ក្រុងហុងកុង ៖ ប៉ូលិសក្រុងហុងកុងកាលពីយប់ថ្ងៃទី១មកទី២កក្កដា ដណ្ដើមកាន់កាប់ទីតាំងសភាហុងកុងវិញ ពីពួកបាតុករដែលលុកចូលកាន់កាប់និងបំផ្លិចក្នុងសភារយៈពេលច្រើនម៉ោង។
ពួកបាតុករបាននាំគ្នារត់គេចខ្លួនក្រាយពីកងកម្លាំងប៉ូលិសបាញ់ឧស្ម័នបង្ហូរទឹកភ្នែក បន្ទាប់ពីពួកបាតុករលុកចូលកាន់កាប់សភាច្រើនម៉ោង។វិបត្តិដែលកើតមាននៅក្រុងហុងកុងចាប់តាំងពី៣សប្ដាហ៍មកហើយ បានឆ្លងកាត់ដំណាក់កាលថ្មីមួយកាលពីថ្ងៃទី១កក្កដា ដោយសភាត្រូវបានពួកបាតុករប្រឆាំងក្រុងប៉េកាំង លុកចូលកាន់កាប់និងវាយបំផ្លាញ នាថ្ងៃខួបប្រគល់ដែនដីហុងកុងទៅឲ្យចិនវិញថ្ងៃទី១កក្កដា។
នាយប់ថ្ងៃទី១មកទី២កក្កដាប៉ូលិសទីបំផុតដណ្ដើមត្រួតត្រាសភាវិញ។ ពួកបាតុករបានរត់គេចខ្លួនចេញពីទីនោះក្រោយពាក់កណ្ដាលយប់។ ប៉ូលិសបានប្រើដំបងនិងបាញ់ឧស្ម័នបង្ហូរទឹកភ្នែកប្រឆាំងពួកបាតុករ នៅតាមច្រកចូលសភាក្រោយការព្រមាន។ ប្រមុខរដ្ឋាភិបាលក្រុងហុងកុង លោកស្រីCARRIE LAMបានថ្កោលទោសការលុកចូលអុកឡុកដោយហិង្សាបំផុតក្នុងសភា។ លោកស្រីសង្ឃឹមថាសង្គមនឹងវិលមករកប្រក្រតីភាពឡើងវិញដោយឆាប់រហ័ស។
កាលពីយប់ថ្ងៃទី១កក្កដាពួកបាតុករជាច្រើនសិបនាក់ដែលប្រទូស្តរ៉ាយនឹងរដ្ឋាភិបាលស្និទ្ធក្រុងប៉េកាំង ដែលពាក់មួកកាស់និងបិទមុខបានលុកចូលក្នុងសភា ក្រោយពីទម្លុះរបាំងប៉ូលិស៕ (កែសម្រួលដោយ ៖ បុប្ផា)
ចែករំលែកព័តមាននេះ