រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបញ្ជាទៅថ្នាក់ដឹកនាំ និងអាជ្ញាធរគ្រប់ទីកន្លែងទាំងអស់ ត្រូវបន្តតាមដាន និងតម្រង់ទិសដល់កុមារតូចៗ ដែលជាអនីតិជន ដែលបានបាត់បង់ទាំងម្តាយនិងឪពុកអស់ ដោយសារតែឧបទ្ទវហេតុនៃការបាក់រលំអគារកម្ពស់៧ជាន់នៅក្រុងព្រះសីហនុកន្លងទៅ ដើម្បីឲ្យប្រាកដថា កុមារទាំងនោះបានចំណាយលុយកាក់ដែលរាជរដ្ឋាភិបាល និងសប្បុរសជននានាបានជួយកន្លងមក សម្រាប់ការអប់រំនិងត្រូវទិសដៅ ។
ថ្លែងនៅក្នុងពិធីផ្ទេរការគ្រប់គ្រងសាលាកុមារពិការភ្នែក និងគថ្លង់នៃអង្គការគ្រួសារថ្មី ស្ថិតនៅខណ្ឌសែនសុខ រាជធានីភ្នំពេញ មកគ្រប់គ្រងក្រោមក្របខណ្ឌក្រសួងអប់រំ យុវជន និងកីឡា នាព្រឹកថ្ងៃទី០១ កក្កដា សម្តេចតេជោ ហ៊ុន សែន បានលើកឡើងថា ក្មេងៗតូចដែលឪពុក-ម្តាយស្លាប់ទាំងពីរនៃការបាក់អាគារនៅព្រះសីហនុកន្លងមក មិនត្រូវបញ្ចប់ត្រឹមថវិកានោះទេ តែអាជ្ញាធរត្រូវបន្តជួយដល់ក្មេងៗទាំងនោះ ។
សម្តេចបានបញ្ជាក់ថា រឿងអកុសលបាក់រលំអគារនៅខេត្តព្រះសីហនុ គ្រួសាររងគ្រោះខ្លះ បានលើសជាង ១០ម៉ឺនដុល្លារ តែរឿងលុយឧបត្ថម្ភមិនថាច្រើនប៉ុណ្ណា គឺមិនអាចប្តូរយកជីវិតមនុស្សបានទេ ។ រឿងសំណងរដ្ឋប្បវេណី និងការជួយឧបត្ថម្ភជារឿងមួយផ្នែក ឯរឿងព្រហ្មទណ្ឌនៅតែបន្ត ពាក់ព័ន្ធករណីនៃការបាក់អគារនៅខេត្តមាត់សមុទ្រ ដែលបានបណ្តាលឲ្យមានជនរងគ្រោះបាត់បង់ជីវិតសរុប២៨នាក់ និង២៦រូបផ្សេងទៀតរងរបួស កាលពីព្រឹកព្រលឹម ត្រូវនឹងថ្ងៃទី២២ ខែមិថុនា នោះ ។
សម្តេចនាយករដ្ឋមន្ត្រីបានបន្តថា ករណីប្តីស្លាប់ប្រពន្ធនៅរស់ ឬប្រពន្ធស្លាប់តែប្តីនៅរស់ គឺការដាក់លុយនៅធនាគារ ជារឿងស្រួលទេ រួចប្រគល់ជូនទៅប្រពន្ធ ឬប្តីដែលនៅរស់ជាសៀវភៅធនាគារជាការស្រេច កុំឲ្យចោរវាលួច ព្រោះបើឲ្យលុយសុទ្ធ ចោរវាមិនស្គាល់ថា ជាជនរងគ្រោះអ្វីនោះទេ ។
សម្តេចបានបន្ថែមថា វាមិនមែនជារឿងលំបាកនោះទេ សម្រាប់ជនរងគ្រោះដែលបាត់បង់ជីវិត បើសិនជាកូន ដែលនៅមានឪពុក-ម្តាយ ហើយដែលបានស្លាប់ ដោយគេមិនទាន់មានប្រពន្ធ យកថវិកាទៅឲ្យឪពុក-ម្តាយរបស់ជនរងគ្រោះដើម្បីសម្រួលជីវិភាព ។
សម្តេចបានបញ្ជាក់ថា «រឿងដែលលំបាក ឪពុក-ម្តាយស្លាប់ទាំងពីរ បន្សល់ទុកនូវកូន ករណីនៅខេត្ត ក្រចេះ កូនគ្រប់វ័យទាំងអស់ ។ កូនមួយមានប្តី កូនពីរនៅលីវ ប៉ុន្តែសុទ្ធតែគ្រប់អាយុទាំងអស់ ចែកស្មើៗ
គ្នា។ ប៉ុន្តែរឿងកើតឡើងនៅកំពង់ឆ្នាំងមួយករណី កើតឡើងនៅបាត់ដំបងមួយករណី ឪពុក-ម្តាយស្លាប់ទាំងអស់ នៅសល់តែកូនជាអនីតិជន ។
អញ្ចឹងយើងត្រូវទទួលខុសត្រូវ ត្រូវតាមមើលអារឿងនេះតទៅទៀត ដោយមិនត្រូវទុកឲ្យកូនក្មេងនេះ គ្នាមិនបានទទូលការអប់រំ រៀនសូត្រនោះទេ ។ អញ្ចឹងអាជ្ញាធរគ្រប់ទីកន្លែងទាំងអស់ ត្រូវតាមមើលអាបញ្ហាអស់ទាំងនឹង ។ ឪពុក-ម្តាយរបស់គេបានស្លាប់អស់ទៅហើយ ជួនកាលគេមិនអាចប្រើលុយនឹងទៅចំគោលដៅ យើងជួយតម្រង់ទិស ។ ប៉ុន្តែសម្រាប់អ្នកដែលគ្រប់អាយុហើយនោះ គឺគេអាចទទួលកាន់នូវប្រាក់»។
សម្តេចតេជោ ហ៊ុន សែន មានប្រសាសន៍បន្ថែមថា រឿងបាក់អគារកន្លងទៅ មិនមែនជារឿងដាច់ដោយ ឡែករបស់កម្ពុជាឯណា វាធ្លាប់បាក់នៅបង់ក្លាដេស ឥណ្ឌា តៃវ៉ាន់ ចិន និងប្រទេសដទៃទៀតជាហូរហែរ តែយើងមិនចង់ឲ្យកើតករណីអញ្ចឹងទេ ៕ (សម្រួលដោយ៖ ស្រីណា)
ចែករំលែកព័តមាននេះ