រាជធានីភ្នំពេញ ៖ សាលាដំបូងរាជធានីភ្នំពេញ កាលពីព្រឹកថ្ងៃទី៤ ខែកក្កដា ឆ្នាំ២០១៩ បានចេញសាលក្រមសម្រេចផ្តន្តាទោសជនជាប់ចោទក្លែងហត្ថលេខាសម្ដេចតេជោនាយករដ្ឋមន្ត្រី ករណីរឿងឆបោកអតីតរដ្ឋមន្ត្រីក្រសួងវប្បធម៌ និងវិចិត្រសិល្បៈ ដាក់ពន្ធនាគារកំណត់៦ឆ្នាំ…
រាជធានីភ្នំពេញ ៖ សាលាដំបូងរាជធានីភ្នំពេញ កាលពីព្រឹកថ្ងៃទី៤ ខែកក្កដា ឆ្នាំ២០១៩ បានចេញសាលក្រមសម្រេចផ្តន្តាទោសជនជាប់ចោទក្លែងហត្ថលេខាសម្ដេចតេជោនាយករដ្ឋមន្ត្រី ករណីរឿងឆបោកអតីតរដ្ឋមន្ត្រីក្រសួងវប្បធម៌ និងវិចិត្រសិល្បៈ ដាក់ពន្ធនាគារកំណត់៦ឆ្នាំ ពីបទក្លែងលិខិតសាធារណៈ និងប្រើប្រាស់លិខិតសាធារណៈក្លែង ។
គួររំឭកថា កាលពីព្រឹកថ្ងៃទី២៦ ខែមិថុនា កន្លងទៅ សាលាដំបូងរាជធានីភ្នំពេញ បានលើកយកសំណុំរឿងក្លែងហត្ថលេខាសម្ដេចតេជោនាយករដ្ឋមន្ត្រី ឆបោកអតីតរដ្ឋមន្ត្រីក្រសួងវប្បធម៌និងវិចិត្រសិល្បៈ លើទឹកប្រាក់ចំនួន២៥ មុឺនដុល្លារអាមេរិក មកបើកសវនាការជំនុំជម្រះ ។ ជនជាប់ចោទឈ្មោះ ឯម អេង ភេទប្រុស អាយុ៥២ឆ្នាំ ជាប់ចោទពីបទក្លែងលិខិតសាធារណៈ និងប្រើប្រាស់លិខិតសាធារណៈក្លែង យោងតាមមាត្រា៦២៦នៃក្រមព្រហ្មទណ្ឌ ប្រព្រឹត្តកាលពីថ្ងៃទី២៧ ខែធ្នូ ឆ្នាំ២០១៧ នៅរាជធានីភ្នំពេញ ។
អង្គហេតុនៃរឿងក្ដីនេះ បានកើតឡើងនៅថ្ងៃទី២៧ ខែធ្នូ ឆ្នាំ២០១៧ ដែលផ្ដើមចេញពីព្រះអង្គម្ចាស់ សុីសុវតិ្ថ ប៉ាណារ៉ាសេរីវុឌ្ឍ អតីតរដ្ឋមន្ត្រីក្រសួងវប្បធម៌និងវិចិត្រសិល្បៈ ដែលចូលនិវត្តន៍ទៅហើយនោះ លោកចង់បានដីនិង ផ្ទះមួយកន្លែងនៅក្បែរព្រះបរមរាជវាំង សម្រាប់រស់នៅផ្ទាល់ខ្លួន តែមិនដឹងធ្វើដូចម្ដេចដើម្បីសុំការយល់ព្រមពីសម្ដេចតេជោនាយករដ្ឋមន្ត្រី ហ៊ុន សែន ។
លុះក្រោយមក ព្រះអង្គម្ចាស់ សុីសុវតិ្ថ ប៉ាណារ៉ាសេរីវុឌ្ឍ បានជួបទាក់ទងជាមួយឈ្មោះ ឯម អេង ហើយជនជាប់ចោទរូបនេះ ក៏បានធានាស្វែងរកលិខិត និងហត្ថលេខាបញ្ជាក់ពីសម្ដេចតេជោ ដើម្បីរកដីសមរម្យមួយកន្លែងនោះ ប៉ុន្តែត្រូវចំណាយលុយកាក់អស់ប្រមាណ២៥មុឺនដុល្លារអាមេរិក ។
ព្រះអង្គម្ចាស់ សុីសុវតិ្ថ ប៉ាណារ៉ាសេរីវុឌ្ឍបានយល់ព្រមប្រគល់ប្រាក់ចំនួន២៥មុឺនដុល្លារឲ្យទៅឈ្មោះ ឯម អេង ដើម្បីធ្វើកិច្ចការនោះ ។ ក្រោយមក ជនជាប់ចោទបានយកលិខិតស្នើសុំដែលមានហត្ថលេខាបញ្ជាក់របស់សម្ដេចតេជោនាយករដ្ឋមន្ត្រី ហ៊ុន សែន ទៅប្រគល់ឲ្យព្រះអង្គម្ចាស់ ប៉ុន្តែលិខិតនោះអាជ្ញាធរមិនទទួលស្គាល់ទេ ព្រោះជាលិខិតនិងហត្ថលេខាក្លែងក្លាយ ។
ដោយពិនិត្យឃើញថា ឯកសារដែលជនជាប់ចោទប្រគល់ឲ្យនោះជាឯកសារក្លែង ព្រះអង្គម្ចាស់ សុីសុវត្ថិ ប៉ាណារ៉ាសេរីវុឌ្ឍ ក៏បានដាក់ពាក្យបណ្ដឹងទៅក្រសួងមហាផ្ទៃ ដើម្បីឲ្យសមត្ថកិច្ចនគរបាលព្រហ្មទណ្ឌ បើកការស៊ើបអង្កេត និងស្រាវជ្រាវរកឃើញការពិត ។
ចុងក្រោយក៏រកឃើញថា លិខិតនោះគឺចុះហត្ថលេខាក្លែងក្លាយមែន ហើយសមត្តកិច្ចក៏បានចាប់ខ្លួនជនឈ្មោះ ឯម អេង បញ្ជូនទៅសាលាដំបូងរាជធានីភ្នំពេញ ទើបមានការឃុំខ្លួនជនជាប់ចោទចាប់ពីពេលនោះមក ៕ (សម្រួលដោយ៖ ស្រីណា)
ចែករំលែកព័តមាននេះ