រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីថា បញ្ហាសិទ្ធិមនុស្សត្រូវគិតចាប់ពីសិទ្ធិរស់រានមានជីវិត ដោយមិនត្រូវមើលចំណុចអាក្រក់មួយហើយវាយតម្លៃថា អាក្រក់ទាំងអស់នោះទេ ។ ថ្លែងក្នុងពិធីផ្ទេរការគ្រប់គ្រងសាលាកុមារពិការភ្នែក និង គ ថ្លង់ នៃអង្គការគ្រួសារថ្មីស្ថិតនៅខណ្ឌសែនសុខរាជធានីភ្នំពេញមកគ្រប់គ្រង ក្រោមក្របខណ្ឌក្រសួងអប់រំយុវជន និងកីឡានាព្រឹកថ្ងៃទី០១ ខែកក្កដា នេះ ។
សម្តេចតេជោហ៊ុន សែន បានលើកឡើងថា បញ្ហាសិទ្ធិមនុស្សនៅកម្ពុជាយើងកុំឲ្យមើលឈើ ១ដើម តែ ត្រូវមើលឈើទាំងមូល ។ សម្តេចតេជោ ហ៊ុន សែន នាយករដ្ឋមន្ត្រីបានលើកឡើងថា សិទ្ធិមនុស្សមិនបាននៅជាមួយសង្គ្រាមនោះទេ ហើយសិទ្ធិមនុស្សមិនបានស្ថិតនៅក្រោមការសម្លាប់រៀងរាល់ថ្ងៃនោះទេ ។ ឥឡូវបើនិយាយពីវឌ្ឍនៈភាពយើងក្រលេកមើល៤០ ឆ្នាំមុន តើវាយ៉ាងម៉េច ? ហើយ៤០ឆ្នាំក្រោយតើវាយ៉ាងម៉េច ? ។ យើងត្រូវនិយាយគ្នាឲ្យច្បាស់លើរឿងនេះ ! ហើយត្រូវពិនិត្យប្រទេសដែល៤០ឆ្នាំមុនវាល្អ ហើយឥឡូវវាមិនល្អតើវាយ៉ាងម៉េច? ។
សម្តេចបញ្ជាក់ថា ៖« យើងព្រៀបធៀបអាចេះបានវាត្រូវ កុំមើលដើមឈើមួយដើម ៗវាយតម្លៃសភាការណ៍មិនត្រូវទេ ។ ឥឡូវយើងពិនិត្យមើលប្រទេសដែលមានវឌ្ឍនៈភាពផ្នែកសិទ្ធិមនុស្ស និងប្រជាធិបតេយ្យកាលពី៤០ឆ្នាំមុន មានអ្វីកើតឡើងនៅក្នុងប្រទេសទាំងនោះ ? ហើយមកដល់ពេលនេះបានសេចក្តីថា ជាដំណើរដើរថយក្រោយមួយរបស់បញ្ហាការគោរពសិទ្ធិមនុស្សរាប់ទាំងជនភៀសខ្លួនផងដែរ» ។ សម្តេចបានបន្ថែមថា កម្ពុជាកាលពីជាង៤០ឆ្នាំមុនមនុស្សស្លាប់រាល់ថ្ងៃ ហើយបន្ទាប់ទៅសង្គ្រាមនៅបន្តក៏មានមនុស្សស្លាប់បន្តទៀត ។ តែជាបន្តបន្ទាប់យើងបានឈានដល់ជំហ៊ានដល់ខ្លាហានមួយពីការមានជីវិតរស់រានឡើយវិញ ។
ជាមួយគ្នានោះដែរសម្តេចក៏បានគូសបញ្ជាក់ថា ៖ «សិទ្ធិមនុស្សត្រូវបានទទួលយកពីសិទ្ធិរស់រានមានជីវិតមិនមែនចាប់ផ្តើមពីការសរសេរកាសែតទេ ។ បើវាងាប់ហើយយើងសរសេរកាសែតយ៉ាងម៉េច ? យើងហ៊ាននិយាយគ្នាយ៉ាងដូច្នេះ ។ ដូច្នេះហើយបានជាកម្ពុជាមិនព្រមឱនក្បាលជាមួយនឹងការប្រៀនប្រដៅពីប្រទេសដទៃព្រោះកន្លែងខ្លះសម្លាប់មនុស្សដោយគ្រាប់បែកគ្រាប់ផ្លោងបាញ់ពីលើយន្តហោះ មួយថ្ងៃៗងាប់អស់ប៉ុន្មាន តើគេមានដែលគោរពសិទ្ធិមនុស្សទេ?» ។ សម្តេចបន្ថែមថា ឥលូវនេះកម្ពុជាមានប្រជាជនពី៥លាននាក់ឡើងដល់ប្រជាជនជាង១៦លាននាក់ ។
សម្តេចតេជោហ៊ុន សែន បានបញ្ជាក់ថា«កុំមើលឈើមួយដើមៗមើលឈើទាំងមូល ។ សិទ្ធិរស់រានមានជីវិតរបស់កម្ពុជាតាំងពីមនុស្ស៥លានឡើងដល់ទៅ១៦លាននាក់ ។ មិនមែនជារឿងលេងទេ ។ តាំងពីក្រ១០០% មកនៅកម្រិតក្រីក្រត្រឹម១០% ។ ទទួលបានទេអាហ្នឹង ? តាំងពីនេះពីដើមឲ្យតែគ ថ្លង់ ហើយឲ្យតែពិការភ្នែកហើយ គឺចាត់ទុកថា អស់សង្ឃឹមហើយ ។ ប៉ុន្តែឥឡូវនេះ តើនេះជាសិទ្ធិទេ ? យើងកំពុងអនុវត្តសិទ្ធិហើយ» ។ សម្តេចតេជោ បានបញ្ជាក់ទៀតថា «សិទ្ធិមិនមែន ស្ថិតនៅត្រឹមអា បញ្ចេញមតិបន្តិច តានេះជេរគេតាណោះ បង្កើតរឿងនេះបង្កើតរឿងនោះទេ ។ សិទ្ធិមានច្រើនយ៉ាង ណាស់ ។ បើគ្រាន់តែមើលឈើមួយដើមៗជេរប្រទេចបណ្តាសាទៅ ។
តែបើមើលឈើទាំងមូល ដែលទទួលបាននូវសេរីភាពនូវសិទ្ធិរាប់ទាំងសិទ្ធិដែលខ្ញុំអម្បាញ់មិញ បណ្តាទូរទស្សន៍ដែលមិនព្រមយកអ្នកបកប្រែទៅ គឺអ្នកឯងកំពុងកាត់សិទ្ធិអ្នក គ ថ្លង់ ហើយ ។ អីចឹង សូមអ្នក ម្ចាស់ទូរទស្សន៍ទាំងឡាយអនុវត្តនូវរឿងនេះ ។ ពេលដែលមានព័ត៌មានហៅគេទៅ ( អ្នកបកប្រែ ភាសា គ ថ្លង់) កុំកាត់សិទ្ធិយល់ដឹងពីព័ត៌មានសម្រាប់អ្នក គ ថ្លង់ ។ សម្រាប់អ្នកពិការភ្នែក គឺគាត់អាចស្តាប់នឹងត្រចៀកបាន ។ ប៉ុន្តែសម្រាប់អ្នកគ ថ្លង់ គ្នាស្តាប់អត់បានទេ អីចឹងត្រូវមានភាសាសញ្ញានៅទីនោះ ។ យើងគិតសព្វគិតគ្រប់ ឯគេគិតតែពីរឿងសិទ្ធិតែម្យ៉ាងគត់ ។ វាខុសគ្នាអាកន្លែងហ្នឹងទស្សនទាន អំពីបញ្ហាសិទ្ធិមនុស្ស» ៕ កែសម្រួលដោយ ៖សុឃាក់
ចែករំលែកព័តមាននេះ