រាជធានីភ្នំពេញ ៖ នាពេលបច្ចុប្បន្នគេកត់សម្គាល់ថា វិស័យកីឡាប្រដាល់កាន់តែមានការរីកចម្រើនយ៉ាងខ្លាំង បើទោះជាកីឡាករនៅក្នុងវិស័យមួយនេះ ភាគច្រើននៅមានជីវភាពក្រីក្របើធៀបនឹងប្រទេសជិតខាងក្ដី ។ ក្នុងនោះអ្នកប្រដាល់មួយចំនួន ទន្ទឹមនឹងទទួលបានការគាំទ្រខ្លាំង ក៏ធ្លាប់ផ្ទុះរឿងអាស្រូវកក្រើកមេឃកក្រើកដីច្រើនជាងកីឡាផ្សេងៗផងដែរចាប់តាំងពីកីឡាមួយនេះទទួលបានការពេញនិយម។…
រាជធានីភ្នំពេញ ៖ នាពេលបច្ចុប្បន្នគេកត់សម្គាល់ថា វិស័យកីឡាប្រដាល់កាន់តែមានការរីកចម្រើនយ៉ាងខ្លាំង បើទោះជាកីឡាករនៅក្នុងវិស័យមួយនេះ ភាគច្រើននៅមានជីវភាពក្រីក្របើធៀបនឹងប្រទេសជិតខាងក្ដី ។ ក្នុងនោះអ្នកប្រដាល់មួយចំនួន ទន្ទឹមនឹងទទួលបានការគាំទ្រខ្លាំង ក៏ធ្លាប់ផ្ទុះរឿងអាស្រូវកក្រើកមេឃកក្រើកដីច្រើនជាងកីឡាផ្សេងៗផងដែរចាប់តាំងពីកីឡាមួយនេះទទួលបានការពេញនិយម។
កីឡាករដែលធ្លាប់មានរឿងអាស្រូវឡើងផ្អើលពិភពប្រដាល់នាពេលកន្លងមកនោះ មិនមែនមានតែម្នាក់នោះទេ ពោលគឺមានច្រើន ដោយគ្រាន់តែអ្នកផ្ទុះរឿងអាស្រូវហើយមានអ្នកចាប់អារម្មណ៍ខ្លាំងក្លា គឺមានមិនច្រើនប៉ុណ្ណោះ។
ធា នុរាជ ៖ លោកធ្លាប់ផ្ទុះរឿងអាស្រូវដល់ថ្នាក់ត្រូវប៉ូលិសចាប់ឃាត់ខ្លួន ដោយសារតែលោកត្រូវបានអភិបាលខណ្ឌមួយចោទថា បានលួចទូរស័ព្ទ និងរបស់របរមានតម្លៃរត់យកទៅ ក្នុងពេលលោកស្រឡាញ់រាប់អាន ។ ក្នុងពេលនោះ គេឃើញមានការសម្របសម្រួលនឹងមានការសុំទោសយ៉ាងខ្លាំង ទម្រាំលោកអាចនៅក្រៅប្រព័ន្ធតុលាការ និងមិនជាប់ពន្ធនាគារ។
ពេលនោះ លោកគឺជាកីឡាករដែលមានកេរ្តិ៍ ឈ្មោះសំឡេង និងបានប្រើឈ្មោះនៅក្នុងពិភពប្រដាល់ថា សូយ ភារម្យ ។ លោកត្រូវគេឃើញបាត់មុខក្រោយផ្ទុះរឿងអាស្រូវប្រមាណជាងមួយឆ្នាំ ដោយពេលត្រឡប់មកវិញ ក៏បានប្ដូរឈ្មោះជា ធា នុរាជ ។ យ៉ាងណាមិញ លោកត្រូវគេឃើញបាត់មុខជាថ្មីមកដល់ពេលនេះ ដោយសារតែអះអាងថា ខ្លួនវ័យចាស់ហើយមិនចង់នៅបន្តអាជីពប្រដាល់ ដែលមិនសូវសល់លុយក្រោយពេលត្រឡប់មកកាន់សង្វៀនជាថ្មី។
លោកក៏មិនសូវទទួលបានការគាំទ្រក្រោយពេលផ្ទុះរឿងអាស្រូវនោះដែរ បើទោះជាលោកបានប្ដូរឈ្មោះពីសូយ ភារម្យ មក ធា នុរាជ ធ្វើឱ្យអ្នកគាំទ្រភាគច្រើនមិនចាប់អារម្មណ៍ពីអតីតកាលអាស្រូវ ។
វង្ស ណយ ៖ ក្នុងពេលកេរ្តិ៍ឈ្មោះកំពុងតែឡើងកូដខ្លាំង លោកក៏ត្រូវគណៈកម្មការប្រដាល់នៅសង្វៀនមួយចោទថាលោកលក់លទ្ធផលប្រកួត ។ បើទោះជាលោកបកស្រាយថា បញ្ហារបួសជើងមិនទាន់ជា និងបញ្ហារបួស ទើបឡើងប្រកួតជាមួយគូមុនមិនទាន់ជាទើបចាញ់កីឡាករថៃ ក៏ការរិះគន់នោះ នៅតែធ្វើឱ្យប៉ះពាល់មុខមាត់របស់លោក ។ វង្ស ណយ បានសម្រេចចិត្តចាកឆ្ងាយពីអាជីពប្រដាល់មួយរយៈ ក្រោយរងការចោទថា ប្រកួតមិនអស់ដៃ ហើយលក់លទ្ធផល ប៉ុន្តែក្រោយពីរឿងរ៉ាវនេះស្ងប់លោកក៏ត្រឡប់មកវិញ ដោយចាប់ទាំងអាជីពចម្រៀងផង ប៉ុន្តែដោយសារមិនសូវជោគជ័យ ក៏វិលមកកាន់ប្រដាល់តែម្យ៉ាង។
កែវ រំចង់ ៖ ក្នុងពិភពប្រដាល់ កែវ រំចង់ល្បីល្បាញខ្លាំង ប៉ុន្តែទន្ទឹមនឹងនោះ ការរិះគន់ចំពោះលោក ក៏ផ្ទុះឡើងឥតឈប់ឈរផងដែរ ពាក់ព័ន្ធនឹងថាលោកក្អេងក្អាងក្នុងពេលប្រកួត និងវាយច្រលោតជាដើម ។ លោកកាន់តែរងការរិះគន់ពីអ្នកគាំទ្រទ្វេដង ដោយសារតែវាយច្រលោតយកកំហឹងទល់កំហល់ ហើយដោយសារមានសង្វៀនទូរទស្សន៍បាយ័នជ្រោមជ្រែងខ្លាំងផង គឺរឹតតែធ្វើឱ្យលោកមានអំនួតខ្លាំងនៅក្នុងពេលនោះ រហូតត្រូវគេផ្ដល់រហស្សនាមថា កីឡាករខ្សែ ។ ការនិយាយបែបនេះដោយសារគេសំអាងថា ទោះបីគូប្រកួតវាយបានល្អប៉ុនណាបើវាយលោកមិនសន្លប់ គឺនៅតែចាញ់ដដែល ។
ទោះបីយ៉ាងណានៅក្នុងប៉ុន្មានឆ្នាំចុងក្រោយ កីឡាករ កែវ រំចង់ បានប្ដូរទម្រង់វាយ ដោយលែងច្រលោត ហើយយកបច្ចេកទេសជាធំ ទើបធ្វើឱ្យការគាំទ្រមានចំពោះលោកខ្លាំងវិញ ។ នៅក្នុងពេលនេះ កែវ រំចង់ ក៏ប្រកាសមិនប្រកួតជាមួយកីឡាករក្នុងស្រុកផងដែរ ដើម្បីកុំឱ្យពិបាកវាយមិនអស់ដៃ។
រឿង សោភ័ណ្ឌ ៖ ជើងខ្លាំងល្បីឈ្មោះរូបនេះ ក៏រងការរិះគន់ជារឿយៗផងដែរ ក្នុងពេលកេរ្តិ៍ឈ្មោះបោះសំឡេងឡើងខ្លាំង ដោយសារតែក្នុងពេលសង្វៀនទូរទស្សន៍អាសុីអាគ្នេយ៍ប្រកាសឱ្យចាញ់កីឡាករថៃស្ទើរគ្រប់លើក គឺលោកតវ៉ា និងធ្វើសកម្មភាពមិនទទួលយកលទ្ធផលក្នុងពេលដែលអ្នកទស្សនា និងគណៈកម្មការសុទ្ធតែមើលឃើញថា លោកចាញ់ប្រៀបគូប្រកួត។
លោកក៏មានទម្លាប់វាយច្រលោតម្ដងម្កាលផងដែរ ប៉ុន្តែនៅក្នុងរយៈពេលចុងក្រោយ គឺលោកផ្លាស់ប្ដូរទម្លាប់ និងមើលទៅចាស់ទុំជាងមុន ទើបធ្វើឱ្យការគាំទ្រចំពោះកីឡាកររូបនេះ ឈានឡើងមិនធ្លាក់ ។ លោកក៏ជាកីឡាករមួយរូបដែលមានរថយន្តជិះទៅមកសមរម្យជាងកីឡាករផ្សេងៗផងដែរ ក្នុងចំណោមអ្នកប្រដាល់ដែលល្បីតែរឿងមានជីវភាពខ្វះមុខខ្វះក្រោយ៕ (កែសម្រួលដោយ ៖ បុប្ផា)
ចែករំលែកព័តមាននេះ