ខេត្តសៀមរាប ៖ នាថ្ងៃទី០៤ ខែកក្កដា ឆ្នាំ២០១៩ នៅសាលប្រជុំសាលាខេត្តសៀមរាបមានបើកសិក្ខាសាលាស្ដីពី ការតម្រង់ទិសគម្រោងលើកកម្ពស់ជីវភាពប្រជាជនក្រីក្រ និងការប្រើប្រាស់សៀវភៅណែនាំស្ដីពីការ អនុវត្តគម្រោង សៀវភៅប្រតិបត្តិការសហគមន៍ របស់គម្រោងលើកកម្ពស់ជីវភាពប្រជាជនក្រីក្រ ហៅកាត់ថា (គម្រោងលាភ) ក្រោមអធិបតីភាពរបស់លោក ងី ច័ន្ទ្រផល រដ្ឋលេខាធិការក្រសួងមហាផ្ទៃ និង ជាប្រធានសម្របសម្រួលគម្រោងនិងជាប្រធានគណៈកម្មាធិការតម្រង់ទិសអនុវត្តគម្រោងលាភ និង មានការចូលរួមពីសំណាក់លោកអភិបាលរងខេត្ត លោកនាករដ្ឋបាលខេត្ត អភិបាល អភិបាលរងក្រុង ស្រុក តំណាងធនាគារពិភពលោក មន្ត្រីគម្រោងមកពីរាជធានីភ្នំពេញលោកមេឃុំ ចៅសង្កាត់ និង អ្នកពាក់ព័ន្ធ សរុបចំនួន ២៥០នាក់ ដែលបានចូលរួម ។
គម្រោងលើកកម្ពស់ជីវភាពភាពប្រជាជានក្រីក្រ (លាភ) គម្រោងនេះគាំទ្រដោយធនាគារពិភពលោក (World Bank) និងក្រសួងសេដ្ឋកិច្ច និងហិរញ្ញវត្ថុ បានឯកភាពដាក់បញ្ចូលឡើងវិញក្នុងបញ្ជីមុខសញ្ញាគម្រោងហិរញ្ញប្បទានសម្រាប់អនុវត្តរយៈពេល៥ឆ្នាំ (២០១៧ -២០២២)សម្រាប់ ០២ រាជធានី ខេត្ត គឺរាជធានីភ្នំពេញ និងខេត្តសៀមរាប។
លោក ពៅ ពិសិដ្ឋ អភិបាលរងខេត្ត ក៏បានធ្វើការបញ្ជាក់ ពីគោលបំណងនៃគម្រោងនេះ គឺលើកកម្ពស់ជីវភាពប្រជាជនក្រីក្រ និងក្រុមងាយរងគ្រោះ ដើម្បីទទួលបានសេវាហិរញ្ញវត្ថុ ហើយមានឱកាសរកប្រាក់ចំណូល និងការអភិវឌ្ឍន៍ហេដ្ឋារចនាសម្ព័ន្ធខ្នាតតូច រួមទាំងការត្រៀមលក្ខណៈគាំទ្រក្នុងករណីជួបហានិភ័យ ឬគ្រោះអាសន្នណាមួយកើតឡើងជាយថាហេតុ ក្នុងឃុំគោលដៅរបស់គម្រោង ។
លោកក៏បានលើកផងដែរថា ដើម្បីធានាឲ្យគោលនយោបាយ និងយុទ្ធសាស្ត្រខាងលើឲ្យទទួលបានជោគជ័យ អាជ្ញាធររដ្ឋបាលថ្នាក់ក្រោមជាតិក៏មានតួនាទីយ៉ាងសំខាន់ ក្នុងការរួមចំណែកទទួលខុសត្រូវសម្រាប់អនុវត្តគោលនយោបាយកំណែទម្រង់វិមជ្ឈការ និងវិសហមជ្ឈការរបស់រាជរដ្ឋាភិបាល តាមរយៈច្បាប់ស្តីពីការគ្រប់គ្រងរដ្ឋបាលរាជធានីខេត្ត ក្រុង ស្រុក ខណ្ឌ ច្បាប់ស្តីពីការគ្រប់គ្រង រដ្ឋបាលឃុំ សង្កាត់ បទបញ្ជា និងលិខិតបទដ្ឋានគតិយុត្តនានាជាធរមាន ។
ក្នុងឱកាសនាពេលនោះដែរ លោក ងី ច័ន្ទ្រផល រដ្ឋលេខាធិការក្រសួងមហាផ្ទៃ និង ជាប្រធានសម្របសម្រួលគម្រោងនិងជាប្រធានគណៈកម្មាធិការតម្រង់ទិសអនុវត្តគម្រោងលាភ ក៏បានបញ្ជាក់ថានៅឆ្នាំ២០១៧ គម្រោងលាភបានសិក្សាជាមួយសាលារាជធានីភ្នំពេញក្នុងការដាក់បញ្ចូលសមាសភាពគម្រោងថ្មីលើផ្នែកសហគមន៍ទីក្រុង (Urban) បន្ថែមមួយទៀត សំដៅលើកកម្ពស់ជីវភាពប្រជាជនក្រីក្រនៅទីក្រុង និងជនបទ នៃតំបន់គោលដៅក្នុងរាជធានីភ្នំពេញ និងឃុំគោលដៅនៃខេត្តសៀមរាប តាមរយៈ ការបង្កើត និងពង្រឹងស្ថាប័នស្វ័យគ្រប់គ្រងរបស់អ្នកក្រីក្រ និង ការផ្ដល់ឲ្យស្ថាប័នទាំងនោះ នូវលទ្ធភាពចាប់យកហិរញ្ញវត្ថុ, ផ្សារភ្ជាប់ស្ថាប័នទាំងនោះទៅទីផ្សារ និងមុខរបរសំខាន់ៗ ៕
កែសម្រួលដោយ ៖ សំណាង
ចែករំលែកព័តមាននេះ