រាជធានីភ្នំពេញ ៖ កាលពីព្រឹកថ្ងៃទី៣ កក្កដា ឆ្នាំ២០១៩ ក្រុមអ្នកលេងល្បែងបញ្ជល់មាន់ចំនួន៩នាក់ ក្នុងនោះមាន៤នាក់ជាអ្នកកាសែត ត្រូវបានកម្លាំងសមត្ថកិច្ចនគរបាលខណ្ឌមានជ័យបញ្ជូនទៅកាន់សាលាដំបូងរាជធានីភ្នំពេញ ដើម្បីឲ្យតុលាការចាត់តាមផ្លូវច្បាប់ ពាក់ព័ន្ធករណីប្រព្រឹត្តល្បែងស៊ីសងខុសច្បាប់ ។
គួរបញ្ជាក់ថា កាលពីរសៀលថ្ងៃទី៣០ ខែមិថុនា ឆ្នាំ២០១៩ កម្លាំងនគរបាលខណ្ឌមានជ័យ រាជធានីភ្នំពេញ បានចុះបង្ក្រាបទីតាំងជល់មាន់មួយកន្លែងដែលស្ថិតក្នុងភូមិឫស្សី សង្កាត់ស្ទឹងមានជ័យទី២ ខណ្ឌមានជ័យ ក្នុងនោះបានធ្វើការឃាត់ខ្លួនក្រុមអ្នកលេងល្បែងបញ្ជល់មាន់ចំនួន៩នាក់ ដោយមានអ្នកសារព័ត៌មាន៤នាក់ទៀតផង ។
ជនសង្ស័យទាំង៩នាក់ខាងលើ ក្នុងនោះរួមមាន ១-ឈ្មោះ ទិត វិចិត្រ ភេទប្រុស អាយុ៣៨ឆ្នាំ មុខរបរបុគ្គលិកក្រុមហ៊ុន មានទីលំនៅផ្ទះលេខ៤៦៩ ផ្លូវលំ ភូមិត្រពាំងឈូក សង្កាត់ទឹកថ្លា ខណ្ឌសែនសុខ ២-ឈ្មោះ ឡុង តារ៉ា ភេទប្រុស អាយុ៣៧ឆ្នាំ មុខរបរជាងកញ្ចក់ មានទីលំនៅផ្ទះជួល ផ្លូវ៣៧១ សង្កាត់បឹងទំពន់ទី២ ខណ្ឌមានជ័យ ៣-ឈ្មោះ គឹម ង៉ែតសុពល ភេទប្រុស អាយុ៦២ឆ្នាំ មានទីលំនៅផ្ទះគ្មានលេខផ្លូវលំ ភូមិដំណាក់ធំ១ សង្កាត់ស្ទឹងមានជ័យទី២ ខណ្ឌមានជ័យ ។
៤-ឈ្មោះ ហូ ផល ភេទប្រុស អាយុ៤៥ឆ្នាំ មុខរបរបុគ្គលិកក្រុមហ៊ុន មានទីលំនៅផ្ទះគ្មានលេខ ផ្លូវលំ ភូមិត្រពាំងថ្លឹង សង្កាត់ទឹកថ្លា ខណ្ឌសែនសុខ ៥-ឈ្មោះ សឿន សុង ភេទប្រុស អាយុ៤៨ឆ្នាំ មុខរបររត់ម៉ូតូកង់៣ មានទីលំនៅផ្ទះគ្មានលេខ ផ្លូវលំ ភូមិតានូ ឃុំស្អាងភ្នំ ស្រុកស្អាង ខេត្តកណ្តាល ៦-ឈ្មោះ មោក យ៉េន ភេទប្រុស អាយុ៣៦ឆ្នាំ មានទីលំនៅផ្ទះជួល ផ្លូវលំ ភូមិទួលពង្រ សង្កាត់ចោមចៅ២ ខណ្ឌពោធិ៍សែនជ័យ មុខរបរអ្នកកាសែត (ពិភពថ្មីព័ត៌មាន) ។
៧-ឈ្មោះ ឈួន រ៉ាឈូ ភេទប្រុស អាយុ៥៣ឆ្នាំ មុខរបរអ្នកកាសែត (វីរៈសែនជ័យ) មានទីលំនៅផ្ទះជួល ផ្លូវលំ ភូមិទួលពង្រ សង្កាត់ចោមចៅ២ ខណ្ឌពោធិ៍សែនជ័យ ៨-ឈ្មោះ គ្រង រដ្ឋា ភេទប្រុស អាយុ៤៨ឆ្នាំ មុខរបរអ្នកកាសែត (សង្គ្រោះប្រជាពលរដ្ឋខ្មែរស្នេហាជាតិ) មានទីលំនៅផ្ទះជួល ផ្លូវលំ ភូមិគគីរធំ ស្រុកកៀនស្វាយ ខេត្តកណ្តាល និង៩-ឈ្មោះ គឹម សាវិត ភេទប្រុស អាយុ២៩ឆ្នាំ មុខរបរអ្នកកាសែត (អំណាចខ្មែរ) មានទីលំនៅភូមិសាម៉លជ្រុំ ឃុំសាម៉លជ្រុំ ស្រុកស្វាយទាប ខេត្តស្វាយរៀង ។
ប្រតិបត្តិការខាងលើនេះដឹកនាំកម្លាំងដោយលោក ម៉េង វិមានតារ៉ា អធិការនគរបាលខណ្ឌមានជ័យ និងដកហូតបានមាន់ជល់ចំនួន៣ក្បាល ចានសម្រាប់លេងអាប៉ោង១ កំរាលសម្រាប់ចាក់អាប៉ោង១ផ្ទាំង ជញ្ជីងថ្លឹង១ កៅអីជ័រ៩ ខ្នាយដែក២ដើម ទូរស័ព្ទដៃចាស់១១គ្រឿង លុយខ្មែរចំនួន៨៧០ ០០០រៀល និងម៉ូតូ៤គ្រឿង ។ ក្រោយឃាត់ខ្លួនក្រុមអ្នកលេងល្បែងបញ្ជល់មាន់ទាំង៩នាក់ត្រូវបានសមត្ថកិច្ចកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញតាមនីតិវិធី ៕ (កែសម្រួលដោយ ៖ ធីតា)
ចែករំលែកព័តមាននេះ