រាជធានីភ្នំពេញ ៖ បុរសជនជាតិស្បែកសដែលធ្វើអត្តឃាតសម្លាប់ខ្លួនឯងនៅក្នុងសំណាក់វិចតូរីយ៉ា ដែលមានទីតាំងលេខ២ដេ៤ ផ្លូវលេខ៥១ សង្កាត់ផ្សារថ្មីទី១ ខណ្ឌដូនពេញ កាលពីថ្ងៃអង្គារ កន្លងមកនេះ ត្រូវបានគេស្គាល់ឈ្មោះ GREEN STUAT JAM អាយុ៤៧ឆ្នាំ ជនជាតិអង់គ្លេសកាន់លិខិតឆ្លងដែនលេខ១០៧២៥៩១៩៩ ។
មន្ត្រីនគរបាលមូលដ្ធានបានឱ្យដឹងថា កាលពីល្ងាចថ្ងៃទី០៦ មករា ២០១៤ មានជនបរទេសស្បែកសម្នាក់ អាយុប្រហែលជាង៣០ឆ្នាំ មិនស្គាល់អត្តសញ្ញាណ បានស្លាប់ក្នុងបន្ទប់លេខ៣០៤ ជាន់ទី២ នៃផ្ទះសំណាក់វិចតូរីយ៉ា ។
យោងតាមការអះអាងរបស់ម្ចាស់ផ្ទះសំណាក់ខាងលើបានឱ្យដឹងថា នៅវេលាម៉ោងប្រហែលជា៣រំលងអធ្រាត្រ ឈានចូលថ្ងៃទី០៥ មករា ២០១៤ មានជនបរទេសស្បែកសម្នាក់ អាយុប្រហែលជាង៣០ឆ្នាំ និងមិត្តភក្តិម្នាក់ទៀត បានមកជួលបន្ទប់លេខ៣០៤ជាន់ទី២ស្នាក់នៅ ប៉ុន្តែមិត្តភក្តិមិនស្នាក់នៅជាមួយនោះទេ ។
ម្ចាស់ផ្ទះសំណាក់បន្តថា នៅល្ងាចថ្ងៃទី០៦ មករា អ្នកមើលការខុសត្រូវផ្ទះសំណាក់មិនឃើញជនបរទេសនោះ ចុះមកខាងក្រោមក៏កើតការសង្ស័យ ទើបឱ្យបុគ្គលិកឡើងទៅមើល តែបន្ទប់បានចាក់គន្លឹះខាងក្នុងនិងយកពូកបាំង ។ ដូច្នេះកាន់តែសង្ស័យ ទើបសម្រេចចិត្តនាំគ្នាទម្លុះទ្វារចូលទៅ ស្រាប់តែឃើញជនបរទេសនោះ បានស្លាប់បាត់ទៅហើយនៅលើគ្រែ មានឈាមហូរប្រឡាក់ពេញខ្លួន ដោយធ្វើអត្តឃាតសម្លាប់ខ្លួនឯង យកកញ្ចក់ស្រួចមកអារបំពង់.កផ្នែកខាងឆ្វេងបង្ហូរឈាមរហូតទាល់តែស្លាប់៕
ចែករំលែកព័តមាននេះ