រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានបង្ហាញរូបថតអតីតមន្ត្រីរបបលន់ ណុល ក្នុងការបញ្ជាធ្វើបាតុកម្មប្រឆាំងសម្តេចនៅទីក្រុងហ្សឺណែវ ប្រទេសស្វីស តែត្រូវបរាជ័យ ។ ការលើកឡើងរបស់សម្តេចតេជោហ៊ុន សែន នេះបន្ទាប់ក្រុមប្រឆាំងដែលមានលោក សម រង្ស៊ី អតីតប្រធានគណបក្សប្រឆាំងបានប្រកាស យកថ្ងៃទី៥ ខែកក្កដានេះ ដើម្បីប្រមូលអ្នកគាំទ្រខ្លួនធ្វើបាតុកម្មប្រឆាំងនឹងសម្តេចតេជោ ដែលធ្វើទស្សនកិច្ចនៅប្រទេសស្វីស ។
ថ្លែងក្នុងពិធីសំណេះសំណាលជាមួយប្រជាពលរដ្ឋ សិស្ស និស្សិតដែលរស់នៅក្នុងសហភាពអឺរ៉ុប ប្រមាណ១ពាន់នាក់ កាលពីយប់ថ្ងៃទី៤ ខែកក្កដា សម្តេចក៏បានលើកឡើងថា ហេតុបានជាគេសុំធ្វើបាតុកម្ម នៅថ្ងៃទី៥ ខែកក្កដានេះរឿងនេះបើយើងមិនរៀបចំទុកឲ្យហើយទេ គេនឹងចូលមកតាមច្រកនឹង ព្រោះថា ជាធម្មតា ខ្ញុំព្រះករុណាខ្ញុំធ្វើនយោបាយ ដឹកនាំតែងតែចង្អុលថា ឧទាហរណ៍ថា តើហេតុអ្វីបានជាគេធ្វើបាតុកម្មថ្ងៃទី៥ ហើយថា នឹងមានរឿងអ្វី? ។ ច្បាស់ណាស់គេនឹងនិយាយលោកហ៊ុន សែននឹងរត់ដោយសារខ្លាចបាតុកម្មរបស់គេ ។ ប៉ុន្តែខ្ញុំបានជម្រាបហើយ ខ្ញុំមានវត្តមានពីថ្ងៃទី២ ដល់ថ្ងៃទី៥ កក្កដា នៅទីក្រុងហ្សឺណែវ ចុះហេតុអ្វីមិនមក ធ្វើបាតុកម្មថ្ងៃ២ ថ្ងៃ៣ ថ្ងៃ៤ ទៅមកធ្វើថ្ងៃ៥ ដែលជាថ្ងៃខ្ញុំទៅវិញ អីញ្ចឹងខ្ញុំឆ្ងល់ណាស់ ។
សម្តេចក៏បានលើកឡើងថា ក្រុមប្រឆាំងបានបរាជ័យក្នុងការធ្វើបាតុកម្មប្រឆាំងសម្តេចនៅទីក្រុងហ្សឺណែវ ប្រទេសស្វីស ។ សម្តេចបញ្ជាក់ថា ៖« ហេតុអ្វីបានជាមកធ្វើបាតុកម្មថ្ងៃដែលខ្ញុំទៅវិញ ឆ្ងល់នោះវាឆ្ងល់ពេកហើយ ។ បើថា ខ្លួនបរាជ័យក្នុងការជ្រើសរើសប្រមូលមនុស្សមកធ្វើបាតុកម្មមិនបានទទួលស្គាល់ពីបរាជ័យរបស់ខ្លួនទៅ ! » ។ ជាមួយគ្នានោះដែរសម្តេចក៏បានលើកឡើងថា បង្ហាញរូបភាពរបស់បុរស់ម្នាក់ដែលជាអតីតរដ្ឋមន្ត្រីជំនាន់ លន់ ណុលថា បើធ្វើបាតុកម្មមិនបានទេ ឈប់ធ្វើនយោបាយទៅ ទៅលក់បាយវិញទៅ ។ សម្តេចថា ៖«ឥឡូវនេះបើសិនធ្វើបាតុកម្មនៅថ្ងៃទី៥ កក្កដា តើបាតុកម្មនោះមានប្រយោជន៍អ្វីមកដេញហ៊ុន សែន នោះ បើហ៊ុនសែនទៅបាត់ហើយ ។ វាមិនខុសពីហ៊ុន ម៉ាណែត បង្ហោះលើបណ្តាញសង្គមថា ក្របីស៊ីស្រូវបងមិនហ៊ានដេញ ក្របីដើរចេញ បងដេញឲ្យស្រីមើល ។ រឿងនេះត្រូវតែអីញ្ចឹងត្រូវការរៀបចំទុកឲ្យហើយ» ។
ជាមួយគ្នានោះដែរសម្តេចក៏បានលើកឡើងថា ក្រុមប្រឆាំងទើបតែសុំច្បាប់ពីប៉ូលិសធ្វើបាតុកម្មប៉ុន្មានម៉ោងប៉ុណ្ណោះ ប៉ុន្តែតាមបញ្ញាត្តិរបស់ប្រទេសស្វីស៤៨ម៉ោង ក្រោយទើបអាចធ្វើបាន ដូច្នេះថ្ងៃទី៥ កក្កដាមិនអាចធ្វើបានដែរដល់ថ្ងៃទី៦ កក្កដា ទើបអាចធ្វើបានតែធ្វើមានប្រយោជន៍អ្វីបើហ៊ុន សែន ដល់ស្រុកខ្មែរវាយកូនគោលហើយហ្នឹង ៕ កែសម្រួលដោយ ៖ សុឃាក់
ចែករំលែកព័តមាននេះ