រាជធានីភ្នំពេញ ៖ កម្លាំងអាជ្ញាធរសង្កាត់ចោមចៅទី៣ បានចុះទៅផ្អាកសំណង់របស់ជនជាតិចិន មួយកន្លែង ដែលប្រើដែកសុទ្ធជាពិសេសប្រើដែកសសរតូចៗ និងគ្មានច្បាប់អនុញ្ញាត ដែលមិនមានការព្រួយបារម្ភថា អាចប្រឈមទៅនឹងហានិភ័យនាពេលណាមួយទៅថ្ងៃខាងមុខបន្ទាប់ពីសាងសង់រួច។ ប្រតិបត្តិការនោះបានធ្វើឡើង…
រាជធានីភ្នំពេញ ៖ កម្លាំងអាជ្ញាធរសង្កាត់ចោមចៅទី៣ បានចុះទៅផ្អាកសំណង់របស់ជនជាតិចិន មួយកន្លែង ដែលប្រើដែកសុទ្ធជាពិសេសប្រើដែកសសរតូចៗ និងគ្មានច្បាប់អនុញ្ញាត ដែលមិនមានការព្រួយបារម្ភថា អាចប្រឈមទៅនឹងហានិភ័យនាពេលណាមួយទៅថ្ងៃខាងមុខបន្ទាប់ពីសាងសង់រួច។
ប្រតិបត្តិការនោះបានធ្វើឡើង កាលពីវេលាព្រឹកថ្ងៃទី០៤ ខែកក្កដា ឆ្នាំ២០១៩ ដែលសំណង់អត់ច្បាប់មួយកន្លែងនេះមានទីតាំងស្ថិតនៅតាមផ្លូវលំ ក្នុងភូមិព្រៃជីសាក់ សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ។ លោក វ៉ា សាវឿន សង្កាត់ចោមចៅ៣ ដែលបានដឹកនាំកម្លាំងចុះទៅផ្អាកការសាងសង់សំណង់ខាងលើនោះបានឲ្យដឹងថា សំណង់មួយនេះគឺជាប្រភេទ សំណង់ឃ្លាំង ដែលជារបស់ជនជាតិចិន ហើយគ្មានការសុំច្បាប់ពីអាជ្ញាធរមូលដ្ឋានឡើយ។
រហូតពេលនេះ សាងសង់បានប្រហែល៧០ភាគរយទៅហើយ នៅសល់តែការប្រក់ដំបូល និងបិទបាំងជញ្ជាំងតែប៉ុណ្ណោះ ដោយទាំងសសរ និងទាំងគ្រោងឆ្អឹងបានប្រើដែកសុទ្ធសាធ។ មានទំហំ១,៦០០ម៉ែត្រការ៉េ ហើយបើតាមការពិនិត្យ មើលជាក់ស្ដែងឃើញថាសសរគ្មានការបុកគ្រឹះឡើយគឺដាំបន្ទើតនៅលើសាបបេតុងដែលមានសភាពប្រះស្រាំថែមទៀតផង។ ម្យ៉ាងទៀតប្រើប្រាស់ដែកក្នុងការសាងសង់ស្តើងណាស់ ព្រមទាំងរៀបជញ្ជាំងជាប់ជាមួយសសរដែក ដែលគ្មានបទដ្ឋានបច្ចេកទេស និងមិនមានភាពរឹងមាំនោះឡើយ។
ប្រភពដដែលបានបន្តថា ជនជាតិចិន ទាំងនោះសាងសង់ឆៅៗតែម្ដងហើយដោយសារតែមានការព្រួយបារម្ភខ្លាចមានហានិភ័យនៅពេលខាងមុខនោះទើបប្រជាពលរដ្ឋដែលរស់នៅក្បែរខាងលួចរាយការណ៍ជូនលោកស្ងាត់ៗ ហើយលោកបានរាយការណ៍បន្តទៅកាន់ លោក ហែម ដារិទ្ធិ អភិបាលខណ្ឌពោធិ៍សែនជ័យដើម្បីសុំគោលការណ៍។
ខណៈនោះលោកអភិបាលបានបញ្ជា ឲ្យចុះទៅហាមឃាត់ជាបណ្តោះអាសន្នរង់ចាំការសម្រេចជាថ្មីពីសាលារាជធានីភ្នំពេញ និងសាលាខណ្ឌ ពោធិ៍សែនជ័យថា នឹងត្រូវអនុញ្ញាតឲ្យសាងសង់បន្ត ឬរុះរើចេញវិញយ៉ាងណានោះលោកនឹងអនុវត្តតាម បទបញ្ជាភ្លាម ដើម្បីចៀសវាងមានគ្រោះថ្នាក់នៅពេលក្រោយដោយគ្មានការទប់ស្កាត់ជាមុននោះ៕ ដោយ ៖ យន់ ស៊ីថា
ចែករំលែកព័តមាននេះ