រាជធានីភ្នំពេញ ៖ រដ្ឋសភាបានអនុម័តយល់ព្រមអនុញ្ញាតឲ្យក្រុមហ៊ុនអេសភីអេចភី (ខេមបូឌា) ឯ.កធ្វើការវិនិយោគគម្រោងវារីអគ្គសិនីពោធិសាត់១ ដែលនឹងដាក់ឲ្យដំណើរការនៅឆ្នាំ២០២៣ ខាងមុខនេះ ។ រដ្ឋសភាអនុញ្ញាតយល់ព្រមឲ្យក្រុមហ៊ុនអេសភីអេចភី (ខេមបូឌា) ឯ.ក ធ្វើតាមរយៈការអនុម័តសេចក្តីព្រាងច្បាប់ស្តីពីការអនុម័តយល់ព្រមលើការធានាទូទាត់របស់រាជរដ្ឋាភិបាលនៃព្រះរាជាណាចក្រឲ្យក្រុមហ៊ុនអេសភីអេចភី (ខេមបូឌា) ឯ.ក នាព្រឹកថ្ងៃទី១ ខែកក្កដានេះ ក្រោមអធិបតីភាពសម្តេច ហេង សំរិន ប្រធានរដ្ឋសភា ដោយមានសមាជិករដ្ឋ សភាលើកដៃអនុម័តជាឯកច្ឆ័ន្ទ ដោយសម្លេង១១២នៃសំឡេងសមាជិកដែលចូលរួមទាំងអស់ ។
សេចក្តីព្រាងច្បាប់មាន៣មាត្រា ត្រូវបានអានដោយលោក ជាម យៀប ប្រធានគណៈកម្មការសេដ្ឋកិច្ចហិរញ្ញវត្ថុ និងសាវនកម្មនៃររដ្ឋសភា ។ លោកជាម យៀប បានលើកឡើងថា សេចក្តីព្រាងច្បាប់នេះធ្វើឡើងស្របពេលដែលប្រទេសជាមានសុខសន្តិភាព និងស្ថេរភាពនយោបាយ ធ្វើឲ្យសេចក្តីជាតិលើគ្រប់វិស័យ និងបានលើកកម្រិតជីវភាពប្រជាពលរដ្ឋឲ្យកាន់តែប្រសើរឡើងជាលំដាប់ ។ លោកថា សេចក្តីព្រាងច្បាប់នេះក៏បង្ហាញពីការយកចិត្តទុកដាក់របស់រាជរដ្ឋាភិបាលក្នុងការជំរុញការអភិវឌ្ឍន៍វិស័យថាមពលទាំងប្រភពថាមពល និងបណ្តាញបញ្ជូនអគ្គិសនី ដើម្បីធានាការផ្គត់ផ្គង់អគ្គិសនីឲ្យបានគ្រប់គ្រាន់មាននិរន្តភាព ស្ថិរភាព ប្រសិទ្ធភាព និងមាន តម្លៃសមរម្យ ។
លោកជាម យៀប ក៏បានឲ្យដឹងថា តាមរយៈច្បាប់នេះរាជរដ្ឋាភិបាលបានសម្រេចឲ្យក្រុមហ៊ុនអេសភីអេចភី (ខេមបូឌា) ឯ.ក មានឈ្មោះដើម KTC Cable Co.Ltd និងដៃគូធ្វើការសិក្សា និង ភិវឌ្ឍន៍គម្រោងវារីអគ្គិសនីស្ទឹងពោធិ៍សាត់១ ដោយកម្លាំងអនុភាព៨០មេហ្គាវ៉ាត់ ស្ថិតនៅក្នុងសាស្ត្រ ឃុំប្រមោយ ស្រុកវាលវែង ខេត្តពោធិ៍សាត់ ។ លោកជាម យៀប ក៏បានឲ្យដឹងថាសម្រាប់វិនិយោគទន់ក្នុងការសាងសង់គម្រោងវារីអគ្គិសនីស្ទឹងពោធិ៍សាត់១ ត្រូវចំណាយថវិកាសរុប២៣១.១០លានដុល្លារអាមេរិកក្នុងរយៈពេលសម្បទាន៣៩ឆ្នាំ ដោយរយៈពេលសាងសង់៤ឆ្នាំ និង៣៥ឆ្នាំសម្រាប់ធ្វើអាជីវកម្ម ។
សម្រាប់ការវិនិយោគនេះដែររាជរដ្ឋាភិបាលបានលើកលែងពន្ធដល់ក្រុមហ៊ុនរយៈ៩ឆ្នាំ ។ បរិមានថាមពល អគ្គិសនីផលិតប្រឆាំងឆ្នាំជាមធ្យមមានចំនួន៣៦០លានគីឡូវ៉ាត់ម៉ោង និងតម្លៃដល់អគ្គិសនីឲ្យអគ្គិសនីកម្ពុជាស្មើនឹង៧,៩សេនអាមេរិកក្នុងគីឡូវ៉ាត់ម៉ោង ។ លោកក៏បានឲ្យដឹងទៀតថា ចំពោះអគ្គិសនីដែលផលិតដោយក្រុមហ៊ុនខាងលើ អគ្គិសនីកម្ពុជា និងទិញថាមពលអគ្គិសនីទាំងអស់នៅរដូវប្រាំង និងទិញ៣០%នៅរដូវវស្សា ។ករណីអគ្គិសនីកម្ពុជាទិញអគ្គិសនីលើសពីបរិមាណមូលដ្ឋានក្នុងវស្សាត្រូវលក់ឲ្យអគ្គិសនីកម្ពុ ជាក្នុងតម្លៃ៦៥% នៃអត្រាលក់ធម្មតា ។
លោក ស៊ុយ សែម រដ្ឋមន្ត្រីក្រសួងរ៉ែ និងថាមពលបានឲ្យដឹងនៅពេលដំណើរអាជីវកម្ម ក្រុមហ៊ុនវិនិយោគបានយល់ព្រមឧត្ថម្ភថវិកាចំនួន១០០.០០០ ដុល្លារអាមេរិកក្នុង១ឆ្នាំសម្រាប់រយៈ ពេល៣៥ឆ្នាំ សម្រាប់បណ្តុះបណ្តាលធនធានមនុស្ស និងបង្កើនសមត្ថភាពក្នុងវិស័យ ថាមពលផងដែរ ។ ជាមួយគ្នានោះដែរលោករដ្ឋមន្ត្រីក៏បានឲ្យគម្រោងវារីអគ្គិសនីស្ទឹងពោធិ៍សាត់ក៏រងផលប៉ះពាល់ គឺប៉ះពាល់ដល់ប្រជាពលរដ្ឋ៣៤៧គ្រួសារប៉ះពាល់លំនៅដ្ឋានចំនួន៩២ខ្នង ផ្ទះរបស់ប្រជាពលរដ្ឋ៧៨គ្រួសារ ស្ថិតនៅក្នុងតំបន់អាចទឹកប៉ះពាល់ដីកសិកម្មរបស់ប្រជាពលរដ្ឋចំនួន២៦៩គ្រួសារ ។
បើតាមលោករដ្ឋមន្ត្រីដដែលក៏បានអះអាងថា សម្រាប់គម្រោងវារីអគ្គិសនីស្ទឹងពោធិ៍សាត់នេះគឺជាប្រភពអគ្គិសនីមួយដែលចេញពីធនធានធម្មជាតិក្នុងស្រុក ក្នុងការចូលរួមកាត់បន្ថយការប្រើប្រាស់ប្រេង និងមានថ្លៃលក់ថេរក្នុងរយៈពេល៣៥ឆ្នាំ គឺ៧,៩សេនអាមេរិក ក្នុង១គីឡូវ៉ាត់ម៉ោង ដែលជួយធានានូវសន្តិសុខថាមពលធ្វើឲ្យកម្ពុជាមានលទ្ធភាពអភិវឌ្ឍន៍សេដ្ឋកិច្ច និងសង្គមបានឆាប់រហ័សថែមទៀត ៕ កែសម្រួលដោយ ៖សុឃាក់
ចែករំលែកព័តមាននេះ