អ្នកស្រាវជ្រាវអាមេរិកបានរកឃើញថា បុគ្គលដែលប្រើប្រាស់ថ្នាំបញ្ចុះកំដៅនិងបំបាត់ការឈឺចុកចាប់Paracetamolជាប្រចាំអាចបណ្តាលឱ្យជួបហានិភ័យខ្ពស់ពីជំងឺមហារីកឈាម ។
មានផលប៉ះពាល់ទៅលើសុខភាពបែបនេះ ក៏ព្រោះParacetamolផ្ទុកសារធាតុគីមីឈ្មោះ Acetaminophenដែលអ្នកស្រាវជ្រាវអះអាងថាធ្វើឱ្យអ្នកប្រើប្រាស់មួយចំនួនប្រឈមនឹងជំងឺមហារីក ។ លទ្ធផលនេះបានបន្ថែមនូវភស្តុតាងដ៏ស្មុគស្មាញមួយផ្សេងទៀតរវាងជំងឺមហារីកនិងថ្នាំបំបាត់ការឈឺចុកចាប់ Paracetamol។ លើសពីនេះ វាក៏បានប្រាប់ឱ្យយើងដឹងផងដែរថាសារធាតុគីមីឈ្មោះAcetaminophen អាចនឹងបង្កឱ្យមានបញ្ហាសុខភាពច្រើនជាងនេះខណៈការសិក្សាស្រាវជ្រាវមួយផ្សេងទៀតបានភ្ជាប់សារធាតុគីមីនេះទៅនឹងជំងឺហឺតនិងជំងឺតាអក ។ Paracetamolជាថ្នាំបំបាត់ការឈឺចុកចាប់ដែលប្រជាជនទូទៅក្នុងពិភពលោកស្គាល់ច្បាស់និងនិយមប្រើជាងគេ ។ ថ្នាំនេះកបនឹងជំងឺឈឺក្បាល ក្តៅខ្លួន គ្រុនក្តៅ ការឈឺចុកចាប់(កម្រិតស្រាល) និងគ្រុនផ្តាសាយជាដើម ។
សមាជិកក្រុមអ្នកស្រាវជ្រាវ វេជ្ជបណ្ឌិត Emily White មកពីមជ្ឈមណ្ឌលជំងឺមហារីកFred Hutchinsonនៅក្រុង Seattle រដ្ឋវ៉ាស៊ីនតោន សហរដ្ឋអាមេរិកបានបញ្ជាក់ថា ៖«មានការលើកឡើងដែលថាសារធាតុគីមីឈ្មោះAcetaminophen បង្កើនហានិភ័យកើតមានជំងឺមហារីកផ្សេងៗ ។ ទោះជាដូច្នេះក្តី ការលើកឡើងទាំងនោះគឺផ្អែកលើមូលដ្ឋានទិន្នន័យពីអ្នកកើតជំងឺមហារីកឈាមម្នាក់ៗប៉ុណ្ណោះ ។ យើងនឹងធ្វើការសិក្សាបន្តទៀត »។ ប៉ុន្តែលោកស្រីវេជ្ជបណ្ឌិតបានព្រមានថា មកដល់ពេលនេះមិនទាន់មានភស្តុតាងច្បាស់លាស់ណាមួយនិងគួរឱ្យជឿជាក់អះអាងថា Acetaminophen បង្កឱ្យកើតជំងឺមហារីកនោះទេ ។
ទោះជាយ៉ាងនេះក្តី ការរកឃើញលើកនេះគឺជាការបញ្ជូនសញ្ញាសុខភាពមួយទៅកាន់អ្នកប្រើប្រាស់នៅទូទាំងពិភពលោកដែលបានកំពុងតែប្រើប្រាស់ថ្នាំ Paracetamol ដោយគ្មានការពិគ្រោះយោបល់ឬវេជ្ជបញ្ជាត្រឹមត្រូវពីគ្រូពេទ្យ ៕
ចែករំលែកព័តមាននេះ