រាជធានីភ្នំពេញ ៖ ប្រមុខរាជរដ្ឋាភិបាលបានប្រកាសយ៉ាងម៉ឺងម៉ាត់ថា មិនខ្លាចបាត់ ឬមិនចាប់ការអនុគ្រោះពន្ធនៅកម្ពុជានោះទេ ផ្ទុយទៅវិញសម្តេចបារម្ភពីភាពស្ពឹងស្រពន់របស់មន្ត្រីរាជការក្នុងការអនុវត្តការងាររបស់ខ្លួន ។ សម្តេចតេជោ ហ៊ុនសែន នាយករដ្ឋមន្ត្រីបានថ្លែងក្នុងពិធីសំណេះសំណាលជាមួយប្រជាពលរដ្ឋសិស្ស និស្សិត ប្រមាណ១ពាន់នាក់ រស់នៅសហភាព អឺរ៉ុបថា កាលពីយប់ថ្ងៃថា ៖ « មាន EBA ក៏មិនអាចក្លាយទៅជាអ្នកមាន បាត់ EBA ក៏មិនងាប់ទេ តែយើងត្រូវប្រឹងប្រែងមួយទៅជាពីរ ។
តែអ្វីដែលខ្ញុំបារម្ភមិនមានបញ្ហាបាត់ EBA ឬមិនបាត់នោះទេ ។ គឺបារម្ភពីភាពស្ពឹកស្រពន់របស់មន្ត្រីរាជការ» ។ ដើម្បីដាក់គោលការណ៍ក្នុងការបំរើជាតិសម្តេចតេជោក៏បានឲ្យដឹងថា ពេលសម្តេចត្រឡប់ពីប្រទេសស្វីសវិញនឹងមានការបើកកិច្ចប្រជុំផ្ទៃក្នុងរបស់គណបក្ស នៅថ្ងៃទី១០ ខែកក្កដា ហើយសម្តេចនឹងនិយាយរយៈពេលពេលមួយព្រឹក ។ សម្តេចបន្តថា យើងត្រូវធ្វើរឿងនេះឲ្យច្បាស់ EBA ជាអ្វី ? វាជាប្រព័ន្ធអនុគ្រោះសម្រាប់ប្រទេសដែលមិនទាន់រីកចម្រើន ។ វានឹងបាត់នៅពេលណាមួយ គឺនៅពេលសេដ្ឋកិច្ចកើនឡើង ហើយក្នុងប្រទេសសមាជិកអាស៊ានមានតែប្រទេស២ ឬ៣ទេ ទទួលបាន EBA ។
ប្រទេសដែលមានការលូតលាស់ដូចជា ថៃ វៀតណាម មីយ៉ាន់ម៉ា គេមិនទទួលបាន EBA ទេ ហើយប្រទេសនៅអាហ្វ្រិកមួយចំនួនគេមិនយក EBA ទេ ។ សម្តេចបន្តថា កាលពីពេលកន្លងទៅសហភាពអឺរ៉ុបឲ្យបង់ពន្ធអង្ករតែពេលនេះអង្ករនៅតែនាំទៅសហភាពអឺរ៉ុបដដែល ។ ក្នុងន័យនេះ គឺកម្ពុជាមានសមត្ថភាពបង់ពន្ធឲ្យគេ ។ ករណីបង់ពន្ធនេះដែរ សម្តេចបញ្ជាក់ ៖«យើងត្រូវកាត់បន្ថយថ្ងៃដើមនៃការផលិត នៅក្នុងប្រទេស ដើម្បីផ្តល់លទ្ធភាពឲ្យបណ្តាក្រុមហ៊ុនទាំងនោះមានលទ្ធភាពនាំចេញ និងបង់ឲ្យគេ ប្រសិនបើគេបាត់បង់អនុគ្រោះEBA» ។
ជាមួយគ្នានោះដែរសម្តេចថា ប្រសិនបើមានការដកអនុគ្រោះពន្ធមែន សមិទ្ធិផលទាំងឡាយដែលសហភាពអឺរ៉ុបជួយកម្ពុជាព្រៀបដូចជា អំបិលត្រូវទឹក ហើយការជួយក្រុមប្រឆាំង ។ ខ្ញុំគ្រាន់តែបញ្ជាក់ប៉ុណ្ណឹង ៕ កែសម្រួលដោយ ៖ សុឃាក់
ចែករំលែកព័តមាននេះ