រាជធានីភ្នំពេញ ៖ ស្បែកស្ងួតមិនមែនត្រឹមតែធ្វើឱ្យអ្នកបាត់បង់ការទាក់ទាញចំណាប់អារម្មណ៍ពីអ្នកដទៃប៉ុណ្ណោះទេ វាថែមទាំងងាយនឹងបង្កឱ្យមានបញ្ហាទៀតផង ដូចជារបួស និងប្រេះស្បែកជាដើម នៅគ្រប់កន្លែងលើរាងកាយរបស់អ្នក ដែលបញ្ហានេះអាចបង្កឡើងដោយការកង្វះជាតិទឹក ឬខ្យល់ស្ងួតដែលច្រើនកើតមានក្នុងរដូវត្រជាក់ ឬក៏អាលែហ្ស៊ីជាដើម ។
ជាមួយគ្នានេះ លោកវេជ្ជបណ្ឌិត ស្រេង រាសី ឯកទេសផ្នែកជំងឺសើស្បែកនៃគ្លីនិកស្បែក និងសម្ផស្ស ស្រេង រាសី បានប្រាប់កោះសន្ដិភាពថា ស្បែកស្ងួតគឺជាប្រភេទស្បែកមិនសូវមានជាតិទឹក ធ្វើឱ្យស្បែកតឹង និងពេលខ្លះអាចបែកស្រកាថែមទៀត ។ មូលហេតុដែលធ្វើឱ្យស្បែកស្ងួតបណ្ដាលមកពីបញ្ហាមួយចំនួនដូចខាងក្រោម ៖
១-អាចទាក់ទងទៅនឹងហ៊្សែន នៅពេលកើតមកគឺមានស្បែកស្ងួតតាំងពីកំណើត ។
២-អាចបណ្ដាលមកពីលោកអ្នកកើតជំងឺសើស្បែកដូចជារលាកស្បែក ឬអាលែហ្ស៊ីជាដើម ។ ក្នុងករណីនេះ លោកអ្នកគួរមកពិភាក្សាជាមួយគ្រូពេទ្យជំនាញស្បែកទើបជាការប្រសើរ។
៣-ការប្រើប្រាស់ផលិតផលមួយចំនួនដែលមានសារធាតុកាត់ខ្លាំង កាលណាលោកអ្នកលាងសម្អាតញឹកញាប់ពេកក៏អាចធ្វើឱ្យស្បែកស្ងួតបាន ដូច្នេះគួរជ្រើសរើសប្រើប្រាស់ផលិតផលដែលផ្ដល់សំណើមដល់ស្បែក ដើម្បីជាការជំនួយ ។
ពិតណាស់ កាលណាលោកអ្នកមានស្បែកស្ងួតខ្លាំង គឺអាចប្រឈមនឹងបញ្ហាមួយចំនួនដូចជា ៖ ស្បែកងាយនឹងមានរបួស រលាក ប្រេះ ឬបែកស្រកាមើលទៅវាមិនមានភាពស្រស់ស្អាត និងទាក់ទាញពីអ្នកដទៃទេ ។ ដោយសារស្បែកស្ងួតវាអាចបង្កឡើងដោយសារមូលហេតុខុសៗគ្នាជាច្រើន ដូច្នេះមានវិធីសាស្រ្ដជាច្រើនដែលអាចដោះស្រាយបញ្ហាស្បែកស្ងួតរបស់លោកអ្នក ៖
១-ចូរប្រើផលិតផលដែលមានសារធាតុសំណើម និងមានការណែនាំពីអ្នកឯកទេសស្បែក។
២-ចំពោះលោកអ្នកដែលមានស្បែកស្ងួត គួរតែប្រើឡេការពារកម្ដៅថ្ងៃ និងផ្ដល់សំណើមដល់ស្បែក ព្រោះស្បែកស្ងួតងាយនឹងមានបញ្ហានៅពេលត្រូវពន្លឺព្រះអាទិត្យ ។
៣-លោកអ្នកគួរតែពិសាទឹកឱ្យបានគ្រប់គ្រាន់តាមដែលអាចធ្វើទៅបាន ព្រោះទឹកមិនត្រឹមតែជួយកុំឱ្យស្បែកវិវឌ្ឍន៍ទៅរកភាពស្ងួតប៉ុណ្ណោះទេ វាថែមទាំងជួយបង្គ្រប់ជាតិទឹកនៅក្នុងខ្លួនឱ្យបានល្អថែមទៀតផង ។
៤-តាមធម្មតាការទទួលទានផ្លែឈើជាការល្អបំផុតសម្រាប់សុខភាព ។ លើសពីនេះ ផ្លែឈើក៏មានសារប្រយោជន៍ជាច្រើនផងដែរ អាចជួយចិញ្ចឹមកោសិកាស្បែកឱ្យលូតលាស់បានយ៉ាងល្អ៕
ចែករំលែកព័តមាននេះ