រាជធានីភ្នំពេញ ៖ វេជ្ជបណ្ឌិតជំនាញផ្នែកប្រព័ន្ធទឹកនោម មកពីទីក្រុងបាងកកប្រទេសថៃ បានផ្ដល់ជាចំណុចមួយចំនួន ដល់ប្រជាពលរដ្ឋកម្ពុជា ដើម្បីការពារជំងឺក្រួសក្នុងតម្រងនោម ខណៈជំងឺនេះក៏មានអត្រាខ្ពស់ នៅក្នុងប្រទេសកម្ពុជា ។…
រាជធានីភ្នំពេញ ៖ វេជ្ជបណ្ឌិតជំនាញផ្នែកប្រព័ន្ធទឹកនោម មកពីទីក្រុងបាងកកប្រទេសថៃ បានផ្ដល់ជាចំណុចមួយចំនួន ដល់ប្រជាពលរដ្ឋកម្ពុជា ដើម្បីការពារជំងឺក្រួសក្នុងតម្រងនោម ខណៈជំងឺនេះក៏មានអត្រាខ្ពស់ នៅក្នុងប្រទេសកម្ពុជា ។
ថ្លែងនៅក្នុងសិក្ខាសាលាស្ដីពីជំងឺប្រព័ន្ធទឹកនោម និងអត្ថប្រយោជន៍នៃម៉ាស៊ីនបាញ់ក្រួសតម្រងនោម កាលពីព្រឹកថ្ងៃទី២៩ រៀបចំឡើងនៅមន្ទីរពេទ្យរ៉ូយ៉ាល់ភ្នំពេញ លោកវេជ្ជបណ្ឌិត Damrongpan Watanachote វេជ្ជបណ្ឌិតជំនាញប្រព័ន្ធតម្រងនោមមកពីមន្ទីរពេទ្យទីក្រុងបាងកកប្រទេសថៃ បានមានប្រសាសន៍ថា ជំងឺក្រួសក្នុងតម្រងនោម ជាជំងឺដែលកើតច្រើនទៅលើមនុស្សជាច្រើនក្នុងប្រទេសកម្ពុជា និងប្រទេសជិតខាង ហើយវាកើតឡើងដោយសារតែកត្តាខ្លួនយើងផ្ទាល់ ។
លោកវេជ្ជបណ្ឌិតបានផ្ដល់ជាអនុសាសន៍៥ចំណុច ដើម្បីការពារខ្លួនពីជំងឺក្រួសក្នុងតម្រងនោម និងបញ្ហាប្រព័ន្ធតម្រងនោម ដោយទី១ ត្រូវញ៉ាំទឹកឱ្យបានច្រើន ព្រោះទឹកជាសារធាតុរាវដែលអាចលាងសម្អាតតម្រងនោមមិនឱ្យមានបញ្ហា ។ ក្នុងមួយថ្ងៃគួរញ៉ាំទឹកអោយបានយ៉ាងតិច ២លីត្រ និងច្រើនជាងនេះកាន់តែប្រសើរ ។ បន្ទាប់មកទៀត គួរហាត់ប្រាណឱ្យបានញឹកញាប់ និងទៀងទាត់ ហើយការហាត់ប្រាណនេះដែរ មិនចាំបាច់ទាល់តែលេងកីឡា ឬលំហាត់ប្រាណធ្ងន់ធ្ងរឡើយ គ្រាន់តែធ្វើចលនាដោយខ្លួនឯងនៅផ្ទះ ឬធ្វើឱ្យរាងកាយមានចលនា មិននៅស្ងៀមក៏បានដែរ ។
កត្តាមួយទៀតនោះ គឺទាក់ទងនឹងការរបបអាហារដែលគួរយល់ដឹងផងដែរ ។ លោកថា «បើចង់ជៀសឱ្យឆ្ងាយពីជំងឺក្រួសក្នុងតម្រងនោម គួរតែទទួលទានបន្លែចម្រុះពណ៌ មានន័យថា គួរបរិភោគបន្លែឱ្យបានច្រើនប្រភេទ និងគួរជៀសវាងបរិភោគជាតិសាច់ច្រើនពេក ជាពិសេសស្ទេក ព្រោះអាហារទាំងនេះជាកត្តារួមផ្សំមួយបង្កឱ្យកើតជំងឺក្រួសក្នុងតម្រងនោម» ។
លោកវេជ្ជបណ្ឌិតបានបន្ថែមថា ការធ្វើចិត្តឱ្យនឹងនរ រឺធ្វើចិត្តឱ្យសប្បាយកាត់បន្ថយនូវការស្ត្រេស
ផ្សេងៗ ព្រោះការតប់ប្រមល់ច្រើន ពិបាកចិត្តច្រើន គិតច្រើនក៏ជាកត្តានាំអោយកើតជំងឺគ្រួសក្នុងតម្រង
នោមដែរ ដូច្នេះហើយគួរតែធ្វើចិត្តឱ្យសប្បាយ ធ្វើសម្មាធិ ដើម្បីកាត់បន្ថយការគិត ។
លោកវេជ្ជបណ្ឌិត សៅ រ៉ាវី វីរ៉ាសុផន វេជ្ជបណ្ឌិតជំនាញមកពីមន្ទីរពេទ្យបាងកកប្រទេសថៃ ក៏បានឱ្យដឹងផងដែរ បច្ចុប្បន្ននេះ ការព្យាបាលជំងឺក្រួសក្នុងតម្រងនោម លែងធ្វើឱ្យអ្នកជំងឺពិបាក ឬ ត្រូវសម្រាកនៅក្នុងមន្ទីរពេទ្យយូរទៀតហើយ ។ នៅទីក្រុងបាងកក បានប្រើបច្ចេកវិទ្យាបាញ់បំបែកក្រួសក្នុងតម្រងនោមបានជោគជ័យ និងប្រសិទ្ធភាព មិនធ្វើឱ្យមានរបួសស្នាមដល់អ្នកជំងឺហើយអ្នកជំងឺក៏មិនចាំបាច់គេងសម្រាកនៅមន្ទីរពេទ្យទៀតនោះដែរ ។ បច្ចុប្បន្ន បច្ចេកវិទ្យានោះ ក៏ត្រូវបានមន្ទីរពេទ្យរ៉ូយ៉ាល់យកមកអនុវត្តន៍ និងរង់ចាំជួយដល់អ្នកជំងឺក្នុងប្រទេសកម្ពុជាផងដែរ ។
គួរបញ្ជាក់ថា មន្ទីរពេទ្យរ៉ូ់យ៉ាល់ភ្នំពេញ ដែលមានដៃគូររបស់ខ្លួននៅប្រទេសថៃនោះ តែងតែអញ្ជើញវេជ្ជបណ្ឌិតជំនាញពីប្រទេសថៃ មកធ្វើបទបង្ហាញនូវជំងឺ និងការ ការពារជំងឺទាំងនោះ ដល់ប្រជាពលរដ្ឋកម្ពុជាឱ្យបានយល់ដឹងផងដែរ ៕ ដោយសហការ (កែសម្រួលដោយ ៖ បុប្ផា)
ចែករំលែកព័តមាននេះ