សិល្បករល្ខោននិយាយមានកម្លាំងចិត្ត
- ភ្នំពេញ
រាជធានីភ្នំពេញ៖កាលពីសប្ដាហ៍កន្លងទៅ ក្រុមសិល្បករល្ខោនចំនួន២ក្រុម ដឹកនាំដោយអ្នកគ្រូឆុន ស៊ីណា អ្នកគ្រូប៉ុក វណ្ណា និងលោកណេន ភារិទ្ធ បានរៀបចំការសម្ដែងល្ខោននិយាយចំនួន២រឿង គឺរឿង…
រាជធានីភ្នំពេញ៖កាលពីសប្ដាហ៍កន្លងទៅ ក្រុមសិល្បករល្ខោនចំនួន២ក្រុម ដឹកនាំដោយអ្នកគ្រូឆុន ស៊ីណា អ្នកគ្រូប៉ុក វណ្ណា និងលោកណេន ភារិទ្ធ បានរៀបចំការសម្ដែងល្ខោននិយាយចំនួន២រឿង គឺរឿង «ម្នាក់ឯងជាថ្មី» ស្នាដៃរបស់អ្នកគ្រូឆុន ស៊ីណា កាលពីថ្ងៃអាទិត្យ ទី២៣ ខែមិថុនា និងរឿង «គ្រូទាយ» ស្នាដៃរបស់កញ្ញាលឹម ផាន់ណា កាលពីថ្ងៃទី២៦ ខែមិថុនា ២០១៩ នៅឆាកសម្ដែងសិល្បៈខ្មែរអមតៈ បរិវេណសារមន្ទីរជាតិ ក្រោមកិច្ចសហការជាមួយអង្គការសិល្បៈខ្មែរអមតៈ និងមានភ្ញៀវចូលទស្សនាសរុបទាំង២លើក ជាង៣០០នាក់ ។
គោលបំណងនៃការរៀបចំការសម្ដែងល្ខោននិយាយនេះឡើង គឺដើម្បីរំឭកឡើងវិញនូវទម្រង់សិល្បៈល្ខោន ដែលធ្លាប់រីកសាយភាយក្នុងប្រទេសកម្ពុជាកាលពីជាង៦០ឆ្នាំមុន និងដើម្បីលើកកម្ពស់ការយល់ដឹងរបស់ប្រជាពលរដ្ឋឲ្យបានស្គាល់ និងបានឃើញការសម្ដែងផ្ទាល់នៅលើឆាក ក៏ដូចជាឱកាសដល់សិល្បករជំនាន់ក្រោយបានបង្ហាញពីទេពកោសល្យក្នុងការតែងនិពន្ធ ដំឡើងរឿង និងសម្ដែងផងដែរ ។
កញ្ញាសុត ចន្ទដាលី ក្រុមការងារគ្រប់គ្រងផលិតកម្មនៃអង្គការសិល្បៈខ្មែរអមតៈ បានសម្ដែងចំណាប់អារម្មណ៍ថា «ពីក្រុមការងារ យើងពិតជាមានក្ដីរំភើបណាស់ ដោយបានធ្វើការជាមួយក្រុមសិល្បករប្រកបដោយទេពកោសល្យ ហើយរៀបចំការសម្ដែងមួយដ៏ពិសេសសម្រាប់ភ្ញៀវខ្មែរ ។ ខ្ញុំបានឃើញសន្ទុះការគាំទ្រយ៉ាងខ្លាំងពីទស្សនិកជន ។ ឆាករបស់យើងមានភ្ញៀវមកពេញទាំង២ថ្ងៃ ។ មួយទៀតយើងឃើញថា ជាការលើកទឹកចិត្ត ជាកម្លាំងចិត្ត ចំពោះវិស័យនេះតាមរយៈការចូលរួម និងការជួបជុំ ដ៏ល្អរវាងអ្នកនិពន្ធ សិល្បករ ជាមួយទស្សនិកជន បានជួបជជែក បង្ហាញការគាំទ្រ មតិយោបល់ដើម្បីស្ថាបនា ការសម្តែង និងការរៀបចំឲ្យកាន់តែប្រសើរឡើង »។
រឿងដែលយកមកសម្ដែងគឺជាស្នាដៃនិពន្ធថ្មី រឿង«ម្នាក់ឯងជាថ្មី» ជាស្នាដៃរបស់អ្នកគ្រូឆុន ស៊ីណា និង រឿង«គ្រូទាយ» ជាស្នាដៃរបស់កញ្ញាលឹម ផាន់ណា ។ ល្ខោនទាំង២នេះបានរំលេចតថភាពសង្គម ព្រមទាំងអារម្មណ៍គ្រប់បែបយ៉ាង មានស្រឡាញ់ ប្រច័ណ្ឌ ស្អប់ គ្រាំគ្រាចិត្ត វិប្បដិសារីយ៍ កំប្លុកកំប្លែង សំណើច ដែលធ្វើឲ្យទស្សនិកជនហាក់កំពុងស្ថិតក្នុងស្ថានភាពនោះដែរ ។
អ្នកនាងថន សីម៉ា ជាទស្សនិកជនបានបង្ហាញចំណាប់អារម្មណ៍ដូច្នេះថា «នេះជាលើកទីមួយក្នុងជីវិតខ្ញុំដែលបានឃើញការសម្ដែងល្ខោននិយាយដោយផ្ទាល់ ។ ពីមុនគ្រាន់តែបានឮតាមវិទ្យុ តែពេលមកមើលផ្ទាល់ ពិតជាប្លែកភ្នែក ហើយល្អមើលណាស់។ ជាពិសេសក្នុងឈុតដំបូង ខ្ញុំស្មានតែតួស្រី និងគ្រូទាយ លួចស្រលាញ់គ្នា ក្បត់ចិត្តប្ដី ? តាមពិតសាច់រឿងមិនមែនអុីចឹងទេ ។ ខ្ញុំសូមសរសើរការរៀបចំសាច់រឿងមើលទៅទាក់ទាញ គួរឲ្យចង់មើលម្ដងហើយ ម្ដងទៀតណាស់»។
លោកណេន ភារិទ្ធ ជាអ្នកដឹកនាំរឿង និងជាតួសម្ដែងផងនោះ បានបង្ហាញក្ដីរំភើបនៅពេលដែលលោកបានឃើញទស្សនិជនមកគាំទ្រពេញឆាក ទោះបីជាការសម្ដែងនេះរៀបចំធ្វើឡើងចំថ្ងៃធ្វើការ និងជាពិសេសសិស្ស-និស្សិតកំពុងរវល់ជាប់ប្រលងចុងឆ្នាំក៏ដោយ ។ លោកបានបញ្ជាក់ថា «នេះជាកម្លាំងចិត្តដ៏ធំសម្រាប់សិល្បករ នៅពេលដែលខ្លួនបង្ហាញស្នាដៃ ហើយមានអ្នកមើលយ៉ាងច្រើនដូច្នេះ ។ ការគាំទ្រយ៉ាងផុសផុលនេះនឹងជំរុញឲ្យសិល្បករ និងអ្នកជំនាញផ្នែកល្ខោននិយាយកាន់តែមានក្ដីសង្ឃឹម ហើយនឹងនាំមកជូនការសម្ដែងជាច្រើនផ្សេងទៀតផងដែរ»។
ស្នាដៃល្ខោននិយាយទាំង២រឿងនេះ នឹងសម្ដែងម្ដងទៀតក្នុងមហោស្រពសិល្បៈដើម្បីសន្តិភាព នៅខែវិច្ឆិកាខាងមុខ ៕ (កែសម្រួលដោយ ៖ បុប្ផា)
ចែករំលែកព័តមាននេះ