រាជធានីភ្នំពេញ ៖ ជីវិតធ្លាប់តែអាប់អួររស់នៅប្រឈមភាពខ្វះខាត ពេលខ្លះស្ទើរតែអស់សង្ឃឹមមិនដឹងទៅច្រកណា ប៉ុន្តែការតស៊ូបានធ្វើឱ្យនាងអាចចេញពីភាពខ្មៅងងឹត ហើយបង្កើតអនាគតភ្លឺស្វាងមួយក្នុងនាមជាអ្នកជំនួញ។ នៅចង្កោមសិល្បៈ អ្នកណាក៏ស្គាល់អ្នកនាង ឆិល ពេជ្រពណ្ណរាយ…
រាជធានីភ្នំពេញ ៖ ជីវិតធ្លាប់តែអាប់អួររស់នៅប្រឈមភាពខ្វះខាត ពេលខ្លះស្ទើរតែអស់សង្ឃឹមមិនដឹងទៅច្រកណា ប៉ុន្តែការតស៊ូបានធ្វើឱ្យនាងអាចចេញពីភាពខ្មៅងងឹត ហើយបង្កើតអនាគតភ្លឺស្វាងមួយក្នុងនាមជាអ្នកជំនួញ។
នៅចង្កោមសិល្បៈ អ្នកណាក៏ស្គាល់អ្នកនាង ឆិល ពេជ្រពណ្ណរាយ ដែលតស៊ូធ្វើជាតារារាំគ្រប់ប៉ុស្តិ៍តាំងពីវ័យជំទង់ រហូតដល់មានប្តីមានកូនហើយនោះ នៅតែមិនចោលតួនាទី។សព្វថ្ងៃពណ្ណរាយ ហៅស្រីពេជ្រ ក្លាយជាម្ចាស់ក្រុមហ៊ុនផ្ទាល់ខ្លួនដែលផ្តោតលើផលិតផលស្បែកមុខ ដោយនាងបានតាំងចិត្តមុតមាំពេលនៅរាំថា នឹងធ្វើខ្លួនឲ្យក្លាយជាស្ត្រីរឹងមាំ ខ្លាំងពូកែលើមុខជំនួញថ្ងៃណាមួយ។
តារារាំដែលតស៊ូមិនធម្មតាពីជីវិតធ្លាប់អត់ រហូតមានផ្ទះផ្ទាល់ខ្លួនក្នុងបុរីទៀតនោះ បានថ្លែងថា ក្បែរ២០ឆ្នាំហើយនៅលើវិថីរាំកំដរឆាកតាមទូរទស្សន៍ ស្គាល់រសជាតិច្រើនតាំងពីគេមើលស្រាលមិនឱ្យតម្លៃ ដោយមិនដឹងថា អ្នករាំក៏ជាគ្រឿងលម្អសំខាន់មួយជួយឱ្យឆាករស់រវើក តារាចម្រៀងលេចធ្លោ។ ទោះយ៉ាងណា ឱ្យតែមានការងារធ្វើបានលុយចិញ្ចឹមអ្នកផ្ទះនាងមិនសូវខ្វល់ទេ ជីវិតត្រូវស៊ូ ហើយនាងមិនចេះចុះចាញ់ឧបសគ្គឡើយ។
ស្រីពេជ្រ ឬពណ្ណរាយ ដែលមានម្តាយពិការបានឱ្យដឹងថា ចាប់តាំងពីពុកនាងខូច ម្តាយនាងកើតជំងឺបាក់ទឹកចិត្តលក់ផ្ទះ លក់សម្បែងអស់ រត់ទៅនៅផ្ទះជួល រហូតរកលុយបង់ផ្ទះមិនបាន គេដេញអត់កន្លែងនៅ ក៏សម្រេចសុំវត្តថ្វាយបង្គំស្នាក់នៅមួយគ្រា។ នាងជាកូនច្បងនេះហើយខាំមាត់ សង្កត់ចិត្តលើកដៃរំលឹកគុណឪពុកឲ្យតាមជួយកូនចៅរស់នៅរកស៊ីថ្កុំថ្កើង ខំតស៊ូរហូតចេះតែជួបអ្វីល្អៗ គេឱ្យការងារធ្វើបានប្រាក់បន្តបន្ទាប់។
សព្វថ្ងៃនាងនៅបន្តសិល្បៈ ហើយក្រុមរាំនាងជាប្រធានដោយមានសមាជិក២០នាក់ ក្រៅពីរាំប្រចាំទូរទស្សន៍បាយ័ន និងអាស៊ីអាគ្នេយ៍ ក្រុមនាងបានថៅកែណាហ្គា យកទៅធ្វើការរាំជាប្រចាំ ដោយសារមានក្បាច់រាំល្អ និងអត់ធ្មត់ការងារ។ ចំពោះមុខរបរដែលនាងបង្កើតឡើងនេះគឺខំសន្សំយូរមកហើយតាំងពីនៅរាំ រហូតមានគ្រួសារ ដោយនាងមានក្តីស្រម៉ៃចង់ក្លាយជាអ្នករកស៊ីឆ្នើម ឥឡូវបានសម្រេច។
នាងបានបោះទុន១០ម៉ឺនដុល្លារលើមុខជំនួញផ្ទាល់ខ្លួនបើកក្រុមហ៊ុន «ល្អពិតពេជ្រចរណៃ ខូអិលធីឌី» ដែលនាំចូលផលិតផលពីប្រទេសថៃ ទើបតែធ្វើពិធីសម្ពោធប្រើប្រាស់ជាផ្លូវការកាលពីល្ងាចថ្ងៃទី៤ ខែកក្កដា ឆ្នាំ២០១៩ នាសណ្ឋាគារណាហ្គាវើលមុននេះ។ បើនិយាយពីជីវិតស្នេហា នាងបានរៀបការ និងមានកូនស្រីម្នាក់ ព្រោះតែចរិតនាងតស៊ូខំបែបនេះហើយ ទើបបានដល់ខាងម្តាយក្មេក ឪពុកក្មេកជាអ្នករកស៊ីចំតែម្តង តែពួកគាត់ពេញចិត្ត និងស្រឡាញ់។ (កែសម្រួលដោយ ៖ បុប្ផា)
ចែករំលែកព័តមាននេះ