រាជធានីភ្នំពេញ ៖ ក្នុងចំណោមកីឡាករកម្ពុជាទាំង៤រូបមានតែម៉ឺន មេឃា មកពីក្លិបក្រសួងសេដ្ឋកិច្ចនិងហិរញ្ញវត្ថុម្នាក់ប៉ុណ្ណោះដែលមានឱកាសឡើងទៅប្រកួតនៅវគ្គបន្តជាមួយកីឡាករថៃ៣រូបផ្សេងទៀតក្នុង
ព្រឹត្តិការណ៍ប្រកួតដណ្ដើមខ្សែក្រវាត់កម្ពុជាគុនខ្មែរក្នុងប្រភេទទម្ងន់៦០គីឡូក្រាមនៅលើសង្វៀនស៊ីអិនស៊ីបន្ទាប់ពីគេផ្ដួលកីឡាករថៃកាលពីថ្ងៃទី២៩ មិថុនា កន្លងមកនេះ។
គួររំលឹកផងដែរថា ការប្រកួតធ្វើឡើងចំនួន២សប្ដាហ៍រួចមកហើយដែលកាលពីសប្ដាហ៍ទី១មានកីឡាករកម្ពុជាចំនួន២រូបបានធ្លាក់ចេញពីកម្មវិធីមួយនេះគឺកីឡាករ ឡូញ វ៉ាន់ឌី មកពីក្លិបវិបុលដារិទ្ធខណ្ឌពោធិសែនជ័យ និងកីឡាករ អេលីត សាន់ មកពីក្លិបឆ្មាសសែនសុខគុនខ្មែរ។
នៅក្នុងសប្ដាហ៍នេះទៀត កីឡាករ សេន កុសលមកពីក្លិបមោងឬស្សីមរតកគុនខ្មែរខេត្តបាត់ដំបង ក៏ត្រូវជ្រុះចេញពីកម្មវិធីនេះដែរ ។ ដូច្នេះកីឡាករកម្ពុជា មានតែម៉ឺន មេឃា ម្នាក់ប៉ុណ្ណោះដែលមានសំណាងបានឡើងប្រកួតនៅវគ្គបន្តបន្ទាប់បីគេវាយកីឡាករថៃ យ៉តនិយម ភុំផាន់មួង ឱ្យបោះបង់ចោលការប្រកួតនៅត្រឹមទឹកទី៤។
ទោះជាយ៉ាងណា សម្រាប់ការឡើងទៅប្រកួតនៅវគ្គពាក់កណ្ដាលផ្ដាច់ព្រ័ត្រជាបន្តទៀតនោះ ម៉ឺន មេឃា មិនទាន់ដឹងថាយ៉ាងណានោះដែរ ដោយសារគេត្រូវប្រឈមតតាំងជាមួយកីឡាករថៃជើងខ្លាំងចំនួន៣រូបផ្សេងទៀតតែមិនទាន់ដឹងថាត្រូវប៉ះជាមួយអ្នកណាម្នាក់នោះទេ ដោយសារតែគណៈកម្មការរៀបចំការប្រកួតតម្រូវឱ្យចាប់ឆ្នោតរើសគូប្រកួតជាមុនសិន ។
អ្នកដែលបានឡើងមកដល់វគ្គនេះសុទ្ធតែត្រូវទទួលបានប្រាក់រង្វាន់លើកទឹកចិត្តដូចគ្នា គ្រាន់តែគណៈកម្មការរៀបចំការប្រកួតតម្រូវយកតែអ្នកជាប់លេខ១ប៉ុណ្ណោះ ដើម្បីឡើងទៅប្រកួតនៅវគ្គផ្ដាច់ព្រ័ត្រជាមួយក្រុមផ្សេងដណ្ដើមយកពានរង្វាន់កម្ពុជាសង្វៀនគុនខ្មែរ៕ (កែសម្រួលដោយ ៖ បុប្ផា)
ចែករំលែកព័តមាននេះ