ខេត្តព្រះវិហារ ៖ នៅក្នុងរដូវវស្សានេះ បន្ទាប់ពីផុតរដូវលក់ផ្សិតប៉ក់ព្រៃ អាជីវករលក់ដូរនៅផ្សារច្រកទ្វារអានសេះ ព្រំដែនកម្ពុជា-ថៃនៃខេត្តព្រះវិហារ កំពុងកាក់កបនឹងការលក់សត្វកណ្តូបឲ្យប្រជាជននិងឈ្មួញថៃ ក្នុង១ថ្ងៃចន្លោះពី៥០០គីឡូក្រាម ទៅ១តោន ដែលផ្តល់ប្រាក់ចំណេញឲ្យពួកគាត់បានច្រើនគួរសម…
ខេត្តព្រះវិហារ ៖ នៅក្នុងរដូវវស្សានេះ បន្ទាប់ពីផុតរដូវលក់ផ្សិតប៉ក់ព្រៃ អាជីវករលក់ដូរនៅផ្សារច្រកទ្វារអានសេះ ព្រំដែនកម្ពុជា-ថៃនៃខេត្តព្រះវិហារ កំពុងកាក់កបនឹងការលក់សត្វកណ្តូបឲ្យប្រជាជននិងឈ្មួញថៃ ក្នុង១ថ្ងៃចន្លោះពី៥០០គីឡូក្រាម ទៅ១តោន ដែលផ្តល់ប្រាក់ចំណេញឲ្យពួកគាត់បានច្រើនគួរសម សម្រាប់ដោះស្រាយជីវភាពប្រចាំថ្ងៃ ។
មានទឹកមុខញញឹមប្រាប់អ្នកសារព័ត៌មានអ្នកស្រី ថន ស្រីមុំ បានលើកឡើងថា ក្នុងមួយថ្ងៃៗអាជីវករម្នាក់ៗ ដែលកំពុងលក់ដូរនៅលើច្រកទ្វារអានសេះទឹកដីកម្ពុជា ពួកគេអាចលក់ កណ្តូបទៅឲ្យឈ្មួញថៃ ក្នុងម្នាក់ចន្លោះពី២០ទៅ២៥គីឡូក្រាម ក្នុងតម្លៃចាប់ពី១២០បាតទៅ១៧០បាត ក្នុង១គីឡូក្រាម ។ គិតថ្លៃទិញកណ្តូបពីឈ្មួញក្នុងស្រុកមកលក់បន្តអាចឲ្យរូបគាត់ចំណេញប្រាក់ចន្លោះពី៦ម៉ឺនរៀលទៅ៨ម៉ឺនរៀលក្នុងមួយថ្ងៃ ។
អ្នកស្រីបន្ថែមថា កណ្តូបនេះពួកគាត់ទិញមកលក់បន្តពីប្រជាជននៅខេត្តព្រះវិហារ ដែលចាប់សត្វនេះពី
តាមចម្ការអំពៅជាដើម និងមានរដូវត្រូវចាប់ប្រមាណជិត២ខែប៉ុណ្ណោះ សត្វនេះនឹងអស់ ។ អ្នកស្រីបន្តថា ក្រោយពេលផុតរដូវកណ្តូប ពួកគាត់នាំគ្នាលក់បន្លែព្រៃផ្សេងៗទៀតទៅតាមរដូវ ដូចជាចុងផ្តៅ ស្លឹកព្រិច ផ្សិត ដំឡូងទៀន និងកសិផលកសិកម្មផ្សេងៗ ជាដើម ។
ជាមួយគ្នានេះលោក ម៉ក់ បារាំង ជាអ្នកលក់កណ្តូបដែរបានលើកឡើងថា ក្នុងមួយថ្ងៃ អាជីវករទាំងអស់នៅទីនោះ អាចលក់ទៅឲ្យថៃ ចន្លោះពី៥០០គីឡូក្រាម ទៅ១តោនឯណោះគឺឱ្យតែមានកណ្តូបលក់មិនដែលសល់ទេ ។ លោកថាប៉ុន្តែក្នុងឆ្នាំនេះ ពុំសូវមានកណ្តូបដូចឆ្នាំមុននោះទេ ។ លោកថា សត្វកណ្តូបដែលពួកគាត់យកមកលក់នេះ ភាគច្រើនឈ្មួញពីខេត្តកំពង់ធំជាអ្នកដឹកជញ្ជូនមកដល់លើភ្នំដងរែកតែម្តង ដើម្បីលក់ឲ្យពួកគាត់ ជាអ្នកលក់បន្តឲ្យជនជាតិថៃ ទោះមានប៉ុន្មានក៏លក់អស់ដែរ ។
ជនជាតិថៃម្នាក់ដែលបានចូលមកទិញកណ្តូបពីខ្មែរបានប្រាប់កោះសន្តិភាពថា សត្វកណ្តូបនេះជនជាតិថៃពេញនិយមខ្លាំងណាស់ សម្រាប់យកទៅធ្វើជាអាហារ ដែលមានរសជាតិឆ្ងាញ់ ដូចជា យកទៅបំពង ហូបជាមួយបុកល្ហុងជាដើម ។ ជនជាតិថៃដដែល លើកឡើងទៀតថា មូលហេតុដែលពួកគេចូលមកទិញកណ្តូបពីជនជាតិខ្មែរតាមច្រកទ្វារអានសេះនេះ ដោយសារនៅប្រទេសថៃពុំមានកណ្តូប ដូចកម្ពុជានោះទេ ហើយកណ្តូបនេះភាគច្រើន មាននៅតាមចម្ការ ពិសេសចម្ការពោត ។ ចំណែកនៅថៃ កសិករប្រើប្រាស់ថ្នាំសម្លាប់សត្វល្អិតច្រើនពេក ទើបធ្វើឲ្យស្រុកពួកគេ ពុំមានសត្វកណ្តូបដូចនៅកម្ពុជា ៕
ចែករំលែកព័តមាននេះ