រាជធានីភ្នំពេញ ៖ លោក ឡុង ឌីម៉ង់ ឯកអគ្គរាជទូតខ្មែរប្រចាំនៅកូរ៉េខាងត្បូង បានប្រកាសឲ្យដឹងនៅព្រឹកថ្ងៃទី០១ ខែកក្កដា ឆ្នាំ២០១៩ នេះថា កូរ៉េសម្រេចសាងសង់អគារថ្មីមួយទៀត សម្រាប់សម្រួលការកកស្ទះអ្នកជំងឺនៅមន្ទីរពេទ្យអង្គឌួង ។
លោក ឡុង ឌីម៉ង់ បានបញ្ជាក់ថា មន្ទីរពេទ្យអង្គឌួង ដែលជាមន្ទីរពេទ្យរដ្ឋមួយ មានឯកទេសភ្នែក ត្រចៀក ច្រមុះ បំពង់ក ដឹកនាំដោយក្រុមប្រឹក្សាភិបាលមួយ ដែលមានវិធីសាស្ត្រដឹកនាំគំរូមួយ ប្រើប្រាស់អគារដែលជាអំណោយរបស់រដ្ឋាភិបាលកូរ៉េបានយ៉ាងល្អប្រសើរ ។
ឯកអគ្គរាជទូតខ្មែរប្រចាំនៅប្រទេសកូរ៉េរូបនេះបានបន្តថា «ឥឡូវនេះ កូរ៉េសម្រេចសាងសង់អគារថ្មីមួយទៀត សម្រាប់សម្រួលការកកស្ទះអ្នកជំងឺ»។ លោកបានបន្តថា គ្រូពេទ្យ និងបុគ្គលិកមន្ទីរពេទ្យ សុទ្ធតែប្រកបការងារដោយក្រមសីលធម៌ និងវិជ្ជាជីវៈយ៉ាងខ្ជាប់ខ្ជួន បំរើប្រជាពលរដ្ឋទូទៅ ក៏ដូចជាបងប្អូនដែលមានប័ណ្ណ ប.ស.ស ទទួលបាននូវការគោរពពីមហាជន។
មិនតែប៉ុណ្ណោះ មន្ទីរពេទ្យអង្គឌួង រកចំណូលបានយ៉ាងច្រើនដែលធ្វើឱ្យបុគ្គលិក គ្រូពេទ្យ មានជីវភាពសមរម្យគួរឲ្យកោតសរសើរ ៕ (កែសម្រួលដោយ ៖ បុប្ផា)
ចែករំលែកព័តមាននេះ