ប្រទេសឥណ្ឌា ៖ យោងតាមតុល្យការផ្លូវការថ្មីថា ការបាក់ជញ្ជាំងធំមួយមកពីភ្លៀងធ្លាក់ខ្លាំង បណ្ដាលឲ្យមនុស្សយ៉ាងតិច២១នាក់ស្លាប់ កាលពីថ្ងៃទី២កក្កដានៅក្រុងមុមបៃ ទីក្រុងសេដ្ឋកិច្ចរបស់ឥណ្ឌា ដែលកំពុងមានការស្ទះខ្លាំងមកពីភ្លៀងខ្លាំងនារដូវវស្សា។
ជញ្ជាំងធំមួយនៅជាយក្រុងមុមបៃបានរលំបាក់ពេលយប់ ថ្ងៃទី២កក្កដាវេលាម៉ោង២រំលងអាធ្រាត្រម៉ោងក្នុងស្រុក ដែលការបាក់ជញ្ជាំងនេះក្រៅពីអ្នកស្លាប់មនុស្សច្រើនសិបនាក់ក៏រងរបួសដែរ។ ក្រោមដំណក់ទឹកភ្លៀងពួកអ្នកជួយសង្គ្រោះបានខិតខំកាយគំនរបាក់បែក ប៉ុនប៉ងរកអ្នកដែលអាចនៅមានជីវិត។
សាក្សីរៀបរាប់ប្រាប់ទូរទស្សន៍NDTVថា គេបានឃើញក្មេងស្រីអាយុប្រមាណជា១០ឆ្នាំម្នាក់ជាប់ក្រោមកំនរបាក់បែក ដោយយំព្រោះការឈឺចាប់នឹងរបួសធ្ងន់ ហើយស្រែកឲ្យគេជួយនិងសុំទឹកផឹក តែគួរឲ្យអាសូរក្រោយការកាយគាស់ទំរាំយកនាងចេញបាន ដែលប្រើពេលដល់ទៅ១២ម៉ោង នាងបានស្លាប់បាត់ទៅហើយ។
ទីក្រុងមុមបៃពីមុនហៅបុមបៃនាភាគខាងលិចឥណ្ឌា ដែលមានប្រជាជនប្រមាណជា២០លាននាក់ កាលពីថ្ងៃទី២កក្កដាជួបប្រទះភ្លៀងធ្លាក់ខ្លាំងបំផុត២ថ្ងៃជាប់ៗគ្នា នាំឲ្យមានទឹកជន់លិចធ្ងន់ធ្ងរ។
សកម្មភាពក្នុងទីក្រុងស្ទើរគាំងទាំងស្រុង។ អាជ្ញាធរអំពាវនាវដល់ពលរដ្ឋទាំងអស់កុំឲ្យចេញក្រៅផ្ទះ។ បណ្ដាសាលារៀនត្រូវបិទទ្ធារ។ ព្រលានយន្តហោះអន្តរជាតិសំខាន់នៃទីក្រុងនោះ នៅមិនទាន់អាចប្រើបានវិញមកពីវត្តមាន នៃយន្តហោះមួយគ្រឿងរអិលចេញពីផ្លូវកាលពីយប់ថ្ងៃទី៣០មិថុនាពេលចុះចត តែពុំបណ្ដាលឲ្យមានជនរងគ្រោះឡើយ៕ (កែសម្រួលដោយ ៖ បុប្ផា)
ចែករំលែកព័តមាននេះ