មនុស្សស្រីគ្រប់រូបតែងមានក្ដីស្រមៃខុសៗគ្នាក្នុងការចង់បានបុរសដែលសាកសមបំផុតសម្រាប់ជីវិតគូរបស់ពួកគេ ។ យុវតីខ្លះអាចប្រាថ្នា បុរសដែលមានរូបសម្បត្តិសមរម្យ មានភាពស្មោះត្រង់ មានទំនួលខុសត្រូវខ្ពស់ ចេះគោរព និងអោយតម្លៃនារីៗ ឬក្រុមគ្រួសាររបស់គេ ។ខណៈដែលអ្នកខ្លះទៀតអាចផ្តល់អាទិភាពទៅលើមនុស្សប្រុសម្នាក់ដែលអាចគ្រប់គ្រងសេដ្ឋកិច្ចរបស់ខ្លួនបានយ៉ាងល្អ ដើម្បីផ្គត់ផ្គង់ជីវភាពរស់នៅប្រចាំថ្ងៃ និងទុកដាក់សម្រាប់ជីវិតគូដែលពោរពេញដោយភាពកក់ក្ដៅ ។
ហេតុផលទាំងអស់ក៏មិនមែនមានន័យថា មនុស្សស្រីត្រូវពឹងទៅលើមនុស្សប្រុសទាំងស្រុងនោះទេ ព្រោះថាមនុស្សស្រីរឹងមាំប៉ុណ្ណា ក៏នៅតែត្រូវការបុរសដែលជាសសរមួយដែលរឹងមាំសម្រាប់ពួកគេផ្អែកនៅពេលដែលពួកគេហត់នឿយ និងត្រូវការកម្លាំងចិត្ត ។
កញ្ញា សេងហួង មានអាយុ២២ឆ្នាំ ជាបុគ្គលិកផ្នែកលក់ នៅក្រុមហ៊ុនឯកជនមួយ កន្លែងបានប្រាប់អោយដឹងពីការចង់បានបុរសម្នាក់ក្នុងក្ដីសុបិនថា «បុរសដែលខ្ញុំ និងជ្រើសរើស គឺជាបុរសដែលអាចពឹងពាក់បាន ។ ជាក់ស្ដែងជាបុរសដែលមានការងារសមស្របមួយមានប្រាក់ខែសមរម្យ ដែលអាចចិញ្ចឹមគ្រួសារបាន អ្វីដែលសំខាន់ចេះគោរពស្រលាញ់ឪពុកម្ដាយរបស់ខ្ញុំតែម្ដង» ។
ផ្ទុយទៅវិញ កញ្ញា ស្រីនិច្ច អាយុ២៣ឆ្នាំ ជាជំនួយការមេធាវី នៅស្ថាប័នឯកជនមួយកន្លែងបាននិយាយថា «សម្រាប់ខ្ញុំបុរសដែលខ្ញុំត្រូវការមិនចាំបាច់មានគ្រប់យ៉ាងនោះទេ សុំត្រឹមតែយល់ចិត្តគ្នាទៅវិញទៅមកចេះអត់ឱនអោយគ្នា ព្រោះពេលខ្លះបុរសដែលមានគ្រប់យ៉ាងមិនប្រាកដថា អាចយល់ចិត្តយើងនោះទេ សេចក្ដីសុខផ្លូវចិត្ត គឺសំខាន់ណាស់សម្រាប់ខ្ញុំ ។ ៉
នាងនិយាយទៀតថា បើទោះបីជាបុរសដែលខ្ញុំជ្រើសមិនទាន់មានប្រាក់ចំណូលចិញ្ចឹមគ្រួសារទាំងមូលបាន តែអោយតែគាត់មានភាពតស៊ូទៅជាមួយនាង គឺបានហើយ។ ការដែលតស៊ូលំបាកជាមួយបុរសដែលយើង ស្រលាញ់វាពិតជាមានន័យដូចដែលចាស់ៗតែងនិយាយថា ជីវិតគូតែងមានផ្អែម ល្វីង ជូរចត់ ក្រលំបាកជាមួយគ្នា ។
ដូច្នេះ ជីវិតគូ គឺមានលក្ខណៈខុសៗគ្នាពីក្រុមគ្រួសារមួយទៅក្រុមគ្រួសារមួយ វាអាស្រ័យទៅលើផ្លូវ ដែលយើងជ្រើសរើសថា ផ្លូវណាដែលល្អ ឬផ្លូវណាដែលសាកសមសម្រាប់យើង ៕ កែសម្រួលដោយ ៖ សុឃាក់
ចែករំលែកព័តមាននេះ