ប្រទេសលីប៊ី ៖ ការវាយប្រហារតាមអាកាសមួយកាលពីថ្ងៃទី២កក្កដា ត្រូវចំមជ្ឈមណ្ឌលដាក់ពួកអន្តោប្រវេសន៍ ស្ថិតនៅជាយក្រុងទ្រីប៉ូលីរដ្ឋធានីលីប៊ី បណ្ដាលឲ្យមនុស្សស្លាប់ច្រើនសិបនាក់។ យោងតាមតុល្យការដំបូូងរបស់ផ្នែកសង្គ្រោះអះអាងថា ជនអន្តោប្រវេសន៍ជិត៤០នាក់ស្លាប់ហើយ៧០នាក់រងរបួសក្នុងការវាយប្រហារនេះ។ តុល្យការអាចមានខ្ពស់ជាងនេះទៀត។ អ្នកនាំពាក្យរបស់ក្រុមសង្គ្រោះលោកអូសាម៉ាអាលីបញ្ជាក់ថា…
ប្រទេសលីប៊ី ៖ ការវាយប្រហារតាមអាកាសមួយកាលពីថ្ងៃទី២កក្កដា ត្រូវចំមជ្ឈមណ្ឌលដាក់ពួកអន្តោប្រវេសន៍ ស្ថិតនៅជាយក្រុងទ្រីប៉ូលីរដ្ឋធានីលីប៊ី បណ្ដាលឲ្យមនុស្សស្លាប់ច្រើនសិបនាក់។
យោងតាមតុល្យការដំបូូងរបស់ផ្នែកសង្គ្រោះអះអាងថា ជនអន្តោប្រវេសន៍ជិត៤០នាក់ស្លាប់ហើយ៧០នាក់រងរបួសក្នុងការវាយប្រហារនេះ។ តុល្យការអាចមានខ្ពស់ជាងនេះទៀត។ អ្នកនាំពាក្យរបស់ក្រុមសង្គ្រោះលោកអូសាម៉ាអាលីបញ្ជាក់ថា ជនអន្តោប្រវេសន៍ប្រមាណជា១២០នាក់ដាក់ឃុំទុកក្នុងហង់ហ្គារមួយ ដែលរងការទម្លាក់គ្រាប់បែកចំ។ ភ្នាក់ងារជួយសង្គ្រោះបានរុករកអ្នកដែលអាចនៅរស់រានមានជីវិតជាយថាហេតុក្រោមគំនរបាក់បែក។
ដោយបរិហារថានោះជាអំពើឧក្រិដ្ឋពេញទី រដ្ឋាភិបាលរួបរួមជាតិលីប៊ី បានទម្លាក់ការទទួលខុសត្រូវចំពោះការវាយប្រហារនោះលើសេនាប្រមុខKHALIFA HAFTAR បុរសខ្លាំងនៃភាគខាងកើតលីប៊ី ដែលធ្វើការវាយលុកប៉ងដណ្ដើមយករដ្ឋធានីក្រុងទ្រីប៉ូលី ចាប់តាំងពីដើមខែមេសាមក។ រដ្ឋាភិបាលរួបរួមជាតិមានមូលដ្ឋាននៅក្រុងទ្រីប៉ូលី ទទួលស្គាល់ដោយសហគមន៍អន្តរជាតិ បានចោទប្រកាន់កងកម្លាំងរបស់លោកHAFTARថា បានធ្វើការវាយប្រហារនោះដោយគិតទុកជាមុននិងចំតែម្ដងប្រឆាំងមជ្ឈមណ្ឌលនោះ។
ការវាយប្រហារដោយទម្លាក់គ្រាប់បែកលើមជ្ឈមណ្ឌលនេះ ពុំមានខាងណាប្រកាសទទួលខុសត្រូវនៅឡើយ ប៉ុន្តែបណ្ដាសារព័ត៌មានស្និទ្ធលោកHAFTARរៀបរាប់នាថ្ងៃទី២កក្កដាពីការវាយប្រហារតាមអាកាសមួយចំនួនលើក្រុងទ្រីប៉ូលីនិងក្រុងតាហ្សូរ៉ា។ ទីក្រុងតាហ្សូរ៉ាជាកន្លែងដែលកងទ័ពស្និទ្ធរដ្ឋាភីបាលរួបរួមជាតិ មានទីតាំងយោធាជាច្រើន ហើយទីនោះតែងជាគោលដៅនៃការវាយប្រហារតាមអាកាសរបស់កងកម្លាំងលោកHAFTAR។
តាមTWITTERការិយាល័យនៃឧត្ដមស្នងការអ.ស.បខាងជនភៀសខ្លួនHCR និយាយថា ខ្លួនមានការព្រួយបារម្ភខ្លាំងណាស់ ចំពោះការវាយប្រហារតាមអាកាស ប្រឆាំងមជ្ឈមណ្ឌលឃុំឃាំងក្នុងទីក្រុងតាហ្សូរ៉ានិងលើការស្លាប់របស់ពួកជនភៀសខ្លួននិងពួកអន្តោប្រវេសន៍៕ (កែសម្រួលដោយ ៖ បុប្ផា)
ចែករំលែកព័តមាននេះ