រាជធានីភ្នំពេញ ៖ បុរសម្នាក់បើកម៉ូតូកង់បីឥណ្ឌាមួយគ្រឿងមកឈប់ដេកនៅតាមដងផ្លូវ និងស្រែកអោយគេជួយបង្កឲ្យមានការភ្ញាក់ផ្អើលដល់ប្រជាពលរដ្ឋនាំគ្នាចោមរោមមើល សង្ស័យថាត្រូវគេដាក់ថ្នាំសណ្តំតាមពិតស្រវឹងស្រាសោះ ដែលហេតុការណ៍នេះបានកើតឡើង កាលពីវេលាម៉ោង៩និង៤០នាទីយប់ថ្ងៃទី២ ខែកក្កដានេះត្រង់ចំណុចជាប់របងសាលាបឋមសិក្សានាគវ័ន្ត តាមបណ្ដោយផ្លូវ៦០៨ ស្ថិតក្នុងសង្កាត់បឹងកក់ទី២ ខណ្ឌទួលគោក ។
បើតាមប្រភពព័ត៌មានពីប្រជាពលរដ្ឋដែលរស់នៅក្បែរកន្លែងកើតហេតុបានអោយដឹងថា នៅមុនពេលកើតបុរសខាងលើមានវ័យ២៥ឆ្នាំបានបើកកង់បីឥណ្ឌាមួយគ្រឿង ពណ៌ស គ្មានស្លាកលេខ ។ ដោយបានបើកមកឈប់ចតនៅត្រង់ចំណុចកើតហេតុខាងលើ រួចក៏បានស្រែកថា« ជួយផងមានគេបានដាក់ថ្នាំខ្ញុំហើយ» ។ ភ្លាមៗនោះក៏មានប្រជាពលរដ្ឋដែលរស់នៅក្បែរកន្លែងកើតហេតុបានចេញមកមើល និងបានសួរនាំបុរសខាងលើ ។ ខណៈនោះបុរសខាងលើ ក៏បានអោយប្រជាពលរដ្ឋជួយធ្វើការទាក់ទងទៅប្រាប់បងស្រីបង្កើតរបស់ខ្លួនផង រួចបុរសនោះក៏ទន់ខ្លួនដេកបាត់មាត់បាត់.កនៅលើកង់បីតែម្តង ។
បន្ទាប់មកប្រជាពលរដ្ឋដែលរស់នៅក្បែរកន្លែងកើហេតុក៏បានធ្វើការជួយសង្គ្រោះបឋមដោយយកក្រូចឆ្មារច្របាច់ដាក់មាត់ ព្រោះបុរសនោះបានប្រាប់ថា ខ្លួនត្រូវគេដាក់ថ្នាំសណ្តំ និងបានរាយការណ៍ជូនសមត្ថកិច្ចមូលដ្ឋានឲ្យចុះមកជួយធ្វើការអន្តរាគមន៍ផងដែរ ។ មួយស្ទុះក្រោយមកក៏មានស្ត្រីម្នាក់ដែលត្រូវជាបងស្រីបង្កើតរបស់បុរសខាងលើបានចុះមកដល់ចំណុចកើតហេតុ ។ បុរសខាងលើក៏បានដឹងខ្លួននិយាយជាមួយបងស្រីបង្កើតដោយស្ថានភាពវង្វេងវង្វាន់ខុសពីធម្មតា ។
ក្រោយមកក៏មានសមត្ថកិច្ចមូលដ្ឋានបានចុះមកធ្វើការអន្តរាគមន៍ដល់កន្លែងកើតហេតុ និងនាំបុរសខាងលើទៅសម្រាកនៅប៉ុស្តិ៍នគរបាលរដ្ឋបាលបឹងកក់ទី២ ព្រោះសង្ស័យថា បុរសនោះស្រវឹងស្រា ។
ក្រោយពេលកើតហេតុបន្ទាប់ពីសមត្ថកិច្ចមូលដ្ឋាននាំខ្លួនបុរសខាងលើទៅសម្រាកនៅប៉ុស្តិ៍ និងធ្វើការសួរនាំរួចមកទើបដឹងថា បុរសខាងលើមិនមែនត្រូវថ្នាំសណ្តំគេនោះទេ ការពិត គឺបុរសនោះបានស្រវឹងស្រាចេញផឹកស៊ីជាមួយមិត្តភក្តិរបស់គេ ។ សមត្ថកិច្ចក៏បានអោយសាច់ញាតិក្រុមគ្រួសារដឹងយកទៅបុរសខាងលើត្រឡប់ទៅផ្ទះវិញបាត់ទៅ ៕ កែសម្រួលដោយ ៖ សុឃាក់
ចែករំលែកព័តមាននេះ