ខេត្តសៀមរាប ៖ កុមារីម្នាក់អាយុប្រហែលជាង២ឆ្នាំបានធ្លាក់ចូលក្នុងអាងចិញ្ចឹមក្រពើនៅខាងក្រោយផ្ទះរបស់ម្តាយ ហើយត្រូវក្រពើនាំគ្នាខាំហែកស៊ីស្លាប់ភ្លាមៗយ៉ាងអាណោចអាធ័មបំផុត ដោយបន្សល់ទុកតែឆ្អឹងលលាដ៍ក្បាលឱ្យឪពុកម្តាយបានត្រឹមតែអង្គុយយំអោបលលាដ៍ក្បាលកូនប៉ុណ្ណោះ បង្កឱ្យមានការភ្ញាក់ផ្អើលពេញភូមិរហូតដល់សមត្ថកិច្ចនៃហេតុការណ៍គួរឱ្យរន្ធត់នេះដែលកើតឡើងនៅចន្លោះម៉ោង១០ដល់ម៉ោង១១ព្រឹក ថ្ងៃទី៣០ ខែមិថុនា ឆ្នាំ២០១៩នេះ ត្រង់ចំណុចអាងចិញ្ចឹមក្រពើខាងក្រោយផ្ទះកុមារីរងគ្រោះ ស្ថិតក្នុងភូមិពោធិ៍បន្ទាយជ័យ សង្កាត់សៀមរាប ក្រុងសៀមរាប ខេត្តសៀមរាប។
នេះបើតាមរបាយការណ៍របស់លោកវរសេនីយ៍ឯក ណុប សារ៉ាក់ អធិការនគរបាលក្រុងសៀមរាប បានប្រាប់ថា កុមារីរងគ្រោះខាងលើឈ្មោះ រ៉ម រដ្ឋនារី អាយុជាង២ឆ្នាំ ចំណែកឪពុកកុមារីរងគ្រោះឈ្មោះ រ៉ែម រដ្ឋ អាយុ៣៥ឆ្នាំ និងប្រពន្ធឈ្មោះ នល់ សុលី អាយុ៣២ឆ្នាំ មានមុខរបរលក់ដូរ អ្នកទាំងពីរនាក់រស់នៅភូមិ-សង្កាត់កើតហេតុខាងលើ។ ពួកគាត់មានកូន៣នាក់ (ស្រីម្នាក់ ប្រុស២នាក់) ហើយកុមារីរងគ្រោះជាកូនទី២ ។
បើតាមការសាកសួរពីឪពុកកុមារីរងគ្រោះប្រាប់ឱ្យដឹងថា នៅម៉ោង១០ព្រឹកថ្ងៃទី៣០ មិថុនានេះ គាត់បានជិះម៉ូតូទៅក្នុងភូមិដោយទុកកូនស្រីឱ្យនៅជាមួយប្រពន្ធ (ម្តាយកុមារីរងគ្រោះ) ដែលទើបតែសម្រាលកូនខ្ចីមើលនៅផ្ទះ លុះម៉ោង១០ជាងទើបគាត់ត្រឡប់មកវិញក៏សួរប្រពន្ធថា «កូនទៅណាហើយ»។
ប្រភពដដែលបន្តថា ខណៈពេលនោះអត់ឃើញកូនក៏ដើររកកូនមិនឃើញ ហើយព្យាយាមដើររកជុំវិញផ្ទះនៅតែរកមិនឃើញទៀត ក៏ឡើងទៅមើលក្នុងអាងក្រពើ ស្រាប់តែឃើញលលាដ៍ក្បាល១ នៅក្នុងអាងក្រពើ ទើបឪពុកកុមារីរងគ្រោះសន្និដ្ឋានថា កូនគាត់ពិតជាដើរលេងលើអាងក្រពើ ហើយធ្លាក់ចូលក្នុងអាងក្រពើ ត្រូវក្រពើស៊ីនៅសល់តែលលាដ៍ក្បាលតែបុណ្ណោះ។
បច្ចុប្បន្ននេះ លលាដ៍ក្បាលកុមារីរងគ្រោះ ត្រូវសមត្ថកិច្ចប្រគល់ឱ្យឪពុកម្តាយយកទៅធ្វើបុណ្យតាមប្រពៃណី៕ (កែសម្រួលដោយ ៖ បុប្ផា) (ប្រភពវីដេអូ ៖ Vouchkim Hun)
ចែករំលែកព័តមាននេះ