កត្តាសំខាន់ក្នុងការរៀបចំគម្រោងចំណូល និងចំណាយបានល្អ គឺការវាយតម្លៃវា និងកែសម្រួលជាប្រចាំ ។ ការវាយតម្លៃគម្រោងចំណូល និងចំណាយ គឺពិតជាសំខាន់ ប្រសិនបើអ្នកចង់សម្រេចគោលដៅដែលបានកំណត់ ។ ប៉ុន្តែគោលដៅ និងតម្រូវការរបស់អ្នកតែងតែផ្លាស់ប្តូរតាមពេលវេលា ដូច្នេះអ្នកក៏គួរតែធ្វើការកែសម្រួលគម្រោងតាមស្ថានការដែរ ។ ជាទូទៅអ្នកគួរតែវាយតម្លៃវាជារៀងរាល់ខែ ឬមួយឆ្នាំម្តងយ៉ាងតិច ។
ជាដំបូងអ្នកគួរតែសួរខ្លួនឯងសិនថា តើអ្នកមានគោលដៅហិរញ្ញវត្ថុអ្វីខ្លះ ? តើវាផ្លាស់ប្តូរតាមពេលវេលាឬទេ ? ឧទាហរណ៍ដូចជា អ្នកមានគោលបំណងចង់បើកហាងកាហ្វេមួយ ប៉ុន្តែដោយសារតែទីផ្សារមានការប្រកួតប្រជែងគ្នាខ្លាំងពេកក៏អ្នកបោះបង់វាចោល ហើយពេលនេះអ្នកមានប្រាក់សន្សំដែលមិនត្រូវបានប្រើប្រាស់ ។ បន្ទាប់មកជ្រើសយកគោលដៅបីដែលអ្នកចង់សម្រេច ។ រួចអ្នកត្រូវវាយតម្លៃថា គម្រោងរបស់អ្នកជួយដល់អ្នកក្នុងការសម្រេចគោលដៅទាំងបីឬទេ? ប្រសិនបើគោលដៅរបស់អ្នកត្រូវបានផ្លាស់ប្តូរគម្រោងរបស់អ្នកក៏គួរតែមានបម្លាស់ប្តូរដែរ ។
កត្តាសំខាន់ គឺស្វែងរកកន្លែងដែលអ្នកអាចធ្វើឲ្យគម្រោងរបស់អ្នកកាន់តែប្រសើរឡើងបាន ។ ឧទាហរណ៍ដូចជា ប្តូរធនាគារទៅធនាគារដែលផ្តល់ការប្រាក់ខ្ពស់ជាងមុនជាដើម ។ ឬកាត់បន្ថយការចំណាយផ្សេងៗ ប្រសិនបើអ្នកគិតថា អ្នកអាចស្វែងរកជម្រើសល្អជាងមុនបានដូចជា ឈប់ទទួលទានអាហារថ្ងៃត្រង់នៅកន្លែងធ្វើការ និងខ្ចប់អាហារពីផ្ទះវិញ ។
ចុងក្រោយ គឺអ្នកគួរតែត្រួតពិនិត្យមើលគម្រោងថ្មីរបស់អ្នកសាជាថ្មីនៅចុងខែ ព្រោះវាជួយឲ្យអ្នកដឹងថា គម្រោងថ្មីពិតជាល្អជាងមុនឬទេ ឬវាត្រូវការកែសម្រួលថែមទៀត ។ ដំណើរការនៃការវាយតម្លៃ និងកែសម្រួលគួរតែជាទម្លាប់ប្រចាំខែសម្រាប់អ្នក ដើម្បីគ្រប់គ្រងស្ថានការហិរញ្ញវត្ថុឲ្យបានប្រសើរជាងមុន ។
បើសិនជាអាចអ្នកគួរតែមើលចំណូល និងចំណាយប្រចាំឆ្នាំរបស់អ្នកផងដែរ ដើម្បីដឹងច្បាស់ពីទម្លាប់ចាយវាយរបសអ្នក ។ ប្រសិនបើអ្នកមានដៃគូអ្នកមិនគួររៀបចំគម្រោងនេះតែម្នាក់ឯងទេ ។ ព្យាយាមពិភាក្សាពីចំណូល និងចំណាយយ៉ាងតិចណាស់ ក៏ប៉ុន្មានសប្តាហ៍ម្តងដែរ ដើម្បីជៀសវាងជម្លោះ ឬបង្កការប៉ះពាល់ដល់ទំនាក់ទំនងគ្នា ៕ កែសម្រួលដោយ ៖ សុឃាក់
ចែករំលែកព័តមាននេះ