រាជធានីភ្នំពេញ ៖ មន្ត្រីជាន់ខ្ពស់ក្រសួងសាធារណៈការ និងដឹកជញ្ជូនបានឲ្យដឹងថា មូលហេតុដែលធ្វើឲ្យមានការកកស្ទះចរាចរណ៍នៅកំពង់ផែក្រុងភ្នំពេញដោយសារ តែយានយន្តមួយចំនួនគ្មានឯកសារគ្រប់គ្រាន់ ហើយមិនហ៊ានបើកចេញចូល ថ្លែងក្នុងសន្និសីទសារព័ត៌មានស្តីពីស្ថានភាពនៃការអនុវត្តយន្តការចុះត្រួតពិនិត្យលក្ខណៈបច្ចេកទេសយានយន្ត និងបណ្ណបើកបររបស់អ្នកបើកបររថយន្ត ដឹកទំនិញចេញចូលកំពង់ផែស្វយ័តក្រុងព្រះសីហនុ និងកំពង់ផែស្វយ័តភ្នំពេញនាព្រឹកថ្ងៃទី២ ខែកក្កដានេះ ។
នៅទីស្តីការក្រសួងលោកសេង ឈួន រដ្ឋលេខាធិការ និងជាប្រធានក្រុមការងារត្រួតពិនិត្យរឹតបន្តឹងការអនុវត្តច្បាប់ស្តីពីចរាចរណ៍ផ្លូវគោកនៃក្រសួងសាធារណៈការ និងដឹកជញ្ជូនបានបញ្ជាក់ថា ៖ «ចំពោះយានយន្តធន់ធ្ងន់ដែលដឹកចូលកំពង់ផែតាមពិនិត្យ និងអង្កេតយើងឃើញទាំងអស់គ្នា ហើយនៅកំពង់ផែភ្នំពេញកន្លងមកនេះមានការកកស្ទះចរាចរណ៍ដោយសារមានរថយន្តមិនមានឯកសារគ្រប់គ្រាន់ ដូច្នេះហើយមិនហានចេញ ឬចូល ។ ចំណែករថយន្តដែលមានឯកសារគ្រប់គ្រាន់អាចចេញចូលស្រួល» ។
លោកបានបន្តថា ៖«រថយន្តដែលមិនហ៊ានចេញចូលនោះ ដោយសារខ្វះនេះ ខ្វះនោះ ខ្វះប័ណ្ណបើកបរ ខ្វះសៀវភៅឈៀក ខ្វះស្លាកលេខ ។ ចំណែកផ្នែកបច្ចេកទេសវិញខ្លះខ្វះប៊ូឡុង ឬខៅ្ច មិនគ្រប់ចំនួនជាដើម» ។ លោក សេង ឈួន បានឲ្យដឹងថា នៅពេលមានការត្រួតពិនិត្យឃើញមានការខ្វះចំន្លោះចំពោះយានយន្តបានធ្វើឲ្យអ្នកបើកបរមួយចំនួនថតចោលក៏មានទើប បណ្តាឲ្យមានការកកស្ទះចរាចរណ៍ ។
លោកសេង ឈួន ក៏បានឲ្យបានឆ្លើយតបចំពោះម្ចាស់ក្រុមហ៊ុនមួយចំនួនថា ការកកស្ទះចរាចរណ៍បានធ្វើឲ្យមានយឹតយ៉ាវទំនិញដោយសារ សមត្ថកិច្ចគ្រប់គ្រងត្រួតពិនិត្យយកលុយ នោះ ខ្ញុំសូមជម្រាបថា ឯកសារផាកពិនិត្យមានទាំងអស់ ហើយពីចំនួនប៉ុន្មាន មានក្នុងក្រឹត្យលេខ៤៤ហើយ ។
លោករដ្ឋលេខាធិកាក៏បានលើកឡើងថា គ្រោះថ្នាក់ដែលបណ្តាលមនុស្សស្លាប់នោះដោយសារតែអ្នកខ្លះបើកបរគ្មានប័ណ្ណបើកបរប្រើប្រាស់គ្រឿងស្រវឹង គ្រឿងញៀនជាដើម ។ លោកក៏បានអំពាវនាវដល់ម្ចាស់ក្រុមហ៊ុនគោរពច្បាប់ចរាចរណ៍បានឲ្យបានទាំងអស់គ្នា ៕ កែសម្រួលដោយ ៖សុឃាក់
ចែករំលែកព័តមាននេះ