ខេត្តកំពង់ឆ្នាំង ៖ ក្រុមឈ្មួញដឹកឈើទាំងនេះ បានយកលេសថា ទិញឈើពីខេត្តពោធិ៍សាត់យកទៅធ្វើផ្ទះសម្បែងនៅឯស្រុកផ្សេងៗ ក្នុងខេត្តកំពង់ឆ្នាំង ។ ប៉ុន្តែតាមការពិត គឺគេដឹកជញ្ជូនឈើនេះ រាប់ឆ្នាំមកហើយ យកទៅបោះលក់ឲ្យដេប៉ូផ្សេងៗនៅក្នុងខេត្តកំពង់ឆ្នាំង មានដូចជាក្នុងក្រុងកំពង់ឆ្នាំង ស្រុកកំពង់ត្រឡាច ស្រុកសាមគ្គីមានជ័យ ខ្លះរហូតលក់ដូរទៅដល់ខេត្តកំពង់ស្ពឺថែមទៀតផង ។
សូមរំលឹកថា កងអន្តរាគមន៍នៃស្នងការដ្ឋាននគរបាលខេត្ត និងសមត្ថកិច្ចផែនសេដ្ឋកិច្ច ដឹកនាំដោយលោក ជិន សុផាត បានចុះបង្ក្រាបគោយន្តដឹកឈើអត់ច្បាប់ចំនួន២គ្រឿង រួមនឹងមនុស្ស៣នាក់ រួចនាំមកកាន់ខណ្ឌរដ្ឋបាលព្រៃឈើកំពង់ឆ្នាំង កាលពីវេលាម៉ោងប្រមាណ១រសៀលថ្ងៃទី៣០ ខែមិថុនា ។
សមត្ថកិច្ចបានឲ្យដឹងថា គោយន្ដទាំង២គ្រឿងនេះ ដឹកឈើអត់ច្បាប់ចេញពីខេត្តពោធិ៍សាត់ ឆ្លងកាត់ឃុំក្តុលសែនជ័យ ស្រុកទឹកផុស និងត្រូវបានសមត្ថកិច្ចឃាត់ចាប់នៅចំណុចវាលស្បូវ នាវេលាម៉ោង៤ទៀបភ្លឺថ្ងៃទី៣០ ខែមិថុនា ។ ករណីដឹកជញ្ជូនឈើតាមគោយន្តដែលគ្មានច្បាប់ឆ្លងកាត់ទឹកដីឃុំក្តុលសែនជ័យ ឃើញថា មិនមែនមានត្រឹមតែ១ទៅ២គោយន្តប៉ុណ្ណោះទេ ជារៀងរាល់យប់យ៉ាងហោចបំផុតក៏ចាប់ពី១០ទៅ១៥គោយន្តដែរ ។
អ្នកបើកបរគោយន្តទាំងអស់នេះ អាចត្រឹមតែជាអ្នកស៊ីឈ្នួលដឹកឈើឲ្យឈ្មួញនៅក្នុងខេត្តកំពង់ឆ្នាំងប៉ុណ្ណោះ ។ ប៉ុន្តែក្រុមឈ្មួញដឹកឈើខាងលើនិយាយថា ពួកគាត់ទិញឈើនេះ នៅខេត្តពោធិ៍សាត់ យកទៅ
ធ្វើផ្ទះនៅឯឃុំក្រាំងល្វា ស្រុកសាមគ្គីមានជ័យ ខេត្តកំពង់ឆ្នាំង ៕ (សម្រួលដោយ៖ ស្រីណា)
ចែករំលែកព័តមាននេះ