រាជធានីភ្នំពេញ ៖ បញ្ជាការកងទ័ពជើងទឹកបង្កើនសមត្ថភាពត្រៀមជួយសង្គ្រោះប្រជាពលរដ្ឋ ក្នុងគ្រាមានគ្រោះទឹកជំនន់ ឬគ្រោះមហន្តរាយផ្សេងៗភ្លាមៗសំដៅនាំមកនូវសុវត្ថិភាពអាយុជីវិតរបស់ប្រជាពលរដ្ឋក៏ដូចជា សុខសន្តិភាព សម្រាប់សង្គមជាតិ ។ ពិធីបិទវគ្គហ្វឹកហ្វឺនបំប៉នយុទ្ធវិធីប្រយុទ្ធថ្នាក់កងអនុសេនាតូច វគ្គហ្វឹកហ្វឺនបំប៉នជំនាញ បើកបរ-ថែទាំនាវា និងអូរប័រវគ្គហ្វឹកហ្វឺនបំប៉នជំនាញរោងជាង-ដុក (ទន្លេ) និងបើកវគ្គហ្វឹកហ្វឺនជំនាញសង្គ្រោះគ្រោះមហន្តរាយ ឆ្នាំ២០១៩ នៅព្រឹកថ្ងៃទី១ ខែកក្កដានេះ នៅទីបញ្ជាការកងទ័ពជើងទឹក ។
លោកនាយឧត្តមនាវី ទៀ វិញ អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងទឹក និងជាអគ្គលេខាធិការនៃគណៈកម្មាធិការជាតិសន្តិសុខលំអសមុទ្របានឲ្យដឹងថា បញ្ជាការដ្ឋានកងទ័ពជើងទឹកបានហ្វឺកហាត់ជំនាញយុទ្ធវិធី និងជំនាញបច្ចេកទេសឲ្យមានជំនាញច្បាស់លាស់តាមកម្រិតស្តង់ដារជាមួយការត្រៀមលក្ខណៈបម្រុងនូវឧបករណ៍ សម្ភារ មធ្យោបាយ ស្បៀងអាហារ ដើម្បីដោះស្រាយទាន់ពេលវេលា និងការពារគ្រោះទឹកជំនន់ និងគ្រោះមហន្តរាយផ្សេងៗដែលកើតមានឡើងនៅកម្ពុជា ។
លោកនាយឧត្តមនាវី ទៀ វិញ បានជំរុញឲ្យកងកម្លាំងកងទ័ពជើងទឹកទាំងអស់រៀបចំកម្លាំង និងមធ្យោបាយ ដើម្បីធ្វើការសង្គ្រោះគ្រោះមហន្តរាយផ្សេងៗភ្លាមៗបន្ថែមពីលើភារកិច្ចការពារបូរណភាពដែនដី ដែនអាកាស ដែនទឹក ដែនកោះ ឆ្នេរ លំអសមុទ្រ ដើម្បីនាំមកសុខសន្តិភាព សុវត្ថិភាពសង្គមទប់ស្កាត់បង្ក្រាបអំពើភេរវកម្ម និងបទល្មើសនានាដែលបង្កដល់អស្ថិរភាពសង្គម ។
សូមបញ្ជាក់ថា សិក្ខាកាមដែលចូលហ្វឹកហ្វឺនបំប៉នជំនាញបច្ចេកទេសបើកបរ និងថែទាំនាវា-អូប័រ ក្នុងរយៈពេល៣ខែកន្លងទៅនេះមានសរុប១១០នាក់ ។ សិក្ខាកាមហ្វឹកហ្វឺនបំប៉នជំនាញបច្ចេកទេសជួសជុលម៉ាស៊ីនបច្ចេកទេស បច្ចេកទេសអគ្គិសនី បច្ចេកទេសជួសជុលដុក លំហាត់របៀប និងអប់រំចិត្តសាស្ត្រមានសរុប៦០នាក់ ខណៈសិក្ខាកាម១១០នាក់ទៀតបានហ្វឹកហាត់លើមុខជំនាញផែនទីជើងគោក និងត្រីវិស័យយុទ្ធវិធីថ្មើរជើង បច្ចេកទេសអាវុធថ្មើរជើង អប់រំចិត្តសាស្ត្រ និងលំហាត់របៀប ។ ព្រមជាមួយនេះ អង្គភាពកងទ័ពជើងទឹក ក៏បានបើកវគ្គហ្វឹកហ្វឺនជំនាញសង្គ្រោះគ្រោះមហន្តរាយ ដែលមានសមាសភាពហ្វឹកហាត់ជានាយនាវី នាយនាវីរង និងពលនាវឹកចំនួន២៥០នាក់ រយៈពេល៦១ថ្ងៃផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ