បន្ទាយមានជ័យ ៖ ស្របពេលដែលវិស័យសំណង់កំពុងរីកដុះដាលខ្លាំង នៅក្រុងប៉ោយប៉ែតតម្រូវកាចាំបាច់ដែលជាធាតុផ្សំដូចជា ខ្សាច់ ឥដ្ឋ និងថ្មក៏ត្រូវការជាចម្បងមិនធម្មតានោះដែរត្រូវគេដឹកមកពីតាមបណ្តាខេត្តសម្រុកចូលទឹកដីក្រុងប៉ោយប៉ែតក្នុងមួយថ្ងៃៗមិនតិចតួចឡើយ ។
ជាមួយគ្នានេះក៏មានការិះគន់ខ្លាំងក្លាណាស់ដែរ ព្រោះខ្សាច់ ថ្ម និងឥដ្ឋទាំងនេះដឹកតាមរថយន្តធំៗសុទ្ធតែប្រភេទយីឌុប ផ្លូវ៥ និងផ្លូវ៦ លើដងផ្លូវជាតិលេខ៥ ពីខេត្តពោធិសាត់ឆ្លងកាត់បាត់ដំបងដល់ក្រុងប៉ោយប៉ែតដែលមតិនានាចោទថា អាចជាការបំផ្លាញផ្លូវ ព្រោះការផ្ទុកសង្ស័យលើសទម្ងន់ ។
ពេលសាកសួរអ្នកបើកបររថយន្តដឹកខ្សាច់ពួកគេមិនប្រាប់អត្តសញ្ញាណឡើយ ប៉ុន្តែប្រាប់ថាខ្សាច់តាមរថយន្ត គឺដឹកពីខេត្តពោធិសាត់តាមដងផ្លូវជាតិលេខ៥ ឆ្លងកាត់ខេត្តបាត់ដំបង និងទីរួមខេត្តបន្ទាយមានជ័យរហូតដល់ក្រុងប៉ោយប៉ែត ។ ក្រុមអ្នកបើកបរព្រលយសំដីថា បើមិនបង់ប្រាក់ខ្លះតាមដងផ្លូវរថយន្តពួកគេមិនអាចដល់គោលដៅឡើយ ។ ក្រុមរថយន្តដែលគេសង្ស័យថា ដឹកលើសទម្ងន់ខាងលើឲ្យតែភ្លឺឡើងបានមកដល់ក្រុងប៉ោយប៉ែត សង្ស័យបើកបរពេលយប់។
ជុំវិញករណីខាងលើ លោកប៉ាល់ សសុមេដា អ្នកគ្រប់គ្រងស្ថានីយថ្លឹងរថយន្តកូនដំរី ស្ថិតនៅភូមិកូនដំរី សង្កាត់និមិត្ត ក្រុងប៉ោយប៉ែត មិនធ្វើអត្ថាធិប្បាយបំភ្លឺនៅសំណួរទេ ដោយប្រាប់ថាកំពុងជាប់រវល់ ហើយក៏បិទទូរស័ព្ទ ។
គួរបញ្ជាក់ថា ដងផ្លូវជាតិលេខ៥ ពីទីរួមខេត្តបន្ទាយមានជ័យទៅក្រុងប៉ោយប៉ែត ពិសេសក្នុងក្រុងប៉ោយប៉ែតកន្លែងខ្លះចាប់ផ្តើមខូចដក់ទឹកកន្លែងខ្លះស្រុត និងមានស្នាមប្រេះ ។ ទោះជាយ៉ាងណាថ្មីៗនេះលោកគឹម សុវណ្ណ ប្រធានមន្ទីរសាធារណការ និងដឹកជញ្ជូនខេត្តប្រាប់តាមទូរស័ព្ទថា លោកបាន និងកំពុងឲ្យក្រុមការងារចុះជួសជុលកែលំអចំណុចខូចខាតជាបណ្តើរៗហើយ ៕ កែសម្រួលដោយ ៖ សុឃាក់
ចែករំលែកព័តមាននេះ