ខេត្តកំពង់ធំ ៖ តាមសេចក្តីរាយការណ៍បឋមបានឲ្យដឹងថា ក្មេងស្រីតូចម្នាក់បានទៅបង់សំណាញ់ជាមួយតាៗ ហើយតាក៏ឈឺទៅបត់ជើងមួយភ្លាត ស្រាប់មកវិញចៅស្រីលង់ទឹកស្រះស្លាប់បាត់ ដែលហេតុការណ៍នេះបានកើតឡើងនៅវេលាម៉ោង១០និង០០នាទីព្រឹក ថ្ងៃទី៣០ ខែមិថុនានេះ នៅចំនុចស្រះមួយកន្លែងស្ថិតនៅក្នុងភូមិថ្មី ឃុំទីពោ ស្រុកសន្ទុក ខេត្តកំពង់ធំ ។
សេចក្តីរាយការណ៍បានបន្តសមត្ថកិច្ចប្រាប់ថា សពកុមារីរងគ្រោះឈ្មោះ ឃឹន ស្រីណែត អាយុ៦ឆ្នាំ រស់នៅក្នុងបន្ទុកជាមួយជីដូន នៅក្នុងភូមិកើតហេតុខាងលើ ។ យោងតាមការបំភ្លឺរបស់ជីដូនឈ្មោះ អុំ គឿន អាយុ៥២ឆ្នាំ បានរៀបរាប់ថា ចៅរបស់គាត់បានរស់នៅជាមួយគាត់តាំងពីអាយុបាន១ឆ្នាំមកម្ល៉េះ ឪពុកលែងលះគ្នា ចំណែកម្ដាយវាចាកចោលទៅធ្វើកម្មករនៅប្រទេសថៃបាត់ ហើយដោយនៅព្រឹកថ្ងៃកើតហេតុ ចៅស្រីរងគ្រោះនាងបានទៅតាមជីតារបស់វាឈ្មោះ សូ គុណ ទៅបង់ត្រីនៅតំបន់កន្លែងកើតហេតុខាងលើ ចម្ងាយពីភូមិប្រហែល៣០០ម៉ែត្រ ដោយមានគ្នាចំនួន៣នាក់មាន១- ប្ដីរបស់គាត់ ២- ឈ្មោះ សាញ់ សី ភេទប្រុស អាយុ៤០ឆ្នាំ (ជាមនុស្សមិនសូវគ្រប់ទឹក) និង៣- គឺចៅស្រីរងគ្រោះ ។
បើតាមសម្តីប្តីរបស់គាត់ប្រាប់ថា ពេលទៅដល់ស្រះគាត់បង់សំណាញ់បានបីបួនសំណាញ់ក៏ឈឺបត់ជើង ហើយក៏បានប្រាប់ទៅឈ្មោះ សាញ់ សី ឲ្យជួយមើលចៅផង នៅក្បែរច្រាំងស្រះនោះ រួចគាត់ក៏ដើរទៅបត់ជើងតាមគុម្ពោធព្រៃខាងជើងស្រះទឹកពេលត្រឡប់មកវិញពុំឃើញចៅស្រីក៏សួរឈ្មោះសាញ់ សី ថា ៖ ឯណាចៅយើង ? ឈ្មោះសាញ់ សី ថា ៖ មិនឃើញទេ! ប្ដីរបស់គាត់សង្ស័យចៅដើរទៅផ្ទះមុន គាត់ក៏ដើរមកដល់ផ្ទះ ហើយបានសួរគាត់ជាប្រពន្ធថា ឃើញចៅ វាមកផ្ទះទេ ? គាត់ថា ៖ មិនឃើញចៅទេ ! ពេលនោះប្តីគាត់ក៏ត្រឡប់ទៅកន្លែងបង់សំណាញ់វិញតែម្នាក់ឯងទៅដល់ជ្រុងខាងជើងឆៀងខាងកើតស្រះបានចុះរាវរកក្នុងទឹកស្រះជម្រៅត្រឹមក្បាលក៏បានប្រទះឃើញចៅស្រី ហើយក៏ស្រង់យកចៅមកសង្គ្រោះ តែចៅត្រូវបានស្លាប់បាត់ទៅហើយ ។
ក្រោយទទួលព័ត៌មានកម្លាំងជំនាញស្រុកបានសហការជាមួយប៉ុស្តិ៍នគរបាលរដ្ឋបាល និងរដ្ឋអំណាចភូមិបានចុះដល់ទីកន្លែងកើតហេតុ និងបានពិនិត្យសពផងដែរ ។ មូលហេតុ អាចដើរដួលធ្លាក់ជំរេលមាត់ស្រះចូលក្នុងទឹកលង់ស្លាប់តែម្តង និងបានប្រគល់សពជូនក្រុមគ្រួសារធ្វើបុណ្យតាមប្រពៃណី ៕ កែសម្រួលដោយ ៖ សុឃាក់
ចែករំលែកព័តមាននេះ