រាជធានីភ្នំពេញ ៖ កសិករខ្មែរនៅរៀងរាល់រដូវប្រមូលផលដំណាំហូបផ្លែ តែងតែមានកង្វល់ជានិច្ចក្នុងការស្វែងរកទីផ្សារលក់នូវទិន្នផលរបស់ខ្លួន ជាពិសេសកសិកផលសឹងតែទាំងអស់នេះរបស់កសិករខ្មែរ មិនមានទីផ្សារច្បាស់លាស់នោះទេ។ មានន័យថា បើខេត្តណានៅជាប់ប្រទេសថៃ កសិករខ្មែរលក់កសិផលឲ្យទៅឈ្មួញថៃ ហើយបណ្តាលខេត្តជាប់ប្រទេសវៀតណាម គឺកសិករនឹងលក់ឲ្យឈ្មួញវៀតណាម ដូច្នេះតម្លៃកសិផល គឺស្ថិតនៅលើមាត់របស់ឈ្មួញ ដែលពេលខ្លះឈ្មួញបានទម្លាក់ថ្លៃយ៉ាងទាប រហូតកសិករខ្លះសុទ្ធចិត្តទុកឲ្យផលដំណាំមួយចំនួន ដូចជាស្វាយទុំជ្រុះចោលក៏មាន ។
ប្រាកដណាស់ ដោយសារតែដីនៅប្រទេសកម្ពុជា មានអំណោយផលដល់ការដាំដុះធ្វើឱ្យទិន្នផលស្វាយមានច្រើនលើសលុប ជាហេតុនាំឱ្យកសិករពិបាករកទីផ្សារលក់ស្វាយ ធ្វើឱ្យតម្លៃរបស់ស្វាយធ្លាក់ចុះដល់អប្បរមា នាំឱ្យកសិករខាតបង់ចំណូលសម្រាប់ផ្គត់ផ្គង់ជីវភាព។ ដោយមើលឃើញពីបញ្ហានេះ វិនិយោគទុនខ្មែរមួយរូប បានបោះទុនបង្កើតរោងចក្រផលិតដំណាប់ផ្លែឈើ ដែលមានឈ្មោះថា ក្រុមហ៊ុន គីរីរម្យហ្វ៊ូដ ប្រដាក់សិន (Kirirom Food Production) ក្នុងគោលបំណងប្រែក្លាយកសិផលសំខាន់ៗមួយចំនួនដែលពិបាករកទីផ្សារ កែច្នៃទៅជាផ្លែឈើក្រៀមផ្គត់ផ្គង់ទីផ្សារក្រៅប្រទេសផង និងក្នុងស្រុកផង ។
ថ្នាក់ដឹកនាំក្រុមហ៊ុន គីរីរម្យហ្វ៊ូដ ប្រដាក់សិន មានប្រសាសន៍បញ្ជាក់ថា «ពួកយើងវិនិយោគទុនក្នុងការបង្កើតរោងចក្រ ផលិតដំណាប់ផ្លែឈើ ដោយកែច្នៃផ្លែស្វាយដែលកសិករលក់មិនចេញ ដើម្បីសម្រួលបន្ទុករបស់គាត់។ នៅពេលផុតរដូវស្វាយ យើងប្រើរោងចក្ររបស់យើងដើម្បីផលិតនូវដំណាប់ផ្លែឈើផ្សេងទៀតដូចជា ដំណាប់ចេកធម្មជាតិ ដំណាប់ល្ហុងធម្មជាតិ ដំណាប់ម្នាស់ ដំណាប់ខ្ញី និងដំណាប់ខ្នុរ ជាដើម ។ បច្ចុប្បន្ន គីរីរម្យហ្វ៊ូដ ប្រដាក់សិន គឺជារោងចក្រផលិតដំណាប់ផ្លែឈើធំជាងគេនៅកម្ពុជា។ ពួកយើងរំពឹងថា អាចពង្រីកការផលិតស្វាយរបស់យើងឱ្យកាន់តែធំជាងនេះទៀត មិនត្រឹមតែធានាឱ្យបាននូវចំណូលដ៏មានស្ថេរភាពរបស់កសិករប៉ុណ្ណោះទេ ថែមទាំងបង្កើនសេដ្ឋកិច្ចជាតិផងដែរ» ។
ជាងនេះទៅទៀត ក្រុមហ៊ុន គីរីរម្យហ្វ៊ូដ ប្រដាក់សិន មានចក្ខុវិស័យយ៉ាងច្បាស់លាស់ ក្នុងការប្រែក្លាយផលិតផលចេញពីរោងចក្រផលិតផ្លែឈើក្រៀម ឬដំណាប់ផ្លែឈើ ឲ្យក្លាយទៅជាប្រេនផលិតផ្លែឈើកែច្នៃដោយប្រើវិធីសាស្ត្រដាំដុះតាមបែបធម្មជាតិពិតៗ ដែលមានទំនួលខុសត្រូវខ្ពស់ និងទទួលបានការជឿជាក់ជុំវិញពិភពលោក។
«បេសកកម្មរបស់ក្រុមហ៊ុននាពេលនេះ គឺបង្កើតផលិតផលកែច្នៃមានគុណភាពខ្ពស់ ដែលមានរសជាតិពិតពីធម្មជាតិ និងធ្វើឱ្យមានសុខភាពល្អដល់មនុស្សគ្រប់គ្នា ដែលមានកសិករ កម្មករ និង អតិថិជនរបស់យើង» ។ នេះជាការលើកឡើងរបស់ថ្នាក់ដឹកនាំក្រុមហ៊ុន ។
ប្រភពដដែលបានបន្តថា ដើម្បីលើកស្ទួយផលិតផល ផលិតដោយកូនខ្មែរ និងដើម្បីធានានូវគុណតម្លៃខាងសុខភាព ក្រុមហ៊ុនបានជ្រើសរើសយកតែផ្លែឈើដែលទុំដោយធម្មជាតិ ផលិតតែអាហារដែលផ្តល់សុខភាពល្អដល់អ្នកបរិភោគ និងក្នុងការចូលរួមចំណែកក្នុងការរស់នៅដ៏ល្អរបស់បុគ្គលិកយើង។
សូមបញ្ជាក់ថា រោងចក្រផលិតដំណាប់ផ្លែឈើ មួយនេះ គឺជាមុខជំនួញគ្រប់គ្រងដោយប្រជាជនខ្មែរផ្ទាល់ ដោយដំបូងឡើយ គីរីរម្យហ្វ៊ូដ ប្រដាក់សិន (K.F.P) គឺពឹងផ្អែកទាំងស្រុងទៅលើចំការស្វាយនៅតំបន់គីរីរម្យ។ សម្រាប់ការចាប់ផ្តើមនូវវិនិយោគរបស់ខ្លួនដំបូងទីនោះ គឺ វិនិយោគទុនខ្មែររូបនេះ បានចាប់ផ្តើមដំបូងដោយការដាំចំការស្វាយនៅលើផ្ទៃដីមួយផ្នែកនៅជិតឧទ្យានជាតិគីរីរម្យនៅក្នុងឆ្នាំ២០០២ រហូតមកដល់បច្ចុប្បន្ននេះ ចំការស្វាយរបស់ក្រុមហ៊ុន គីរីរម្យហ្វ៊ូដ ប្រដាក់សិន បានពង្រីកវិសាលភាពនៃការដាំដុះលើដីដែលមានទំហំធំជាង ៥០០ហិចតា បូករួមទាំងចំការខ្នុរមួយផ្នែកទៀតផងដែរ។
រោងចក្រផលិតដំណាប់ផ្លែឈើនេះ ត្រូវបានសាងសង់ និងចាប់ផ្តើមដំណើរការនៅក្នុងខែតុលា ឆ្នាំ២០១៤ បន្ទាប់ពីទទួលបានការអនុញ្ញាតពីក្រសួងពាណិជ្ជកម្មនៅឆ្នាំ ២០១៣។ បច្ចុប្បន្ន ផលិតផលដំណាប់ផ្លែឈើ របស់ក្រុមហ៊ុន គីរីរម្យហ្វ៊ូដ ប្រដាក់សិន ត្រូវបាននាំចេញទៅកាន់បណ្តាប្រទេសជាច្រើនទូទាំងពិភពលោក ក៏ដូចជាទីផ្សារក្នុងស្រុកផងដែរ ៕ ដោយសហការ (កែសម្រួលដោយ ៖ បុប្ផា)
ចែករំលែកព័តមាននេះ