងអាវ៉ាសែទាំងនោះ ត្រូវគេរាយការណ៍ថា សមាសភាពអ្នកញៀននឹងល្បែងទាំងនោះសុទ្ធសឹង តែជាមន្ត្រីរាជការ ដែលជិះរថយន្តស៊េរីទំនើបៗពាក់ស្លាកលេខអង្គភាពរដ្ឋស្ទើរគ្រប់ស្ថាប័នទៅចតនៅក្នុងទីតាំងល្បែងនោះទៀតផង។
ប្រភពឱ្យដឹងថា ទីតាំងទី១-នៅខាងក្រោយ«វត្តកណ្ដឹង» ដែលស្ថិតក្នុងភូមិកម្មករ សង្កាត់វត្តគរ ក្រុងបាត់ ដំបង ដែលមានបុរសម្នាក់ឈ្មោះចិត្រ ជាអ្នកគ្រប់គ្រង។ បនល្បែងមួយនេះ មានភ្នាល់ល្បែងកីឡា និងល្បែងបញ្ជល់មាន់តាម«អនឡាញ» ជ្រកក្រោមស្លាកហាងកាហ្វេ ដែលមានមនុស្សច្រើនកកកុញក្នុងមួយថ្ងៃៗទៅភ្នាល់ល្បែង និងរថយន្តម៉ូតូចតត្រៀមត្រានៅទីនោះ ដោយគ្មានរំខានដល់អាជ្ញាធរដែនដី ឬ សមត្ថកិច្ចក្នុងអង្គភាពណាមួយឡើយ។ បើតាមប្រភពព័ត៌មានថា ទីតាំងរបស់លោកចិត្រនេះ មានមន្ត្រីនគរបាលខិលខូចមួយចំនួនចាំការពារយ៉ាងរឹងម៉ាំទៀតផង។
ដោយឡែក ទីតាំងទី២-ដែលគេមើលឃើញច្បាស់ក្រឡែតថា មានរថយន្តស៊េរីទំនើបៗ ពាក់សុទ្ធតែស្លាកលេខ « រដ្ឋ, នប, ខម » ផងនោះ គឺមានទីតាំងនៅខាងលិចផ្លូវរថភ្លើង ស្ថិតក្នុងភូមិអូរតាគាំ១ សង្កាត់ទូលតាឯក ក្រុងបាត់ដំបង ដែលទីតាំងនេះជក្រក្រោមស្លាក«ស្នូរឃ័រ»។
ប្រភពពីអ្នកធ្លាប់ចូលលេងល្បែងនៅទីនោះ និងមន្ត្រីមួយចំនួនផង បានខ្សិបប្រាប់ថា នៅទីនោះមាន«ស្នូរឃ័រ» លេងនៅខាងមុខ រីឯល្បែងបៀរល្បែងក្ដាមឃ្លោកលេងតាម«អនឡាញ» ឬ ល្បែងភ្នាល់ដទៃទៀត គេប្រមូលផ្ដុំគ្នាលេងនៅអគារខាងក្រោយ។ ប្រភពដដែលបានបញ្ជាក់ថា អ្នកលេងល្បែងនៅទីនោះមានភាពកក់ក្ដៅខ្លាំងណាស់ បើទោះជាចាញ់ឈ្នះរាប់លានរៀលក៏គ្មានបញ្ហា ហើយក៏រំខានពីសមត្ថកិច្ចនៅអង្គភាពណាដែរ ព្រោះអ្នកដែលញៀននឹងល្បែងនៅទីនោះស្ទើរ៩០% សុទ្ធសឹងជាមន្ត្រីរាជការដែលមានសមាសភាពមកពីគ្រប់ស្ថាប័នរដ្ឋនៅក្នុងខេត្តបាត់ដំបង។
ដូច្នេះហើយទើបគ្មានអាជ្ញាធរឬសមត្ថកិច្ចណាហ៊ានចូលទៅក្បែរ។ គេមិនទាន់ដឹងថា តើលោកអភិបាលខេត្ត ឬ លោកស្នងការខេត្ត ឬ លោកមេបញ្ជាការកងរាជអាវុធហត្ថខេត្ត បានជ្រាបអំពីទីតាំងល្បែងដែលពពាក់ពពូនទៅដោយមន្ត្រីរាជការនេះដែរឬយ៉ាងណានោះទេ បានជាមិនដែលមានផែនការណ៏ចុះទប់ស្កាត់ឬចុះបង្ក្រាបម្ដងណាសោះ ?។
ដោយសារតែការពពាក់ពពូនរបស់មន្ត្រីរាជការប្រមូលផ្ដុំគ្នាប្រព្រឹត្តល្បែងស៊ីសងខាងលើនេះហើយ ទើបកន្លងមកនេះ មានប្រជាពលរដ្ឋ រួមទាំងមន្ត្រីមួយចំនួនផង បានធ្វើការរិះគន់ជាបន្តបន្ទាប់អំពីសកម្មភាពក្រុមមន្ត្រីញៀនល្បែងស៊ីសង ដែលមិនបានធ្វើជាគំរូល្អដល់ពលរដ្ឋ និងការមិនអើពើរបស់ថ្នាក់ដឹកនាំ ដែលផ្ទុយពីការប្រឹងប្រែងណែនាំរបស់រាជរដ្ឋាភិបាល ក្នុងការអនុវត្តឲ្យបានជោគជ័យនូវគោលនយោបាយ
«ភូមិឃុំមានសុវត្ថិភាព» ដែលជាគោលនយោបាយដ៏ចម្បងរបស់ក្រសួងមហាផ្ទៃ ក៏ដូចជារាជដ្ឋាភិបាលកម្ពុជា ហើយបើថ្នាក់ដឹកនាំតាមបណ្ដាខេត្តមិនព្រមយកចិត្តទុកដាក់បែបនេះ គោលនយោបាយ«ភូមិឃុំមានសុវត្ថិភាព» នេះនឹងមិនអាចទទូលបានជោគជ័យឡើយ ៕ (សម្រួលដោយ៖ ស្រីណា)
ចែករំលែកព័តមាននេះ