ខេត្តកំពង់ធំ ៖ បើតាមសេចក្តីរាយការណ៍បឋមបានឲ្យដឹងថា មានបុរសម្នាក់ដេកស្លាប់ក្នុងថ្លុកឈាមលើម៉ូតូមួយគ្រឿង ក្នុងកសិដ្ឋានចំការកៅស៊ូមួយកន្លែង ដែលគេដាក់ការសង្ស័យថា ជាអំពើឃាតកម្មមួយ បង្កឱ្យមានការភ្ញាក់ផ្អើលកើតឡើងនៅលើផ្លូវលំក្រួសក្រហមក្នុងចំការកៅស៊ូកសិដ្ឋានទី៣ របស់ក្រុមហ៊ុនតានបៀនកំពង់ធំអភិវឌ្ឍន៍កៅស៊ូ កាលពីម៉ោង៤ទៀបភ្លឺឈានចូលថ្ងៃទី២ ខែកក្កដា ឆ្នាំ២០១៩ ស្ថិតក្នុងភូមិថ្មសំលៀង ឃុំក្រយា ស្រុកសន្ទុក ខេត្តកំពង់ធំ ។
សេចក្តីរាយការណ៍បន្តថា ជនរងគ្រោះខាងលើឈ្មោះ ដង ថាន់ហាយ ភេទប្រុស អាយុ៥២ ឆ្នាំ ជនជាវៀតណាម មុខរបរជាបុគ្គលិកក្រុមហ៊ុនចំការកៅស៊ូ ស្នាក់នៅក្នុងកសិដ្ឋានទី៣ របស់ក្រុមហ៊ុនតានបៀន។
បើតាមសាក្សីបានបញ្ជាក់ប្រាប់សមត្ថកិច្ចឲ្យដឹងថា នៅម៉ោងកើតហេតុខាងលើ គេបានឃើញជនរងគ្រោះដេកស្លាប់ក្នុងថ្លុកឈាមនៅលើម៉ូតូម៉ាកវ៉េវ ពណ៌ខ្មៅមួយគ្រឿង ដែលមានពាក់ស្លាករបស់ប្រទេសវៀតណាម លេខ៧០ S2.៥៣៣២ នៅលើផ្លូវក្នុងកសិដ្ឋានចំការកៅស៊ូតានបៀន ។ ឃើញដូច្នោះ គេក៏បានរាយការណ៍ជូនសមត្ថកិច្ចមូលដ្ឋាន ដើម្បីជ្រាបជាព័ត៌មាន ទើបពេលនោះសមត្ថកិច្ចបានចុះទៅដល់កន្លែងកើតហេតុតែម្តង ។
ភ្លាមៗនោះសាក្សីមិនបានបញ្ជាក់អំពីមូលហេតុនៃអំពើឃាតកម្មនោះ ផ្តើមចេញពីអ្វីនៅឡើយទេ ចំណែកសមត្ថកិច្ចកំពុងដុតដៃដុតជើងធ្វើការស្រាវជ្រាវលើករណីនេះហើយ ប៉ុន្តែទោះជាយ៉ាងណា សមត្ថកិច្ចបានសន្និដ្ឋានជាជំហ៊ានដំបូងថា ចំពោះការស្លាប់បាត់បង់អាយុជីវិតរបស់បុគ្គលិកក្រុមហ៊ុនចំការកៅស៊ូតានបៀនកំពង់ធំនោះ ជាអំពើឃាតកម្ម ៕ (កែសម្រួលដោយ ៖ បុប្ផា)
ចែករំលែកព័តមាននេះ