រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានបញ្ជាក់ទៅកាន់ក្រុមប្រឹក្សាសិទ្ធិមនុស្សអង្គការសហប្រជាជាតិ (UN) ថា បញ្ហាសិទ្ធមនុស្សត្រូវបានក្លាយជាឧបកករណ៍របស់ប្រទេសមហាអំណាចមួយចំនួនយកលេសក្នុងការលូកចូលដែនអធិបតេយ្យប្រទេសទន់ខ្សោយ ។
ថ្លែងក្នុងកិច្ចប្រជុំជាទៀតទាត់លើកទី៤១ នៃក្រុមប្រឹក្សាសិទ្ធិមនុស្សអង្គការសហប្រជាជាតិ (UN) នៅមន្ទីរអង្គការសហប្រជាជាតិនៅទីក្រុងហ្សឺណែវ នៅថ្ងៃទី៤ ខែកក្កដានេះ សម្តេចតេជោបានលើកឡើងកម្ពុជាយល់ច្បាស់ថា ការគោរពសិទ្ធិមនុស្សការលើកកម្ពស់សេរីភាពជាមូលដ្ឋាន ការប្រកាន់ខ្ជាប់នូវលទ្ធិប្រជាធិបតេយ្យសេរីពហុបក្ស និងការលើកកម្ពស់នីតិរដ្ឋក៏ដូចជា ការកសាងមូលដ្ឋានទាំងនេះនៅក្នុងសង្គមជាតិនឹងនាំមកនូវសុខសន្តិភាព ស្ថិរភាព ភាពសុខដុមរមនា និងយុត្តិធម៌សង្គមជានិរន្តក៏ដូចជា នឹងរួមចំណែកដល់ការអភិវ ឌ្ឍប្រកបដោយចីរភាព និងបរិយាប័ន្នផងដែរ ។
នេះ គឺជាមូលដ្ឋានជំរុញធ្វើឱ្យកម្ពុជាក្លាយទៅជាប្រទេសមួយលេចធ្លោនៅក្នុងចំណោមប្រទេសភាគីនៃសន្ធិសញ្ញាស្តីពីសិទ្ធិមនុស្ស ។ សម្តេចបន្តថា លើសពីនេះទៀតយន្តការជាតិស្តីពីការការពារ និងការលើកកម្ពស់សិទ្ធិមនុស្សក៏ត្រូវបានចែងក្នុងជំពួកទី៣នៃរដ្ឋធម្មនុញ្ញកម្ពុជា ហើយកម្ពុជាក៏ជាប្រទេសគម្រូ និងនាំមុខគេក្នុងតំបន់ក្នុងនាមជាប្រទេសតែមួយគត់ក្នុងតំបន់អាស៊ី ដែលអនុញ្ញាតឱ្យមានការបើកការិយាល័យនៃឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស នៅក្នុងប្រទេស និងទទួលឱ្យមានអ្នករាយការណ៍ពិសេសប្រចាំប្រទេស (Country Special Rapporteur) ចាប់តាំងពីឆ្នាំ១៩៩៣មកដែលមកដល់ពេលនេះមានចំនួន៦រូបហើយ ។
សម្តេចបញ្ជាក់ថា «ទោះបីជាយើងខិតខំប្រឹងប្រែង និងសម្រេចបាននូវលទ្ធផលជាច្រើនកម្ពុជាមិនដែលបានទទួលនូវការសាទរ ឬសរសើរពីក្រុម ឬស្ថាប័នមួយចំនួនដែលមានរបៀបវារៈនយោបាយតែមួយគត់ គឺការផ្លាស់ប្តូររបបនោះនៅក្នុងតម្លៃណាក៏ដោយ ។ សម្តេចបន្ថែមថាពួកគេតែងតែលាបពណ៌ខ្មៅមកលើការអនុវត្តលិទ្ធិមនុស្សនៅកម្ពុជាទៅបីជាការអនុវត្តសិទ្ធិមនុស្សនៅប្រទេសរបស់ពួកគេខ្លួនឯងពោរពេញទៅដោយការជនបរទេស ការរើសអើងពូជសាសន៍ ការប្រព្រឹត្តអំពើមិនគប្បីមកលើជនអន្តោប្រវេសន៍ ។
សម្តេចថា វាជារឿងចម្លែកណាស់ ដែលកម្ពុជាត្រូវបានស្នើឱ្យពឹងលទ្ធិប្រជាធិបតេយ្យ ការគោរពសិទ្ធិមនុស្ស និងនីតិរដ្ឋ ប៉ុន្តែនៅពេលដែលអាជ្ញាធរអនុវត្តច្បាប់ពួកគេចោទប្រកាន់ យើងពីការរឹតត្បិតសេរីភាពក្នុងការបញ្ចេញមតិ ។ ហើយអាក្រក់ជាងនេះទៅទៀត ប្រទេស និងស្ថាប័នមួយចំនួនបានយកសិទ្ធិមនុស្សធ្វើជាចំណាប់ខ្មាំង ទាក់ទងនឹងការផ្តល់ជំនួយ ឬ ការអនុគ្រោះផ្នែកសេដ្ឋកិច្ចដល់កម្ពុជា ។
សម្តេចគូសបញ្ជាក់ថា ៖«យើងមានការសោកស្តាយជាពន់ពេកក្នុងការរំលេចនូវតថភាពដែលថា សិទ្ធិមនុស្សនាបច្ចុប្បន្ននេះបានក្លាយទៅជាឧបករណ៍នយោបាយសម្រាប់ប្រទេសមានអំណាចមួយចំនួន ឬក៏អាចនិយាយបានថា ជានិយាមប្រតិបត្តិថ្មីបស់ពួកគេជាលេសសម្រាប់រាល់ការលូកដៃជ្រៀតជ្រែកលើអធិបតេយ្យភាព និងឯករាជ្យភាពរបស់ប្រទេសទន់ខ្សោយ» ។ សម្តេចបន្ថែមទៀតថា ខ្ញុំសូមសង្កត់ធ្ងន់ថា កម្ពុជានៅតែបន្តប្តេជ្ញាពង្រឹងកិច្ចសហប្រតិបត្តិការយ៉ាងជិតស្និទ្ធក្នុងភាពជាដៃគូដែលមានលក្ខណៈស្ថាបនាជាមួយយន្តការសិទ្ធិមនុស្សរបស់អង្គការសហប្រជាជាតិ និងភាគីពាក់ព័ន្ធទាំងអស់ ដើម្បីជំរុញលើកកម្ពស់ និងការពារសិទ្ធិមនុស្សឱ្យបានកាន់តែប្រសើរថែមទៀត ។ ក៏ប៉ុន្តែយើងក៏ចង់គូសបញ្ជាក់ដែរថា ការគោរពចំពោះអធិបតេយ្យភាពជាតិ និងបូរណភាពទឹកដី ការមិនជ្រៀតជ្រែកក្នុងកិច្ចការផ្ទៃក្នុងរបស់ប្រទេសនានាភាពមិនលំអៀង និងមិនរើសអើង គប្បីត្រូវបានកំណត់ជាគោលការណ៍ណែនាំ ដែលទាំងអស់គ្នាមិនថា ប្រទេសធំ ឬតូចត្រូវគោរពប្រតិបត្តិនៅក្នុងការខិតខំលើកកម្ពស់សិទ្ធិមនុស្ស ដោយគិតគូរពីបរិការណ៍នយោបាយ ប្រវត្តិសាស្ត្រ និងសង្គមរបស់ប្រទេសនីមួយៗ ។
បញ្ហាសិទ្ធិមនុស្សគួរតែត្រូវបានដោះស្រាយនៅក្នុងបរិការណ៍ពិភពលោកដោយឈរលើអភិក្រម ស្ថាបនាប្រើប្រាស់ស្តង់ដារតែមួយ គ្មានការប្រឈមមុខដាក់គ្នាមិនពាក់ព័ន្ធនឹងរបៀបវារៈនយោបាយ និងផ្អែកលើកិច្ចសន្ទនា ។ ជាមួយគ្នានោះដែរសម្តេចក៏បានលើកឡើងថា ស្នើឱ្យភាគីទាំងអស់ពិនិត្យមើលបញ្ហាទាំងឡាយជាប្រព័ន្ធពោល គឺមើលជាព្រៃទាំងមូល ហើយសូមកុំមើលតែឈើមួយដើមៗដោយផ្សារភ្ជាប់ជាមួយរបៀបវារៈនយោបាយរបស់ខ្លួនផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ