ការទិញផ្ទះមិនងាយស្រួលដូចការទិញរថយន្ត ឬជួលផ្ទះទេ ។ អ្នកត្រូវសួរខ្លួនឯងជាច្រើនសំណួរមុននឹងសម្រេចចិត្តថា វាជាផ្ទះដែលអ្នកចង់បាន ។ ប្រាកដណាស់ប្រជាជនខ្មែរយើងមានជម្រើសផ្ទះជាច្រើន ជាពិសេសតាមទីប្រជុំជនដូចជា ទីក្រុងភ្នំពេញ ប៉ុន្តែវាមិនប្រាកដថារាល់ជម្រើស…
ការទិញផ្ទះមិនងាយស្រួលដូចការទិញរថយន្ត ឬជួលផ្ទះទេ ។ អ្នកត្រូវសួរខ្លួនឯងជាច្រើនសំណួរមុននឹងសម្រេចចិត្តថា វាជាផ្ទះដែលអ្នកចង់បាន ។ ប្រាកដណាស់ប្រជាជនខ្មែរយើងមានជម្រើសផ្ទះជាច្រើន ជាពិសេសតាមទីប្រជុំជនដូចជា ទីក្រុងភ្នំពេញ ប៉ុន្តែវាមិនប្រាកដថារាល់ជម្រើស គឺជាជម្រើសល្អសម្រាប់អ្នកទេ ។ សម្រាប់អ្នកដែលទិញផ្ទះដំបូង អ្នកត្រូវតែដឹងពីមេរៀនសំខាន់ៗខាងក្រោមជាមុនសិន មុននឹងសម្រេចចិត្តទិញផ្ទះដែលអ្នកកំពុងតែចាប់អារម្មណ៍ ។
១. កុំឆាប់ស្រលាញ់ផ្ទះនោះពេក
ពេលដែលកំពុងស្វែងរកផ្ទះ អ្នកមិនគួរឆាប់ស្រលាញ់ផ្ទះភ្លាមទេ ព្រោះវាធ្វើឲ្យយើងងងឹតងងុលពេលដែលធ្វើការសម្រេចចិត្ត ។ អ្នកគួរតែចេះគិតឲ្យបានច្បាស់លាស់ និងជ្រើសរើសតាមសមត្ថភាពដែលខ្លួនមាន ។ លើសពីនេះទៅទៀត អ្នកមិនគួរជ្រើសយកផ្ទះដែលហួសសមត្ថភាពរបស់អ្នកទេ ព្រោះវានឹងបង្កជាបញ្ហាច្រើនទៀតនៅថ្ងៃក្រោយ ។
២. កុំធ្លាក់ក្រោមសម្ពាធបង្ខំឲ្យទិញ
ភ្នាក់ងារអចលនទ្រព្យ ឬម្ចាស់ផ្ទះតែងតែចូលចិត្តនិយាយថា មានអតិថិជនជាច្រើនដែលកំពុងមើល និងចាប់អារម្មណ៍លើអចលនទ្រព្យនេះ ដូចអ្នកដែរ ហើយមនុស្សជាច្រើនតែងតែធ្លាក់ក្រោមសម្ពាធឲ្យទិញមុននឹងបាត់បង់ឱកាសល្អនេះ ។ វាជារឿងធម្មតាមួយក្នុងទីផ្សារ តែក៏មិនមែនមានន័យថា អ្នកត្រូវតែធ្លាក់ចូលក្នុងអន្ទាក់នេះជារៀងរាល់ពេលទេ ព្រោះវាអាចក្លាយជាកំហុសឆ្គងដ៏ធំមួយរបស់អ្នក ។ ចូរធ្វើការគិតគូឲ្យបានគ្រប់ជ្រុងជ្រោយជាមុនសិន មុននឹងទាក់ទងទៅកាន់ភ្នាក់ងារលក់ ឬម្ចាស់ផ្ទះ ។
៣. ជ្រើសផ្ទះដែលសាកសមនឹងជីវភាពរបស់អ្នក
មនុស្សគ្រប់រូបតែងតែមានផ្ទះក្នុងក្តីសុបិនរបស់ខ្លួន ប៉ុន្តែវាមិនមែនមានន័យថា វាត្រូវតែជាផ្ទះដែលសាកសមនឹងជីវភាពរបស់អ្នកទេ ។ ឧទាហរណ៍ដូចជា អ្នកប្រាថ្នាចង់រស់នៅក្នុងផ្ទះវីឡានៅជាយក្រុង ប៉ុន្តែអ្នកធ្វើការក្នុងក្រុងមួយថ្ងៃ៨ម៉ោង និងត្រូវចេញពីផ្ទះពីព្រលឹមជារៀងរាល់ថ្ងៃជាដើម ។ ក្នុងករណីនេះ ផ្ទះវីឡាប្រហែលជាមិនសាកសមនឹងអ្នកឡើយ ព្រោះអ្នកត្រូវចំណាយពេលច្រើន ដើម្បីធ្វើដំណើរចូលក្រុង ហើយអ្នកក៏មិនសូវមានពេលវេលានៅផ្ទះផង ។
ជម្រើសផ្ទះដ៏ល្អបំផុត គឺជាផ្ទះដែលជួយសម្របសម្រួលជីវភាពរស់នៅរបស់អ្នក មិនមែនបង្កជាបញ្ហាបន្ថែមដល់អ្នកទេ ៕ កែសម្រួលដោយ ៖ សុឃាក់
ចែករំលែកព័តមាននេះ